گمت بچادري طلعت من غرفة سيد حبيب
سيد علي رايح للجامع بس حسين موجود بالبيت و هو الي راح فتح الباب
ايلاف واگفة يم شباك المطبخ و تباوع
زهرة و ام ايلاف دخلو المرأة و بنتها للبراني و حسين اخذ سجادته و طلع منه
زهرة اخذت طوبى و اطفال سيد طالب و دخلتهم لغرفة سيد و اني صليت صلاة الغفيلة
دخلت علينا ام ايلاف اخذت مفاتيح الجنان و قرآن و راحت يم المرأة
وگفنا اني و ايلاف بباب البراني و شفنا ام ايلاف تقرا قرآن و دعاء يم راس البنية و البنية كل شوية تدفع امها و تريد تگوم
سألت ايلاف ـ هاي مو الي اتزوجت ذاك الاسبوع
جاوبتني ـ اي و امها تگل لأمي بنتي بيها تابعة
اجة حسين يمنا فسدينا الباب و هو سألنا ـ شنو هالخرافات؟ شبيها الوادم
ردت عليه ايلاف ـ و البنية اعرفها عاقلة ماعندها شي، تلگيها زوجها متعارك وياها لو ضاربها و ذني خبل....
قاطعتها ـ ايلاااف لا تحچين على الوادم بدون مَتعرفين
فتحت ام ايلاف الباب و گلت لحسين ـ خالة خابر جدك خل يفهمنا شنسوي
عفتهم اني و رحت كملت صلاتي
و آني اسبّح دخل سيد علي سلم على زهرة و طلب منها تسوي چاي لان زوج البنية و ابوها هَم جايين و گاعدين بالطارمة
طلعت للصالة و وگفت يم ايلاف گبال باب البراني نباوع
من مر سيد علي شايل صينية الچاي ردينا الباب و هو حاچانا باستهزاء ـ عود هَم حاسبيچن علينا طالبات حوزة و عدچن بخت
ضحكت زهرة و ايلاف ردت عليه ـ بيش يفيد البخت اذا ادنينا و حصلنا بوكسي طير عيوننا
ردت زهرة عليها ـ ذني السوالف انطيهن لحيدر يموت عليهن ، يسوي أبحاث على العالم
طلع سيد علي و حسين فات للبيت سألني ـ وين موبايلي؟
موبايله عند العلوية ام ايلاف و هو ظل يفتر فوگ راسي يريدني ادخل اجيبه فدخلت للبراني
بس دخلت ام ايلاف مدتلي الموبايل و گلتلي ـ تعاي عمة ابوطوبى يريدچ
اخذت الموبايل سلمت على سيد حيدر و السيد رد السلام و گلي ـ خوية ماكو شي اسمه جني مَيخليها تحبل او لأنها عروس راح يأذيها هاي كلها خرافات بس الوادم ما تفهم هذا الشي
اي احنا بشر مؤثرين و يؤَثر علينا
حركة الارض و الشمس و القمر و الأفلاك كلشي مؤثر بينا و باقي المخلوقات
تأثير الشيطان علينا هو الوسوسة للنفس، او بالضبط لجنود الجهل بالنفس نعم ممكن يكون للشيطان تأثير على احلامنا و افعالنا بس هالتأثير يندفع بتحصين الانسان نفسه بذكر الله و المعرفة
أنت تقرأ
في دواخلنا
قصص عامةفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
