YOU BROKE ME FIRST [ COMPLETED ]

TWELVE

«𝙐𝙉𝙄𝘾𝙊𝘿𝙀»

*ကျုပ် ဘယ်ကစပြောရမှန်းတောင်မသိတော့ပါဘူးဗျာ.. မြေး..မြေးငယ်လေးကလေ*

*မောင်!!  သွေး.... သွေးတွေ... အားးး!!!*

"သက်လှယ်!!!"

ဂျောင်ဂု အိပ်ပျော်နေရာမှ အလန့်တကြား ထထိုင်လိုက်မိသည်အထိ အိပ်မက်ကမ္ဘာမှ အတင်းရုန်းထွက်လာခဲ့ရ၏။ ဒါတွေက  အိပ်မက်သပ်သပ်မဟုတ်တဲ့ အမှန်တရားတွေဆိုတာကို သူသာလျှင်အသိဆုံး ။ ခန့်မှန်းကြည့်ရင် ထယ်ယောင်းရဲ့လက်ရှိအသက်အရွယ်အရ သိပ်မကြာလောက်တော့တဲ့အချိန်အတွင်းမှာ ရင်ဆိုင်လာရနိုင်တဲ့ အခြေအနေတွေပင် ..။ Website အသီးသီးကနေ သူရှာဖတ်ကြည့်ထားတာတွေနဲ့ သူနာပြုဂရေစ့်ဆီမှာ မေးမြန်းတီးခေါက်ထားမိသလောက်တော့ Intersex နဲ့ပတ်သက်ပြီး သူ့မှာ ဗဟုသုတအတော်လေးစုံနေပြီ ။ ကာကွယ်စောင့်ရှောက်ပေးဖို့ အဆင်သင့်အနေအထားမှာဆိုပေမယ့် ခန္ဓာကိုယ်ကတုန့်ပြန်တဲ့ မူမမှန်မှုတချို့ကို ထယ်ယောင်း ပထမဆုံးကြုံရတဲ့အခါ အနားမှာသူမရှိဘဲဖြစ်နေမှာကို စိုးရိမ်မိပါသည်။

"မောင်.. ၊ဘာ..ဘာဖြစ်လို့လဲဟင် .. ၊ လန့်နိုးတဲ့အထိတောင် မောင်ရယ်.."

သူ့နဖူးစပ်ဆီမှ ချွေးစတို့အား လက်ဖမိုးထိဖုံးနေတဲ့ အင်္ကျီအနားစလေးနဲ့ ခပ်ဖွဖွဖိသုတ်ပေးရင်း သောက်ရေအေးတစ်ခွက် ကမ်းပေးလာသူမှာ စိုးရိမ်တကြီး..။ ရွာကိုပြန်ရောက်ရောက်ချင်း ဖိုးဖိုးဆီခဏဝင်နှုတ်ဆက်ပြီး တောင်ပိုင်းအိမ်ကို ပြန်ရောက်တယ်ဆိုရင်ပဲ သူတို့ခရီးပန်းပြီး အိပ်ပျော်သွားကြတာပင်။ ထယ်ယောင်းကတော့ သူ့ထက်အရင်နိုးနှင့်နေပုံရ၏။ ရေခြောက်ကာစ ဆံပင်လေးတွေဆီမှ ခေါင်းလျှော်ရည်နံ့သင်းသင်းကို တစ်ဝကြီးရှူရှိုက်ရင်း သူ့စိတ်အစဉ်အား တမြေ့မြေ့ကြည်လင်စေလိုက်သည် ။ ဟိုတစ်လောကလို ဝက်ခြံအနီစက်လေးတွေ မရှိတော့တဲ့ မျက်နှာနုနုက ဝင်းမွတ်ကာကြည်ကြည်လင်လင်နှင့် ။ အော်စတင်နဲ့လူကြုံမှာပေးထားတဲ့ Skin Care ပစ္စည်းတွေက ထယ်ယောင်းငယ်နဲ့ အဆင်ပြေသွားပုံပါပင် ။ ဂျနီဗာရောက်ရင် လုပ်ရမယ့် To Do List ထဲ ထိုပစ္စည်းတွေ အဆင့်သင့်ပြန်ဝယ်ပေးထားဖို့ကိုပါထည့်ဖို့ သူတွေးလိုက်မိသည်။