خاتم زواج

البارت الثاني

خاتم زواج
البارت الثاني
بقلم.. هند الصالحي
......................

تصورت انه من الصعب ان انساك يوما .بعيدا عنك عشت حياة صعبة تهديني كل يوما جرح ودمعة . بدونك مرت ايامي دون ان اتذكر كيف نسيت حبك/ هند
................
سناء... هلووو رجعت من جديد حتى أفتح نافذة على حياتي الي طال فصل شتاءها لعل اشعة الشمس تشرق وتنير حياتي وحياة كثير من البنات الي كل حلمهم شوكت يتزوجون..
الزواج كلمة تحمل كثير معاني وحتى نعيش هذه المعاني بكل حذافيرها ممكن ان نفقد اهم مايملك الأنسان وهو كرامته ويستسلم للذل والأمر الواقع او نثور على كل شي ونكسب كرامتنا ومعاها كلمة مطلقة كهدية....
وأحنا بطريقنا لقرية بيت جدي مرة اسرح بخيالي ومرة ادردم بصوت ناصي
هسة لو أدري ليش الموظفين يتقاعدون الدولة ترتاح واحنا نتعب يعني منا وجاي الوالد راح يستقر بيت جدي.. صبرك يارب

عادل... ولچ سناء شبيج ادردمين وية روحچ ترى سمعتج
سناء.. لا يابا ماكو شي بس أكول ياترى جو رمضان شلونه بيت جدو وراح يكون الصيام صعب سهل واحنا ندگ شغل

سهيلة.. ولچ الي يسمعچ يگول الخبز والطبخ كله عليچ هو انت بس تنظفين سكتي وخلي يومچ يعدي

سناء.. يا أمي ترى أني كل عمري 15 سنة يعني شلون تريدين أخبز

عادل.. و15 سنة صغيرة ولچ بنات عمج كلهن تزوجن بال15 وهسة شوفيهن شايلات بيوت وهذني خواتج شحلاتهن انت شبيچ مايعة

سناء.. يبووو على يومي شراح يخلصني

سهيلة.. كافي ولج سكتي

سناء.. سكتت وأصلا راح أنام من نوصل گعدوني..... أنسحبت من المناقشة وغمضت الطريق تقريبا ساعتين من مركز المحافظة لبيت جدي.. بعد مدة امي گعدتني

سهيلة... سناء سنو گعدي ماما وصلنا

سناء.. فتحت عيوني وصلنا بيت جدو.. أني كلش مختلفة بطبيعتي وطموحي عن بنات عمامي وخوالي بلبسي بطبيعتي بهواياتي وكنت بداخلي رافضة ومحتجة على كل العادات والتقاليد الي تحاوطني بس للأسف المقاومة والأحتجاج كان مرفوض والأيد الوحدة ماتصفگ.... وصلنا لبيت جدو وباجر أول يوم رمضان الي راح نكمله هنا وية العائلة الكريمة أني وأمي وأبويه وأخواني الشباب ماعدا بسام بقى بالبيت هو وزوجته وأطفاله لان عنده دوام وبالعيد يجيبهم وينظم للجمع الغفير.. نزلنه واخواني نزلوا الجنط والغراض وبدٱت فقرة السلام ورحمة الله والبوسات الي ماتخلص راح تبدي من جدو لحد اصغر بنت عم يبووو 200 نفر لازم اسلم عليهم... وبعد ماخلصت فقرة السلام جديتي أم أبوية نطقت بكلمة سببتلي رعب

الجدة... هلا بسنيوه الغالية كبرانة وصايرة شحلاتج والله ياعادل أظن راح يصير عدنا عرس على العيد

عادل... ها حجية شنو لأزم لاگية عريس لسنيوة هههههه

سناء.. يمعودة جدة ياعرس اني بعدني صغيرة خلي افتهم من حياتي يله مو كافي اسمي الي لاعبة بي طوبة