YOU BROKE ME FIRST [ COMPLETED ]

FOURTEEN

«𝙐𝙉𝙄𝘾𝙊𝘿𝙀»

[[အနည်းငယ်ရိုင်းစိုင်းသော စကားလုံးအသုံးအနှုန်းများပါဝင်သည်မို့ အမြင်ရိုင်းသွားနိုင်တာကြောင့် ကြိုတင်အသိပေး တောင်းပန်အပ်ပါတယ်ရှင်]]

နောက်တစ်နေ့မနက်တွင် ဂျောင်ဂု အစီစဉ်ဆွဲထားသည့်အတိုင်း ဖိုးဖိုးနေတဲ့ လက်ရှိအိမ်ငယ်ကိုဖျက်ကာ ခိုင်ခိုင်ခံ့ခံ့၊တစ်ထပ်ပျဉ်ထောင်အိမ်တစ်လုံးကို ဆောက်ဖို့ စတင်ပြင်ဆင်ဖြစ်ကြသည်။ အရေးအကြောင်းဆို လှမ်းခေါ်အကူအညီတောင်းဖို့ရာ လွယ်ကူစေရန်အတွက် ထယ်စောတို့အိမ်ဘက်ကို အနည်းငယ်ပိုတိုး၍ ဆောက်ထား၏။ ရက် ၂၀ နီးပါးကြာမြင့်မှာမို့ ထိုအိမ်ဆောက်နေစဉ်အတွင်း ဖိုးဖိုးက ဂျောင်ဂုတို့ ဂျနီဗာကိုမပြန်ခင်အထိ တောင်ပိုင်းအိမ်မှာ အတူလိုက်နေမှာဖြစ်သည်။သူတို့ပြန်ရင်တော့ ထယ်စောတို့အိမ်မှာ ယာယီနေရမှာဖြစ်၏။

အစက ဂျောင်ဂုတို့ပြန်သွားတဲ့အခါ ဖိုးဖိုးအား တောင်ပိုင်းအိမ်မှာ ပြောင်းနေစေဖို့ စိတ်ကူးခဲ့သေးပေမယ့် ခြံအကျယ်အဝန်းနဲ့အိမ်အရွယ်အစားက ဖိုးဖိုးတစ်ယောက်စာအတွက် ကြီးမားလွန်းနေကာ ထယ်စောတို့အိမ်နဲ့လည်း အလှမ်းဝေးကွာသွားတာကြောင့် တစ်ခုခုဆို ဖိုးဖိုးတစ်ယောက်တည်း အခက်တွေ့နေမှာကိုစိုးရိမ်ရသည်မို့ အစီအစဉ်ကို ယခုကဲ့သို့ တစ်မျိုးပြောင်းလိုက်ရခြင်းသာ။

ရွာမှာ လျှပ်စစ်မီးရပေမယ့် မီတာခမဆောင်နိုင်လို့ မယူပဲနေကြရတဲ့အိမ်တွေထဲမှာ ထယ်ယောင်းတို့အိမ်လဲ ပါခဲ့သည်မို့ အိမ်အသစ်ဆောက်ပြီးရင်တော့ လျှပ်စစ်မီးပါ တစ်ခါတည်းယူဖို့ ဂျောင်ဂုဆုံးဖြတ်ထား၏။ ထယ်စောတို့အိမ်မှာပဲ နှစ်အိမ့်တစ်အိမ် ပေါင်းချက်စားကြတော့မှာမို့ ဖိုးဖိုးက အချက်အပြုတ် လုပ်စရာမလိုပေမယ့် အိမ်ထဲမှာ လျှပ်စစ်မီးရောင်နဲ့ လင်းလင်းကျင်းကျင်းနေလို့ရအောင် စီစဉ်ထားခြင်းဖြစ်သည်။ ဖိုးဖိုးအတွက် သုံးစွဲစရိတ်ကိုတော့ ထယ်စောကတဆင့် ပို့ပေးရမှာမို့ ဒယ်ဂူမြို့ပေါ်တစ်ခေါက်တက်ကာ ဘဏ်အကောင့်ဖွင့်ဖို့ သွားလိုက်ရသေး၏။ဂျနီဗာကနေ တစ်ခုခုဆို လှမ်းဆက်သွယ်ဖို့ရာအတွက် အိမ်သုံးကြိုးဖုန်းနှစ်လုံးဝယ်ကာ တစ်အိမ်တစ်လုံးစီထားစေပြီး Video Call ပြောဖို့အတွက်တော့ Laptop တစ်လုံးနဲ့အတူ Wifi စက် ၊ Power Bank အစရှိတဲ့ စက်ပစ္စည်း တိုလီမုတ်စတွေပါမကျန် ဂျောင်ဂုတစ်ခါတည်း ဝယ်လာဖြစ်ခဲ့သည်။