YOU BROKE ME FIRST [ COMPLETED ]

FOUR

«𝙐𝙉𝙄𝘾𝙊𝘿𝙀»

"မိပြီကွ.. အော်စတင်၊ချာလီ ဒီမှာကြည့်စမ်း"

အကောင်ကြီးကြီးမိနေပြီအထင်နဲ့ အားရပါးရဆွဲမြှောက်လိုက်သောငါးမျှားချိတ်မှာ အခန့်သားတွယ်ချိတ်နေသည်က အဝတ်စအနီရောင်တစ်ခု။

ဂျောင်ဂုစိတ်ပျက်စွာပင် "ကျစ်" ခနဲစုပ်သပ်လိုက်မိသည် ။ သူ အမှတ်မမှားဘူးဆိုရင် ခပ်လှမ်းလှမ်းက ချာလီနဲ့အော်စတင်က အနည်းဆုံး လေး၊ငါးကောင်တော့ဖမ်းမိနေကြပြီ ။ သူတစ်ယောက်ပဲ အခုထိတစ်ကောင်မှမရသေးတာ ။

"မင်းပြောတော့ ငါးသွားမျှားကြမယ်ဆို ၊ ခုတော့ ချောင်းထဲကအမှိုက်တွေပဲ သိမ်းကျုံးဆယ်နေပါလား ဂျေခေရ၊ ဒီလောက်ဆို ငါတို့ချက်အရက်ဆိုင်ကို သွားသင့်ပြီနော်"

အော်စတင်က သူရထားတဲ့ငါးတွေကို တဗြန်းဗြန်းပုတ်ပြရင်း နှစ်ထောင်းအားရဆိုသည် ။ ဒီနှစ်ကောင် ရွာကချက်အရက်ကိုမြည်းစမ်းကြည့်ချင်တယ်ပြောနေတာ ဒီကိုစရောက်တဲ့နေ့ကတည်းကပင် ။ ဂျောင်ဂု ယတိပြတ်ငြင်းထား၍သာ အောင့်အီးသည်းခံနေရခြင်းဖြစ်သည် ။ ကိုယ်တိုင်လည်း အသောက်အစား ကင်းလှသူတော့ မဟုတ်ပေမယ့် ဒီရွာကို စရောက်ကတည်းက အရက်၊ဘီယာ၊ဆေးလိပ်တွေကို သူအတတ်နိုင်ဆုံးရှောင်ခဲ့သည် ။ မတော်တဆ ကလေးတစ်ယောက်ယောက်များ မြင်သွားခဲ့ရင် အတုယုမှားမှာ စိုးသောကြောင့်ပင် ။ ကျောင်းသားတစ်ယောက် အရက်သောက်လို့၊ ဆေးလိပ်ဖွာလို့ သူဆုံးမချင်တဲ့အခါမျိုးကျရင်တောင် "ဆရာကျ သောက်ပြီးတော့" ဆိုတာကနေ အစချီလာမယ့် နောက်ဆက်တွဲ ခုခံစကားတွေကို သူနားမထောင်ချင်ပါ ။ သူတစ်ပါးကို ဆုံးမလမ်းညွှန်ပေးနိုင်ဖို့ ကိုယ်တိုင်ကလည်း အပြစ်ကင်းဖို့ လိုအပ်သေးသည်လေ။

"အေးလေကွာ..၊ ငါတို့ အိမ်ပဲပြန်လိုက်တာကောင်းမယ်ထင်တယ် ..၊ ရေစီးကလဲသန်လာပြီ ၊ ကြာရင် ရေထဲမျောနေတာ အမှိုက်မဟုတ်ပဲ ငါတို့လေးယောက်ဖြစ်သွားဦးမယ်"

ချာလီပြောတာလဲမှန်ပေမယ့် ဘေးမှာမာရီယာလဲပါနေတာမို့ ငါးတစ်ကောင်မှ မရသေးတဲ့ကိုယ့်အဖြစ်ကို ဂျောင်ဂုရှက်လဲရှက်၊ဒေါသလဲထွက်မိသည်။