خاتم زواج

البارت الثامن عشر

خاتم زواج
البارت الثامن عشر
هند الصالحي
.....................
علينا ان نعترف ان الخلاف سببه كلانا
واضعنا ايامنا الجميلة بجدال انت ام انا
من يمسك القلم ويخط الحدود العالية بيننا ؟
سؤال يحتاج لوقفة لثورة ضد البعد ضد الخلاف وليس ضدنا
نحن قررنا ان نعشق نحب ونكمل بعضنا
بالحب والثقة وليس بالخلاف والجدال سنحافظ على قرارنا /
.............................
ماذا حل بكل الحب الذي اكنه لك وبلمح البصر انتهى
وكيف ينتهي ان كان حبا وليس لحب حقيقي ان يتنسى
سؤال يدور في خاطري وليس لالمي من منتهى
ابكيتني كثيرا بهجرك وجعلتني ادفن قلبي بالثرى
واصبح كبيت مهجور تزينه خيوط العنكبوت وبعض مما يسمى بالذكرى..... بقلمي هند
..................................     
مجتبى.. بعد مافاتحت حجي عادل وطلبت من عنده سناء للزواج ووعدني يجاوبني.. أني انتظرت أسبوع وماكو خبر أسبوعين وماكو  فقررت اروح للكوت احچي ويه عمامي وابلغهم بهاي الخطوة وبلكت يحچون وية العلوية والله يهديها... ولو كل شي متوقف على الضوء الأخضر الي استلمه من الحجي.. مر شهر وماكو اي جواب أني بقيت اسبوع بالكوت ورجعت بعد ماحچيت لعمامي رغبتي  بالزواج من سناء واسبوع داخلين بعركات ويه العلوية وبالأخير عمي الشيخ حجى وياها واقتنعت واتفقت وياهم أول مايوصلني خبر من بيت الحجي أنطيهم خبر ونتفق ونسويها خطوبة رسمي... مر شهر وماكو منهم أي خبر فقررت أني اتصل بالحجي لأن تأخروا بالرد هواية .

ثناء... اليوم گعدت من الصبح علاء ودالهم الريوگ للمستشفى وأني وديت الغدا ومن دخلت سمعت اخو مخلد وابوية يحچون

حجي عادل.. والله ياأبني شلون راج نبلغه بحالته ووضعه.. أكيد راح يتعب وحالته النفسيه تتعب

مؤيد.. اكيد عمي ماكو واحد يتحملها بعد ماكان بحيله يروح ويجي وأنوب منتظر ترقيه.. بس بهاي أصابته راح ينجبر لو يقدم تقاعد مبكر لو يتحول للقلم او دوام مكاتب

حجي عادل.. زين أبني الدكتور ماگالك اكو أمل يرجع من جديد.. ممكن يشفى 100 بالمية.. واذا يتعالج بره ممكن نطلعه بره ولا تشيلون هم الفلوس
مؤيد... والله عمي شتعالج اشو وحدة من الكليات وانذبت والثانية متضررة ولو نسبة قليله بس مو سليمة 100 بالمية... ووحدة من الطلقات مخترقة الصدر وكاسرة واحد من ضلوعه وربك رحمه  لخاطر عياله ومامخترقه الگلب چان تكوم بمكانه.. وشظية ضاربة الحوض.. والاصابة الأكبر الكسر برجله وماتعرف يگدر يمشي منا وغاد لو لا بس عمي الحجي بينا لا يطلع لعبد بشر أنا مااربد اخوي ينكسر چدام حريمه.. الدكتور يگول الخوف من ضربة الحوض ممكن تأثر عليه وعلى حياته الزوجيه

حجي عادل... خلي أملك بالله چبير ترى مخلد مو بس نسيبي هو  بمثابة ولدي والله يشهد ولو عنده طخات وية ثنيوة بس يبقون مرة ورجال ويحلون مشاكلهم بينهم .. وهذا الحجي بينا.. بس ماگالك يمتى يطلعونه

مؤيد.. والله ياعمي صار لهم  شهر ديحاولون يسيطرون على النزف الي يصير بصدره وهاي ابد مو خير مخلد مايگدر يتنفس بدون جهاز الأوكسجين لأن الضلع الي انكسر هم خادش الگلب وهماتين طابة شذرة عظم بالگلب ودانشوف اخر قرارهم شنو.. وان مافاد انا بس يتحسن اخذه واطلع بي لتركيا