في دواخلنا

14

مشرف الگروب هو مرأت سيد ياسين فغلقت الكتابة و حذفت الرسائل

راسلت ايلاف ما ردت علية، كل الي صار بسبب ام ايلاف
صدگ النسوان ما يضمن شي اكيد گالت لاختها شلون فاتحتها ايلاف بخطبتها لبشير

اتسحرو عمي و عمتي يمنا و طلعو زارو الأمير و صلو هناك و رجعو لبيوتهم

آني و البنات اتسحرنا بالغرفة ما طلعنا يمهم

من خلصت صلاة الوتر دخلت ام تمارة للغرفة بيدها گلاص مَي انطتني و گلتلي ـ اشربي قبل لَيصير الامساك، وبعد صلاة الصبح اصعدي لغرفتنا لقمان يريدچ

شلون صلاة صليتها ببخت اخوية، كل شوية و راح تفكيري لرزالة ابوتمارة

صعدت لغرفته و لگيت امي يمه من شافني صاح ـ تعاي

رحت و گعدت يم امي و دنگت

گام لقمان فتح باب غرفته و صاح ـ بشير تعال لا تخليني اجي اسحلك من غرفتك

عيطته خلت گلبي يوجعني و ايدية يرجفن بينما بشير فات يضحك و يتشاقى و لا على باله

أشر ابوتمارة لبشير حتى يگعد يمي و بس گعد گال لقمان ـ آني ما احچي شي انتو سولفولي

سأل بشير ـ شنسولف؟

مال لقمان راسه علية و گال ـ السوالف كلها يمچ انتِ، احچيلي لا ابتلي بيكم اثنينكم

امي ردت عليه ـ خطية يُمة على كيفك وياها

شال لقمان دولكة نايلون و رگع بيها بشير يلا رد على امي ـ يُمة رحنا نصلي و ابنچ سلم على سيد علي و السيد ما رد عليه ، و اني گوة جاوبني و شلون يرد ! انتو من كل عقلكم ارد على واحد يريد اختي و ما يدخل اهله بخطبتها

أشر لقمان علية و كمل ـ موديله زعطوطة روحها متيهتها و ما يگل لأمه

امي ضربتني على عضدي و گالت ـ صدگ ولچ ليش ما گلتيلي اخوچ رايد صاحبتچ، غير تسولفيلي

رديت عليها ـ بس سألت ايلاف عن رأيها حتى إذا وافقت بشير يسولفلچ، ما أدري تكبر السالفة و توصل لأهلها

گال لقمان ـ اي أكيد تكبر لان هذا زواج مو لعبة تلعبها المزعطة، ولچ لوما خطيبچ اعتذر مني على طلعتكم امس بدون علمنا چا كسرت راسچ و راسه

ردد بشير ـ و تالي شصفيتو تخطبولي لو لا؟

لقمان أخذ القرآن و گل لأمي ـ يُمة اخذي ولدچ عني لا و حق هذا القرآن ابتلي بيهم

اخذتنا امي وياها لغرفتها و رزلتنا آني و بشير لمن ضاج بشير و صعد لغرفته و بقيت بس آني يمها

شفتها اتمددت على چربايتها شلت الغطا و اتمددت يمها

حاچتني ـ فطومة راح تتزوجين بطلي تنامين يمي