في دواخلنا (قيد التعديل)

5

اجانا سيد ياسين و امه يردون يتأكدون إذا صايرة بيناتنا آني و حسين مشكلة
او گايلي وين هو و طالب مني ما أگلله
زين اذا اخوه و امه مَيندلوه آني أندله !

حسين فاتح موبايله و من نتصل عليه "يرن" بس ما يرد علينا

صاحبه الطبيب رايح للشرطة و حاچيلهم الحالة فمتصلين بحسين و راد عليهم بـ : آني بخير بس ما اريد احچي وية أحد

من رجعت اتصلت مرة ثانية قفل النت بموبايله و صار يطلعلي "اتصال"

سمعت لقمان بالصالة يصيح - ابن ال#*# مكنك بس ما يرد علينا

و امي ترد عليه - استغفر ربك ابيه سيد و ميت حرام تسبه

صاح لقمان بيها - يمة لا تخليني اتسودن ، صارن 3 أيام ندگ على الموبايل و ما يرد تالي يجاوب الشرطة ماعندي شي بس ما اريد احچي وياهم

رد عليه بشير - اخوته راح يرحون لايران وراه خل ننتظر و نشوف ، بس إذا طلعت كل هالسوالف لأن مَيريد فاطم محد يخلصه من ايدي

ايلاف صارت تراسلني " وينچ"
"ليش تقرين الرسائل و مَتردين"
"حسين انطوائي و من يصير وياه شي دوم يضم علينا ، أكيد صاير وياه شي"
"هَم اتعاركتو قبل مَيروح ! "

چنت محتاجة اسولف وياها و افضفض بس من شفت سؤالها الاخير بطلت و غلقت الموبايل
صار تلث ايام اجاوب بـ لا ، يعني الا انشر محادثتنا يلا يصدگون !

نمت و فزيت قبل آذان الفجر فـطلعت گعدت بالطارمة

سمعت بشير يسأل - شتسوين هنا خيتي؟

اتقرب علية لزم ايدي و گومني و هو يگول - رددي يا الله هاي انتِ التدرسين دين شو گبل سلمتيها؟

سحبت ايدي و رديت عليه ـ بشير و الله تعبانة أريد آخذ نفس

گعد يمي فگتله ـ كل الي يشوفني يسألني خاف متعاركة وياه لو حاچي وياچ، حتى صاحبتي تسألني هالسؤال
صبرت يوم وجاوبتهم لا و نفس الشي ثاني يوم و هذا الثالث
كافي تعبت

خله ايده على متني و رد - خيتي أهل ذوله حقهم ، ما يدرون شبي ابنهم و شعنده؟ ماكو واحد فجأة يقرر يعتزل الناس و ما يرد على أحد إلا إذا صايرتله مصيبة

اتحسرت فگام و سحب ايدي اخذني لغرفة امي و گعدها و خلاني اتمدد يمها

بعد صلاة الصبح لاحظت شماغ ابوية الي يلبسه من تبرد الدنيا معلگ بالزاوية

گمت عن سجادتي و اخذته
اتمددت على الچرباية و غطيت وجهي بي

گعدتني امي بالسبعة و هي تگلي ـ يُمه اگعدي اخوچ يگول وراها دوام

صاح لقمان من الهول - هاااا تگووووم لو اجي اسحلها و اطلعها

اتنهدت و گمت لغرفتي بدلت و اخذت دفتر واحد و قلمي خليته بالجنطة دخلت مرأت اخوية بيدها فلوس انطتني و انطت لاختي ايمان