سيد طالب اخو ايلاف الچبير فصل سيد ياسين عن حسين و طلع ابو ايلاف صاح بيهم ـ يمعودين فضحتونا شعدكم؟
سيد ياسين أشر على حسين و رد على عمه ـ هالكلب اذا بقى هنا اني ما اظل، خل يولي وين غراضه جيبوهن و خل يولي
حسين يريد يتعارك وية اخوه فوگفو ولد عمه گدامه يمنعوه و ابو ايلاف صار گدام سيد ياسين يحاول يهديه
صار سيد ياسين يصيح ـ تردوني اسكت اطردوه هذا مو اخوي
رد عليه حسين ـ و انت من يمتى حاسبني اخوك؟ لو بيدك حتى تكفرني و تطلعني من الملة
البيت هذا بيت جدي و ما اطلع منه لو تصير براسك نخلة
ـ بس اني ما اريد اشوفك
هدأت الاصوات و حسين باوعلي فكملت كلامي وياه ـ آني عايشة على دراستي عند سيد حبيب و وجودك يمنعني من الدراسة، افسخ عقدنا و روح الله يوفقك
بشير ضغط على ايدي حتى اسكت و حسين رد بنبرة هادئة ـ بس اني ما اريد افسخ
فتحت عيوني على وسعهن و قبل ما احچي كمل كلامه ـ ادري غلطت و قهرتچ بس چان عندي مشكلة و عبالي ما احلها ، بنعمة الله انحلت هسة و رجعت
رد عليه لقمان ـ لخاطر سيد علي ما راح احچي بس و الله…
قطع لقمان كلامه لان بشير اتحرك حتى يروح يتعارك وية حسين فوگف گدامه و منعه
دخت و جرو دموعي فانتچيت على ايد امي و هي سندتني و گعدتني بالگاع
سيد طالب صاح باخوه الزغير ـ هادي اركض جيب مَي و صيح ايلاف
حسين عاف الزلم و اجة علية يسألني ـ شعندچ؟ هبط ضغطچ؟
من لزم ايدي فزيت و دفعت ايده و آني ابچي، رفع ايده يهديني و هو يگول ـ شلت ايدي بس گولي شعندچ؟
لقمان سألني ـ خيتي راسچ يوجعچ؟ صخنتي؟
مد حسين ايده على گصتي فدفعته و ضربته بكل قوتي على صدره حتى صوت الضربة انسمع
صحت بي بهستيرية ـ لا تلمسني تكتلني من تلمسني لا تلمسني
دفعه بشير و اخذ كاسة المَي من سيد هادي فتحها و مدها الي ما اخذتها و حاچيت حسين و اني ابچي ـ آني ما ضايجة منك آني ضايجة من نفسي لان جاي ابچي على واحد مثلك
ولك منو انت و تكسرني هالكسرة؟
طلعت ايلاف من بيتهم و شهدت كلامي فصاحت بي ـ عوفها كافي حرام عليك ، دمرتها و الله
دخل حسين للبيت و عيونه دم و بشير و امي وگفوني وطلعنا من البيت
السادة طلعو ورانا و صاحو لقمان يعتذرون منه
من فتنا للبيت كلها شافت احوالي متخربطة فاتجمعن البنات علية
گعدنا بالهول و بعد دقايق دخل لقمان يصيح ـ وينها هاي
خليت ايدية على وجهي مسحت دموعي و بشير صار وگف گدامي و رد عليه ـ ترا ما سوت شي
أنت تقرأ
في دواخلنا (قيد التعديل)
General Fictionفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
