YOU BROKE ME FIRST [ COMPLETED ]

FIFTEEN

[UNICODE]

ဂျောင်ဂုတို့ အိမ်ဆောက်တာ ငါးရက်မြောက်နေ့တွင် မိုးသည်းထန်စွာ ရွာသည်ကြောင့် အိမ်ဆောက်ခြင်းအမှုကို ခတ္တခဏရပ်ဆိုင်းထားရ၏။ အစကတည်းက သူတို့နှစ်ယောက်ခိုးပြေးတာကို ပြစ်တင်ဝေဖန်ချင်နေတဲ့ လူတွေအတွက်တော့ သဘာဝတရားကိုဆန့်ကျင်လို့ပဲ မိုးလေဝသဖောက်ပြန်သလိုလို ၊ မိုးနတ်မင်းကပဲ ဒဏ်ခတ်သလိုလို စသဖြင့် သွားပုတ်လေလွင့် ပြောစရာစကားရသွားတော့သည်။

ပျဉ်ပြားသီးသန့် သုံးတာဆိုရင်တော့ မိိုးရေထဲလဲ ဆောက်လုပ်ရေးကိုဆက်လုပ်သွားလို့ရပေမယ့် အိမ်အခြေနဲ့ခေါင်တိုင်တွေမှာ အုတ်နဲ့ဘိလပ်မြေလောင်းလက်စမို့ တို့လို့တန်းလန်းရပ်ထားရခြင်းသာ။ ဒီအတိုင်းသာ မိုးဆက်စွေနေရင်တော့ အညာလမ်းအခြေအနေနဲ့ ဂျောင်ဂုတို့လည်း ဒယ်ဂူမြို့ပေါ်တက်ဖို့ အခြေအနေဟန်မည့်ပုံမပေါ် ။ ဂျနီဗာပြန်ဖို့ သိပ်မလောသေးတာကြောင့် လေယာဉ်လက်မှတ် ဖြတ်မထားရသေးတာပဲ တော်သေးသည်ပြောရမည် ။

ဒီနေ့မနက်စော မိုးမရွာခင်ကတည်းက ထယ်စောတို့ဆီ အိမ်လည်ထွက်သွားတဲ့ဖိုးဖိုးက တော်တော်နဲ့ပြန်လာလို့ရဦးမည်မထင် ။ ဂျောင်ဂုကတော့ မိုးအေးအေးနဲ့ ခေါက်ဆွဲပြုတ်ပူပူလေး စားချင်ပါသည်ဆိုသော ထယ်ယောင်းကြောင့် မီးဖိုချောင်ထဲမှာ လုပ်စရာအလုပ်ရနေ၏ ။ ဂျောင်ဂုနောက်ကျောကိုမှီရင်း နောက်က တကောက်ကောက် ကပ်လိုက်နေတဲ့ ကောင်လေးက အိပ်ချင်မူးတူးမို့ မျက်လုံးတောင် ကောင်းကောင်းမပွင့်သေးတဲ့အခြေအနေ ။ အစပ်သိပ်မစားနိုင်တဲ့အပြင် အစားလဲရွေးတဲ့ထယ်ယောင်းက ထုံးစံအတိုင်း လက်ညှိုးတစ်ထိုးထိုးနဲ့ ခေါက်ဆွဲပြုတ်ထဲ ဟိုဟာထည့်မယ် ၊ ဒီဟာမထည့်ဘူး စသဖြင့် ညွှန်ကြားတတ်သေး၏။ ခေါက်ဆွဲတစ်မျိုးတည်းနဲ့ ဗိုက်မဝမှာစိုးသည်ကြောင့် ဂျောင်ဂုက ကြက်တောင်ပံကိုပါ ဆော့စ်အနှစ်လေးနဲ့ ကြော်ထားပေးလိုက်သည်။

"သက်လှယ် .. မောင့် ဖုန်းလာနေတယ်ထင်တယ်"

Silent လုပ်ထားတာကြောင့် Vibration အသံ တဒူဒူကိုသာကြားရပေမယ့် ဂျောင်ဂုက သတိကြီးသူမို့ ဖုန်းလာနေမှန်းတန်းသိသည်။ သူ့ကိုဖက်ထားရာကနေ ဖုန်းသွားယူပေးတဲ့ကောင်လေးက ခဏအကြာ အနားကို အပြေးကလေးပြန်ရောက်လာ၏။ ဂျောင်ဂု ကြည့်လိုက်တော့ ချာလီ့ဆီက FaceTime call ခေါ်လာတာ ဖြစ်သည် ။