YOU BROKE ME FIRST [ COMPLETED ]

FINAL : B

[ UNICODE ]

ဆေးရုံအခန်းထဲက လူနာခုတင်ပေါ်မှာ လဲလျောင်းနေတဲ့ မောင့်မေမေ..။ တစ်ချိန်တုန်းက မောင်နဲ့သူ့အား ဒီအမျိုးသမီး မကြည်ဖြူနိုင်ခဲ့ခြင်းမှာ သူက မောင့်နည်းတူ ယောက်ျားတစ်ယောက် ဖြစ်နေ၍လား ၊ ဥစ္စာပစ္စည်း နွမ်းပါးချို့တဲ့၍လား ၊ မြို့ပြနဲ့ အလှမ်းဝေးကွာတဲ့ တောကြိုဇနပုဒ်က ဖြစ်နေ၍လား ..ဒါမှမဟုတ် မောင့်လိုပညာတတ်ကြီး မဟုတ်၍များလားဟု ထယ်ယောင်း အမျိုးမျိုး စဉ်းစားခန်းဖွင့်ခဲ့ဖူးသည် ။ သို့သော် ထိုမေးခွန်းရဲ့အဖြေကို သူကိုယ်တိုင် မိဘဖြစ်လာကာမှ အလိုလို နားလည်လာခဲ့တာပင် ။

"ကျွန်တော် အန်တီ့ကို ဘယ်တုန်းကမှ မမုန်းခဲ့ပါဘူး..၊ မောင့်အတွက် အကောင်းဆုံးဖြစ်မယ်ထင်လို့ လုပ်ခဲ့မိတာတွေမှန်း ကျွန်တော် နားလည်တယ် ၊ မိခင်တစ်ယောက်ရဲ့အတ္တကြောင့် တစ်ဖက်သားကိုထည့်တွက်ဖို့ သတိမရတော့ဘဲ တစ်ကိုယ်ကောင်းဆန်ခဲ့မိတယ် ဆိုတာရောပေါ့.."

မျက်ရည်တွေဝဲလာတဲ့ မောင့်မေမေဟာ ခုတင်ဘေးမှာ ရပ်နေတဲ့ ထယ်ယောင်းလက်ကလေးကို အသာဖမ်းဆွဲလို့ ခပ်ဖွဖွဆုပ်ကိုင်လာသည် ။

"အန်တီ သိပ်ကိုဆင်ခြင်တုံတရား မဲ့ခဲ့ပါတယ် ထယ်ယောင်းရယ်.. ၊ အခုတော့လေ.. ဂျွန်နဲ့ ဒီကလေးလေးတွေအပေါ်မှာထားတဲ့ မင်းရဲ့မေတ္တာတွေ ၊ အနွံတာခံပေးဆပ်တာတွေကို အန်တီမြင်လိုက်ရတော့.. ကိုယ့်အမှားကို ပိုမြင်ပြီး အတော်လေး အရှက်ရမိတယ်"

ပိစိလေးနှစ်ကောင်ကို လက်တစ်ဖက်တစ်ချက်စီကဆွဲလို့ ခပ်လှမ်းလှမ်းမှာ ဆရာဝန်နဲ့ စကားပြောနေတဲ့ မောင့်အား ထယ်ယောင်း လှမ်းကြည့်လိုက်ပြီး..

"လူတိုင်းကတော့ အမှားနဲ့မကင်းကြပါဘူး အန်တီ ..၊ အရေးကြီးတာက အမှားကနေ သင်ခန်းစာယူတတ်ဖို့ပဲ မဟုတ်လား..၊ ကျွန်တော်ကိုယ်တိုင်လဲ အတိတ်ကို ဖက်တွယ်မထားသလို..၊ အန်တီ့ကိုလဲ ကျွန်တော်တို့ မိသားစုနဲ့အတူ သာယာပျော်ရွှင်တဲ့ဘဝလေး ပိုင်ဆိုင်သွားစေချင်တယ်"

ထိုအခိုက် သူတို့အနားကိုပြေးလာတဲ့ Leon လေးက လူနာခုတင်ပေါ်က အိပ်ယာခင်းစကို လက်ကလေးနဲ့ဆုပ်လို့ ခြေဖျားထောက်ပြီး သူ့ဖွားဖွားကို လှမ်းကြည့်သည် ။