YOU BROKE ME FIRST [ COMPLETED ]

EIGHT

«𝙐𝙉𝙄𝘾𝙊𝘿𝙀»

"မြေး..ထယ်စောကို သွားတွေ့လိုက်ဦး..၊ သူ့ခမျာ တစ်ညလုံးလဲ မအိပ်ထားဘူး ၊ မိုးမလင်းခင်တည်းက မြေးကိုလိုက်ရှာမယ် တကဲကဲလုပ်နေတာ"

အိမ်အဝင်ဝရောက်တာနဲ့ ဖိုးဖိုးက ထိုသို့ပြောလာတော့ သူ့အားခွင့်တောင်းသလို လှည့်ကြည့်လာတဲ့ထယ်ယောင်းကို ဂျောင်ဂု ခေါင်းအသာညိမ့်ပြလိုက်၏ ။ ခွင့်ပြုချက်ရသွားသည်နှင့် "လှစ်ခနဲ"ဆိုသလို တစ်ဖက်အိမ်ထဲကို ပြေးဝင်သွားသူကြောင့် ဂျောင်ဂုထံမှ "ဖြေးဖြေး ချော်လဲမယ်" ဟူသော စိုးရိမ်တကြီးသတိပေးသံ ထွက်လာသည်အား ဖိုးဖိုးက သဘောကျသလို ပြုံးသည်။

နှစ်ယောက်သား အိမ်ရှေ့ကွပ်ပျစ်မှာဝင်ထိုင်လိုက်ပြီး အတန်ကြာသည်အထိ စကားမပြောဖြစ်ကြသေး ။ ဖိုးဖိုးက အဝေးတစ်နေရာကို ခပ်ဆွေးဆွေးငေးကာ တစ်ခုခုကိုပြောဖို့ အားယူနေသလိုမျိုး ဂျောင်ဂုခံစားရ၏ ။ ထယ်ယောင်းကိုလည်း တမင် ပ,ထုတ်လိုက်မှန်း သူရိပ်မိပါသည်။

"ဆရာလေးကို ကျုပ်ဘယ်က စပြောရမှန်းတောင်မသိတော့ပါဘူးဗျာ.."

စကားအဆုံး ဖိုးဖိုးက သက်ပြင်းတစ်ချက်ရှိုက်၏။ ဂျောင်ဂုလည်း တိတ်တဆိတ်နေ၍သာ ဖိုးဖိုးဆက်ပြောလာမည်ကို နားစွင့်နေလိုက်ပါသည်။

"ကျုပ် အရင်ဆုံးတစ်ခုလောက်တော့ မေးပါရစေ ဆရာလေး"

"ဟုတ်ကဲ့ဖိုးဖိုး မေးပါ"

"မနေ့ညက .. မြေးငယ်နဲ့ ဘယ်အတိုင်းအတာထိများ.."

အုပ်ထိန်းသူတစ်ယောက်အနေနဲ့ ထိုမေးခွန်းအား အဆုံးထိ ဆက်မေးဖို့ရာ ဖိုးဖိုးက အတော်လေးမျက်နှာပူနေဟန်တူပါ၏။

"ဖိုးဖိုး စိုးရိမ်နေတဲ့အရာကို ကျွန်တော်ကောင်းကောင်းနားလည်ပါတယ် ၊ စိတ်မပူပါနဲ့ ဖိုးဖိုး ၊ အခုချိန်ထိ ကျွန်တော် ထယ်ယောင်းအပေါ် ဘာမှကိုယ်ထိလက်ရောက် လွန်ကျူးထားတာမရှိသေးပါဘူး ၊ အဲ့ကိစ္စနဲ့ပတ်သက်ပြီး ကျွန်တော် စိတ်လဲမလောသလို .. အချိန်လဲကောင်းကောင်းယူဦးမှာပါ ၊ ကျွန်တော်သူ့ကို မြတ်နိုးတာမှာ တဏှာမပါဘူးလို့ငြင်းရင် လိမ်ရာကျနိုင်ပေမယ့် ၊ မေတ္တာတရားက ရာခိုင်နှုန်းအများကြီး ပိုပါတယ်"