گمت و رحت للكاشير طلبت الأكل سفري راد مني انتظر شوية فالتفتت و شفت حسين بعده گاعد و ايديه على راسه
رجعت گعدت گباله و هو مسح وجهه بسرعة و سألني ـ ها فاطمة؟
ـ گالو انتظري شوية و يجهز الغداء ، حسين قبل ما تجيني چنت بخير ما اچذب عليك امي چانت تخابرني و تبچي على حالي و تحچي عليك بس من اترك الموبايل و ارجع لدراستي و هوسة بحثي انسى كلشي
لا تظل تجيني و الله اتعبني
رد ـ بس آني ما اگدر بدونچ؟
هزيت راسي باستهزاء و گتله ـ لا تگدر تگدر ، هن كم يوم و تنسى و تعيش حياتك
رد ـ و الله ما اگدر، فاطم انطيني فرصة و شوفيني
ـ حسين لا تعيد نفس الكلام ، عوفني و حير بنفسك
روح شوف مشاكلك و حلها هذا عمك المسكين اگعد و اسمع منه و احچي وياه مثل الناس رتب امورك وية البشر بعيد عني
آني جيت هنا حتى اخلص من ذكرك الكل شوية ينعاد و يعصر گلبي
جهزو طلبي اخذته و طلعت و حسين اصر يطلبلي تكسي و يوصلني فصعدت وياه
وصلني للسكن و المسؤولة عنا سألتني ليش اتأخرت و ظلت تحقق وياية خمس دقايق يلا دخلتني
بدلت و خليت العلاگة بالگاع و صحت البنات الي وياية بالغرفة و گعدنا ناكل
الصبح راويت بحثي لمدرسة بالمركز و انطتني عليه ملاحظات كتبت اغلبهن و دزيتهن لسيد حيدر حتى يعلمني شنو اغير
من شافتني الست اراسل السيد سألتني ـ انتِ همين من اقربائه؟ بنت عمه لو خاله؟
جاوبتها ـ لا، هو يصير ابن عم زوج…زوجي
مساعدة مديرة المركز گالت ـ سيد حيدر انسان طيب و محترم ، شگد فرحت لمن ابوهادي "زوجها" گلي راح يتزوج
چان اذا يشاقيه ابوهادي و يگله راح نزوجك تخنگه العبرة و يصير يذكر زوجته المرحومة
حاچيتها ـ سيد حيدر خطب اختي الجبيرة ميادة ، و ان شاء الله الاسبوع الجاي مشيتهم و عقدهم
نزت و رددت بفرحة ـ يااا عيوني شايفين كل الخير
گامت الست المسؤولة عني و گالت ـ احنا عدنا دعوة لحضور ندوة بمدرسة اعدادية بمناسبة شهادة الزهراء عليها السلام تجين وياية
فرحت و وافقت بسرعة
رحنا للمدرسة و دخلنا بقاعدة چبيرة مملية بالطالبات و هوسة
دگت وحدة من المدرسات على الباب و صاحت بالطالبات فسكتتهم و ابتدت مدرستنا كلامها عن السيدة الزهراء عليها السلام
طلبت مدرستنا من الطالبات يكتبن اسئلتهن و اني جمعت اسئلتهن فاستوقفني سؤال وحدة «الزهراء هَم تحبنا احنا الكلنا اخطاء»
قدمته و خليته اول سؤال و قربته من الست و گلتلها ـ جاوبيها ست
قرته مدرستنا و گامت انطتني المايك و گلتلي ـ انتِ اختاريتيها انتِ تجاوبيها
أنت تقرأ
في دواخلنا
Aktuelle Literaturفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
