YOU BROKE ME FIRST [ COMPLETED ]

TEN

«𝙐𝙉𝙄𝘾𝙊𝘿𝙀»

ဒီသုံးလေးရက်အတွင်း ဂျောင်ဂုက ထယ်ယောင်းတို့မြေးအဖွားအတွက် ထမင်း၊ဟင်းချက်ပြုတ်ရေးကို တာဝန်ယူပေးဖြစ်နေ၏ ။ မနက်မိုးလင်းတာနဲ့ တောင်ပိုင်းအိမ်မှာ တက်ကြွတဲ့ကြက်ဖကြီးလို ချက်ပြုတ်ပြင်ဆင်ခြင်း အမှုကိုပြုသည်။ ကျူရှင်ချိန်မစခင် မြေးအဖိုးနှစ်ယောက်အတွက် မနက်စာသွားပို့ရင်း သူပါတစ်ခါတည်း ဝင်စားလိုက်၏ ။ ထို့နောက် ဖိုးဖိုးအတွက် နေ့လည်စာကို ထယ်စောတို့အိမ်ဘက်မှာ ထားခဲ့ပြီး ထယ်ယောင်းကို ကျူရှင်တစ်ခါတည်း ခေါ်လာပေးရသည်။ နေ့လည်ခင်း ထမင်းစားနားချိန်တွင်တော့ မြောက်ပိုင်း ပြန်လွှတ်မနေတော့ဘဲ သူ့အိမ်မှာသာ ရေမိုးချိုး၊နေ့လည်စာစားရင်း အနားယူစေ၏ ။ ညစာကိုတော့ ညနေကျူရှင်ဆင်းချိန် ထယ်ယောင်းကို ပြန်လိုက်ပို့ရင်း တစ်ခါတည်း သယ်သွားပေးဖြစ်သည်။ သူကတော့ မြေးအဖိုးနှစ်ယောက်နဲ့ စကားစမြည်ပြောရင်း ညဘက်အိမ်ပြန်ရောက်မှသာ ညစာကို တစ်ယောက်တည်း စားဖြစ်ပါ၏။

ဒီနေ့လည်း ညနေကျူရှင်ဆင်းတော့ ထုံးစံအတိုင်း ထယ်ယောင်းနဲ့ တစ်ခါတည်း မြောက်ပိုင်းအိမ်ကို လိုက်လာခဲ့လိုက်သည်။ ဖေဖေ့ရက်လည်နေ့မို့ သတိတရသွားတွေ့ရန်အတွက် ထယ်ယောင်းကို အဖော်ခေါ်သွားမည့်အကြောင်း ဖိုးဖိုးဆီမှာ ခွင့်တောင်းဖို့ကလဲ ရှိသေး၏။

ဂျောင်ဂုက စာအုပ်တွေမနည်းမနော ထည့်ထားတဲ့ ကျောပိုးအိတ်တစ်လုံးကို ပုခုံးတစ်ဖက်တည်းမှာလွယ်ပြီး ထမင်း၊ဟင်းဘူးတွေပါတဲ့ခြင်းကို လက်တစ်ဖက်က ဆွဲထားရပေမယ့် သူ့ဘေးကထယ်ယောင်းမှာတော့ သယ်စရာဆိုလို့ ခြေဖဝါးအောက်က ဖိနပ်တစ်ရံသာရှိသည်။

ဆရာသမားက ကော့တော့ကော့တော့နဲ့ ရှေ့ကလျှောက်သွားလိုက် ၊ ခပ်လှမ်းလှမ်းရောက်ပြီဆို ဂျောင်ဂုဘက်ကို မျက်နှာလှည့်လာပြီး နောက်ပြန်ကြီးနဲ့ သုံးလေးလှမ်းလောက် လျှောက်ပြလိုက် လုပ်နေသေး၏။

"သက်လှယ် ၊ ချော်လဲပါဦးမယ်ကွာ ရှေ့ကိုတည့်တည့်ကြည့်လျှောက်ပါ"

ထိုသို့ပြောလိုက်တော့လဲ ချက်ချင်းစကားနားထောင်ပြီး အိမ်ရောက်သည်အထိ တန်းတန်းမတ်မတ် လျှောက်သွားတော့တာပင်။ စကားတစ်ခွန်းကို ဘယ်တော့မှ နှစ်ခါထပ်ပြောစရာမလိုအောင် မြေဝယ်မကျ နားထောင်တတ်တဲ့အကျင့်ကလဲ ထယ်ယောင်းနဲ့ပက်သက်ပြီး ဂျောင်ဂုသဘောကျမိတဲ့အချက်တွေထဲက တစ်ခုအပါအဝင် ဖြစ်ပါ၏။ အိမ်ရောက်တော့ ကျောပိုးအိတ်နဲ့ခြင်းတောင်းကို နေရာတကျထားရင်း ဖိုးဖိုးဆီမှာ မြန်မြန်ခွင့်တောင်းရသည်။ ဘာရယ်မဟုတ်.. မိုးချုပ်သွားရင် ထယ်ယောင်း ကြောက်စိတ်ဝင်မှာ စိုးသောကြောင့်ပင် ။