طول الطريق چان يريد يحچي وياية و يسكت لمن وصلنا يلا گلي ـ إذا ماكو مانع آني أريد ادز العلويات يسولفون وية العائلة الكريمة بخطبتي لاختچ ميادة
سألته بتعجب ـ هسة سيد بشهر الحزن !
رد بسرعة ـ لا مو هسة الخطبة ، هسة بس ندز العلويات يعتذرون من اختچ و يوضحون سوء الفهم
نزل و آني نزلت و گلي و هو مدنگ راسه و ضايج ـ خوية آني حچيت وية ابوزيد و گتله على اختچ الكريمة ؛ گتله آني ارتاحيتلها و بنيتي همين و أريد افاتح سيد حبيب بخطبتها بعد محرم
ناقشت هالكلام بيني و بينه بس ابو زيد راح و حچة لزوجته فوصل الحچي للنسوان
رديت عليه ـ يصير خير سيدنا
سلم على المدرسات و راح لشغله
كملت دروسي و طلعت لگيت الطالبة النطتني رسالة واگفة بباب المركز
سلمت عليها و گلتلها ـ اجيتي تريدين تسمعين جوابي على رسالتچ؟
ردت و عيونها مدمعة ـ اي ، مشكلتي العادة السرية تركتها و الله تركتها شهرين و تلاثة بس رجعت
صلاتي گطعتها دراستي جاي تتدمر آني الگضيتها اعفاءات هسة ما اگدر اقرالي صفحة
خليت ايدي على متنها و گلتلها ـ كلشي ينحل ان شاء الله، من تجين للدرس نحچي عنها شديلي حيلچ و اتكلي على الله
هي بس تحتاج صبر و ان شاء الله كلشي يتبدل
اجاني سيد حيدر و بنته وياه راوتني رسماتها و هو نزل اتسوگلها فواكه و رجع
صاير يجيبلها جنطة ملابس حتى تظل يم زهرة بغيابه
من وصلنا لگينا البنات جاي يصبون غداء ، مباشرة دخلت للمطبخ سلمت و شلت مواعين و دخلت للهول
من دخلت للهول العلوية مرأت سيد حبيب گلتلي ـ اگعدي بيبي توچ جاية و مرأة حامل لا تمدين ايدچ
حوراء مرات سيد ياسين جاي تطلع و لاگاها رجلها گلتله ـ هاك شوف بدأ الدلال ؛ تگلها اگعدي انتِ حامل خوش علوية بسيطة
صاحت بيبيتهم وراها ـ چا ما داريناچن من چنتن حوامل !
سألني سيد حبيب ـ هَم حچيتي وية حسين؟ امس دگيت عليه و ما رد
باوعت لعمي ابو ايلاف و حاچيته و اني متفشلة ـ عمي ما اعرف منو حاچيله و الله ما سولفتله و لمته من دريت متعارك وياك
سأل سيد حبيب بتعجب ـ ويامن متعارك حسين؟ وية عمه؟
رد عليه سيد علي ـ اي و الله جدي هذا ابن ابنك طاگات فيوزاته ، الحچت بت خالتي ادري ابوي شعليه؟
عمو ابو ايلاف گلي ـ عمي اني تعبان مو مثل گبل و اتحمل كافي و هو مو زغير رجال كبر و راح يصير ابو شنو كلما تصير سالفة حاچاني و اتعارك وياي
يعمي خل يحسبني ميت
أنت تقرأ
في دواخلنا
Художественная прозаفي دواخلنا حرب نفسية و أن تكون الفائز دائماً هو أمر مستحيل بل مع تكرار المحاولة تظفر
