دنگت و ادية يرجفن هاي تحچي صدگ كزيت سنوني و خزرتها
سيد حبيب گام و مشى گدامي وگلي ـ تعاي بابا اني اوصلچ
صار يمشي و اني وراه شگد دعيتله خلصني من الفشلة گدام گرايب السادة
بس بسيطة يا ايلاف، انساها الها؟
حاچاني سيد حبيب ـ بنيتي سؤال الغربلة و التمحيص عندي عليه بحث مفصل، بس يكمل طباعته ياسين انطيچياه اعذريني راح يتاخر عليچ شوية
ابتسمت و رديت عليه ـ يا سيد فوگ ما مزحم نفسك و راح تطبعه ! الله يجزيك كل الخير
دگ الباب و امي فتحته فسلم سيد حبيب عليها و آني فتت
سمعته يگلها ـ اليوم العصر نجي، ان شاء الله ماعدكم شي
ردت امي عليه ـ تنورونا كل الهلا سيد
دخلت امي للصالة وراية و صارت تحاچي خواتي على التنظيف
استغليت انشغالهن و فتت للغرفة بدلت و گعدت وحدي
خليت راسي بين رجليه و بقيت حايرة بحالي
ضايجة هواية منه لانه ما احترمني و ما حتى استأذن مني يلا يطلب گعدة ثانية
شگد حضرت نفسي لگعدة امس و هو خربها من گام و نهاها
حضرت ملابسي و عبايتي و ما تغديت وية اهلي
اخواتي هم بدلن و جهزن نفسهن لان هالمرة جتى نسوان بيت السادة جايات
سمعت صوت النسوان و ما طلعت من الغرفة لمن دخلت ايلاف لغرفتي وية مرأت سيد ياسين
ايلاف رادت تحضنني فـدفعتها بس غصباً عني حضنتني و بوستني
انوب تگول ـ يلا هاي بوستچ ، لعنة الله على ابليس خية كلها من جدي ما يبطل عمايله حاط گوره وياية لمن خبلني على صاحبتي
ضربتها حوراء مرأت سيد ياسين على ظهرها و بوستني
گعدن يمي بالغرفة و حوراء مرأت سيد ياسين حاچتني ـ رزلناها الچ خوش رزالة
طلعت وياهن للصالة سلمت على النسوان و سيد حبيب بس سمع هوسة النسوان من يمنا دز لقمان يصيحني حتى مَيلحگن يسولفن وياية على گعدة أمس
فتت للبراني لگيت بس حسين بي، لقمان اشرلي أگعد و طلع يم سيد حبيب بالطارمة
حاچاني حسين ـ شلونچ؟
ما رديت عليه فسألني ـ زعلانة مني؟
رفعت راسي و باوعتله بزعل يلا رديت عليه ـ انت مَحترمتني ، طلعت و طلبت گعدة ثانية بدون مَتسألني و ترجعلي
رد ـ ضجت و حسيت نفسي راح اخربط بال...
قاطعته بسؤال ـ منين؟ منين ضجت؟ آني حچيت شي غلط؟
جاوب ـ لا حشاچ بس الاسئلة عن الدروس الحوزوية حسيتها كلها تلميح عن سؤال واحد "ليش ما تدرس بالبيت ويانا"
أنت تقرأ
في دواخلنا (قيد التعديل)
General Fictionفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
