YOU BROKE ME FIRST [ COMPLETED ]

SEVEN

«𝙐𝙉𝙄𝘾𝙊𝘿𝙀»

နောက်တစ်နေ့မိုးသောက်ချိန် ဂျောင်ဂုတို့နှစ်ယောက် ရွာထဲကိုပြန်ဝင်လာတော့ ရွာရဲ့အုပ်ချုပ်ရေးမှူး၊ရာအိမ်မှူး၊ဆယ်အိမ်ခေါင်း၊ရဲအုပ်အစရှိတဲ့ အရာရှိ လူကြီးတချို့နှင့်အတူ ထယ်ယောင်းရဲ့ဖိုးဖိုးကပါ သူ့အိမ်မှာ အရံသင့်ရောက်နှင့်နေပြီ။

ပထမတော့ မေမေက ဂျောင်ဂုတစ်ယောက်တည်းပျောက်နေသည်အထင်နှင့် ရဲစခန်းမှာ လူပျောက်တိုင်ချက်သွားဖွင့်ရာက သူမရှေ့လေးတင် "ဂင်မ်ထယ်ယောင်း" နာမည်နဲ့ လူပျောက်လာတိုင်ထားတာကိုပါ တွေ့သွားခဲ့ခြင်းဖြစ်သည် ။ မာရီယာ၏အလှော်ကောင်းမှုကြောင့် မေမေသည် ထယ်ယောင်းနာမည်ကို နားရည်ဝအောင်ကြားဖူးနေပြီးသား ဖြစ်ဟန်တူပါသည်။

ထိုမှတဆင့် သူတို့နှစ်ယောက်တည်း အတူပျောက်သွားတဲ့သတင်းက ခပ်မြန်မြန်ပင် တစ်ရွာလုံးအနှံ့ပျံ့သွားခဲ့သည် ။ တချို့ကတော့ ယောက်ျားသားနှစ်ယောက်မို့ သိပ်ထွေထွေထူးထူးမတွေးကြပေမယ့် ၊ "ခိုးပြေးကြတာ" ဟု ကောက်ချက်ချသူတချို့ကတော့ မိုးလင်းသည်နှင့် ဂျောင်ဂုအိမ်ကို လူကြီးသူမအစုံအလင်နဲ့ စုဝေးရောက်ချလာကြ၏ ။ စကားအသွားအလာအရ သူတို့ရွာသားဘက်က အပြည့်အဝကာကွယ်ပေးမယ့် အနေအထားမျိုးမှာရှိတာကြောင့် မေမေက သူမဒေါသတွေကို မနည်းချွန်းအုပ်ထားရပုံပင်။

အရိုးခံ ရွာသူရွာသားတွေရှေ့မှာ ထယ်ယောင်းရဲ့ဖိုးဖိုးအား အေးအေးလူလူပင် ဖြောင်းဖျဖြေရှင်းနေတဲ့မေမေ့အား ဂျောင်ဂု ငေးကြည့်နေမိသည်။

အခုကိစ္စမှာ အရွယ်ရောက်ပြီး၊အသိညဏ်ကြွယ်ပြီးသားဖြစ်တဲ့ သူမသား၏ ပေါ့ဆမှုအမှားဖြစ်တဲ့အပြင် တစ်ဖက်က အသက်ပင်မပြည့်သေးတဲ့ကလေးလေးမို့ ဖိုးဖိုးကြီး စိတ်ပူနေရှာမှာကိုလည်း ကိုယ်ချင်းစာ၊အားနာစိတ်ဖြစ်မိကြောင်းပြောနေတာဖြစ်၏။

"ဘာပဲဖြစ်ဖြစ် နှစ်ဦးစလုံးက ယောက်ျားသားတွေမို့ တော်သေးတာပေါ့ရှင်.. ထယ်ယောင်းနေရာမှာ မိန်းမပျိုလေးတစ်ဦးသာဆို ကျွန်မတော့ ဒီ့ထက်ပိုပီးမျက်နှာပူမိဦးမှာအမှန်ပဲ"

မေမေ့ စကားအသွားအလာက ဘယ်အနေအထားကိုဦးတည်နေသလဲ ဂျောင်ဂုသိပါသည်။ "ညကြီးအချိန်မတော် ယောက်ျားလေးနှစ်ယောက် တစ်နေရာကိုအတူထွက်သွားကြတယ်၊မိုးလင်းတော့ ပြန်ရောက်လာတယ်၊ လူကြီးတွေကိုအသိမပေးခဲ့လို့ အပြစ်ရှိရုံကလွဲရင် ယောက်ျားချင်းမို့ ကျန်တာဘာမှထွေထွေထူးထူး ထပ်ဖြေရှင်းနေစရာမလိုဘူး" ဆိုတဲ့အဓိပ္ပာယ်ပင် ။