YOU BROKE ME FIRST [ COMPLETED ]

THREE

[UNICODE]

ဂျောင်ဂု၊ အော်စတင် ၊ ချာလီနဲ့မာရီယာတို့လေးဦးက ဇူးရစ်ချ်မြို့မှာရှိတဲ့ ETH Zurich မှာ တက္ကသိုလ်အတူတူတက်ရင်း ခင်မင်ခဲ့ကြပေမယ့် မေဂျာတွေတော့ မတူ။ ဂျောင်ဂုက architecture ၊ အော်စတင်နဲ့ချာလီက Natural Sciences ဖြစ်ပြီး မာရီယာကတော့ Engineering မေဂျာကဖြစ်သည်။

တက်သစ်စ မော်ဒယ်မလေးတစ်ဦးဖြစ်သည့်အလျောက် ခါးသေးတင်ချီပြီး ခြေတံလှလှလေးတွေရှိတဲ့မာရီယာက ဂျောင်ဂုတို့တက္ကသိုလ်က ကျောင်းသားတွေ ပါးစပ်ဖျားမှာ အတော်လေးရေပန်းစားတဲ့ အလှနတ်ဘုရားမတစ်ဦး ဖြစ်ပါ၏။အနည်းငယ် ထူးဆန်းသလိုတော့ရှိပေမယ့် ထိုခြေတံလှလှလေးတွေကြောင့်သာ အနှီပြင်သစ်ကပြားမလေးကို ဂျောင်ဂုစိတ်ဝင်စားခဲ့တာ ဖြစ်သည်။

ဇူးရစ်ချ် မှာကျောင်းတက်စဉ်က မာရီယာနဲ့ဂျောင်ဂုက သူငယ်ချင်းအဆင့်လဲ မကသလို ရည်းစားလဲမကျတဲ့ ခပ်ရှုပ်ရှုပ်ဆက်ဆံရေးမျိုး ရှိခဲ့တာဖြစ်၏။ နှစ်ဦးကြား ခေါင်းစဉ်မယ်မယ်ရရ တပ်လို့မရတဲ့ အနေအထားမှာ ဂျောင်ဂုကလဲ ရှေ့ဆက်မတိုးသလို မာရီယာသည်လဲ ထိုအခြေအနေအား အထွန့်တက်ခြင်းမရှိခဲ့။ တက္ကသိုလ်ပတ်ဝန်းကျင်မှာတော့ သူမတို့နှစ်ဦးက အချိန်တန်ရင်လက်ထပ်ယူကြမယ့် အားကျစရာ ချစ်သူစုံတွဲလေးအဖြစ် လူသိများပါ၏။

ဂျောင်ဂုဘက်ကသာ တရားဝင်ကမ်းလှမ်းလာရင် ချက်ချင်း ခေါင်းညိမ့်လက်ခံမယ့် အရိပ်အယောင်တွေကိုလည်း မာရီယာ့မျက်ဝန်းတွေကတဆင့် အတိုင်းသားတွေ့နိုင်သည် ။ ဂျွန်ဂျောင်ဂုဆိုတာ ရုပ်ရည်၊ပညာအရည်အချင်း၊ချမ်းသာကြွယ်ဝမှု ဘယ်ရှုထောင့်ကပဲကြည့်ကြည့် အဘက်ဘက်ကပြီးပြည့်စုံနေတဲ့ မိုးကျရွှေကိုယ်မို့ မာရီယာလက်မလွှတ်နိုင်တာလဲ မဆန်းပါပေ။

မာရီယာ့မိဘတွေဘက်က နှစ်အိမ့်တစ်အိမ် ရွှေလမ်းငွေလမ်း ဖောက်ချင်ကြသလို ဂျောင်ဂုမေမေကိုယ်တိုင် သဘောတူကြည်ဖြူထားတဲ့ တစ်ဦးတည်းသော ချွေးမလောင်းဟာလဲ "မာရီယာ"သာဖြစ်ပါ၏ ။ မာရီယာက ငယ်ရွယ်သည့်အလျောက် သွက်လက်သလို ၊ အကင်းလည်းပါးသည် ။ လူတစ်ယောက်ကို ဘယ်အချိန်မှာ၊ဘယ်လိုနည်းနဲ့ ကိုင်တွယ်လိုက်ရမလဲ ကောင်းကောင်းသိ၏။ ဥပမာ အလှအပကြိုက်တဲ့ ဂျောင်ဂုမေမေဆီလာတွေ့တိုင်း သူမတို့ကုမ္ပဏီကထုတ်သည့် တန်ဖိုးမြင့် အလှကုန်ပစ္စည်းတွေ လက်ဆောင်ယူလာပေးတာမျိုး ၊ ဂျောင်ဂုနဲ့အတူရှိချိန်တိုင်း ဂျောင်ဂုသဘောကျတဲ့ ခြေတံသွယ်တွေကို မြင်သာပေါ်လွင်စေတဲ့ အဝတ်အစားတွေသာ ရွေးချယ်ဝတ်ဆင်တတ်တာမျိုး..။