خاتم زواج

الشخصيات الحقيقية للقصة

الشخصيات الحقيقية للقصة
لقصة خاتم زواج
بقلم هند الصالحي
......   ......       
مخلد...مقتبسة من ثلاث شخصيات
الاول انسان صاحب منصب زنگين مغرور جدا برتبته وفلوسه متزوج بنيه اقرباءه.. كل تعامله غلط وعياط وصياح ودائما يتباهه بكونه حاصل على شهادتين باختصاصات مختلفة.. عنده 6 جهال بنات وولد وكانوا يخافون منه اكثر مايحبونه بسبب تعامله وياهم.. بيوم التقى بموظفة ويايه بنفس دائرته وتزوجها بحجة زوجتي الاولى مخربطة ومامرتبه ومامرتاح وياها ومن تزوج جانو ولده وبناته شباب.. وكل شي ممنوع على الزوجة الاولى تسوي كان متاح للزوجة الثانية.. والي خلفت من عنده ووبنالها فلة يم بيت اهلها... رغم الزوجة الاولى احلى من الزوجة الثانية بس الحظ يلعب دور

الشخص الثاني متزوج من بنية اقرباءهم وعايشين بيت اهله عنده 5 اطفال وهماتين عسكري وبيوم فاجأ اهله بانه يحب بنية ومتقدملها.. وتزوج بحجة الزوجة الاولى ماتهتم بنفسه ماتلبس ملابس نوم وملتهية بس بالجهال.. ومن تزوج الزوجة الثانية الي هي موظفة ومن عائله غنية وعدهم مناصب  راسا طلعها بيت وحد.. فالاولى اصرت انه يطلعها هي هم بيت وحد.. الزوجة الاولى زعلت فترة وبعدين استقرت بيتها وبدت تنافس ضرتها بالخلفة

الشخص الثالت ايضا متزوج بنت عمه وهماتين بدائرته عاش علاقة حب وتزوجها وبنفس الحجة. بس زوجته الثانية ماعدها اطفال والاولى حست على نفسها وبدات تغير وتكشخ وحاليا هو حسب ماسمعت يهتم بالاولى اكثر من الثانية

بلال... شخص خطب بنية وبعد سنة من العقد طلگها بدون سبب

ثناء... شخصيتها هي نفسهن زوجات الابطال الثلاثة الي شرحتها لكم والي يمثلون مخلد ماعدا بنية تزوجت من عمر ال15 سنة وحبت تكمل تعليمها بس عمتها حاربتها ولان تاخرت بالخلفة عمتها رادت ابنها يتزوج والولد بعد الحب الكبير  ساند امه بتصرفها البنية طلبت الطلاق واطلقت وكملت امتحان السادس وحاليا داتدرس بكلية الهندسة

سناء.. شخصتين بنية انخطبت سنة واطلگت بدون سبب.. وهي نفسها اخوها توفى باحد انفجارات  بعقوبة
والبنية الثانية تقدملها ولد شيعي وامه رفضتها لان سنية.. وبعد فترة هم تزوجت ولد شيعي. بس شالها بالصلوات ومعيشها مثل الاميرات .. وهم كملت كليه ومايقبل تتعين....
هذه الاحداث الحقيقية للابطال.. انا جمعتهم وقدمتلكم القصة بهذا الشكل.. الاحداث والشخصيات حقيقية والحوارات بقلمي

احلى تحية للجميع💕💕😍💗