في دواخلنا

26

طلع حسين من البراني و بيبيته طلعت وراه ظلت تسولف وياه

سيد حبيب گعد بالگاع و صار يدور بين كتبه فرحت گعدت يمه و ايلاف هَم جتي

سيد ياسين طلع للطارمة دقيقتين و رجع يصيح الطلاب حتى يتجمعون للدرس

جاب سيد حيدر بنته سلم و وگف بباب الهول و گال ـ عادي نگعد و نستمع وياكم

گعد يمه سيد علي و رد عليه ـ آني دوم استمع وياهم اگعد خوية اگعد

زفر الاستاذ و گل لعلي ـ بس لا تقاطع درسي

دفع سيد علي طوبى و گلها ـ روحي يم الجهال جدچ ما يقبل واحد يقاطعه

رد عليه سيد حبيب ـ آني اقصدك انت اترك الطفلة

گالت طوبى ـ لا جدو ما اريد ابقى آني اروح يم خالة ميادة تسويلي تسريحة

دناها ابوها اله و ردد ـ يا طلابة التسريحة

انوب التفت لسيد حبيب و گله ـ سيد يمتى تمشيلي و تخلصني

گام بشير و اشر للطفلة و گلها ـ تعاي آني اوصلچ لخالتچ

ركضت طوبى لبشير و ابوها رد عليه ـ لا خوية زحمة الدنيا ليل

كمشت طوبى بايد بشير و بشير رد عليه ـ لا ماكو كل زحمة ، على ما يكملون درسهم اجيبها و آخذ فاطم

اخذ بشير الطفلة و من فتح باب البراني دخلت العلوية مرأت سيد حبيب و گلت للسيد ـ خو عاندت ابد ما يفيد وياك

رد عليها سيد حبيب ـ علوية عندي درس

گلتله العلوية ـ و آني اريد ابنيي يمي ، خلي عندك علم

طلعت العلوية و طبگت باب البراني طبگة رجت البيت رج
و سيد حبيب استغفر و اشرلنا نفتح دفاترنا

ـ بسم الله الرحمن الرحيم
درسنا بالدرس السابق أصل من أصول الدين و هو الامامة و تكلمنا عن أهم المسائل فيها

اليوم نذكر فرع من فروع الدين ليس اصوله
اتفقنا الأصول هن (التوحيد و العدل و النبوة و الامامة و الميعاد)
و الاصول هي الاساس الفكري و الاعتقادي

اما الفروع : هي سلوكيات تأديها و منها (الصلاة، الصوم،الحج، الجهاد، الزكاة، الخمس، الأمر بالمعروف والنهي عن المنكر، التولي لأولياء الله، التبري من اعداء الله)

اليوم نربط فرع التولي و التبري بأصول الدين
مثلاً : بسم الله الرحمن الرحيم
﴿أَئِنَّكُمْ لَتَشْهَدُونَ أَنَّ مَعَ اللَّهِ آلِهَةً أُخْرَىٰ ۚ قُل لَّا أَشْهَدُ ۚ قُلْ إِنَّمَا هُوَ إِلَٰهٌ وَاحِدٌ وَإِنَّنِي بَرِيءٌ مِّمَّا تُشْرِكُونَ﴾
حيث ذكرت البراءة بالقرآن الكريم مقرونة مع التوحيد

وايضاً الآية الكريمة: ﴿إِنَّمَا وَلِيُّكُمُ اللَّهُ وَرَسُولُهُ وَالَّذِينَ آمَنُوا الَّذِينَ يُقِيمُونَ الصَّلَاةَ وَيُؤْتُونَ الزَّكَاةَ وَهُمْ رَاكِعُونَ ﴾
و التي يجمع اغلب المسلمين انها نزلت في امير المؤمنين و اولاده
حيث قرن الله ولايته بولاية رسوله و آله