خاتم زواج

البارت السادس

خاتم زواج
البارت السادس
بقلم.. هند الصالحي
.................  
وأنا استوطن أحضانك
وأسترق السمع لدقات قلبك
كنت أفرح وأنا اطلق لخيالي
العنان بأن دقات القلب المتسابق هي عشق
وحب كبير ستأخذني لمواجهة الدنيا
ووتحقيق احلامي.....لكني في خضم هذه الفرحة الطفولية نسيت ان الجرح الأكثر آلما والكسر الذي لايشفى يأتي دائما من الشخص الأقرب الى القلب والروح...... خاطرة بقلمي
..................................
سناء.. بعد ماسمعت كلام ثناء وشلون مخلد ظاربها لأن أني ونعمان خلينا شرط يله تم العقد وغالط علينا وهذا الشي مو من حقه وبلحظة اعصابي فارت لأن فعلا وصلت حدها ويه مخلد الي محد يعرف وجهه الحقيقي غير أني ونعمان لان ثناء مرات تحچيلي عن حياتها وياه وطبعه المر الي محد يعرفه عنه.. بلحظتها نسيت أني بعدني بملابس المهر والتسريحة وحتى ربطة ماخليت على شعري من الغضب ونزلت ركض ودخلت للمضيف گبل ونزلت على مخلد
مخلد انت شلون تغلط علينا اني ونعمان شنو شايف علينا وتگول ادبسزيه مامتربايين وشنو ظارب ثناء وتريد تمنعها تختلط بينا... اذا تعرف تمثل على الناس ومسوي نفسك أدمي فهاي السوالف مو عليه

نعمان.. بعد مراسيم المهر ماخلصت والخطار راحوا وأكو ناس بقت للعشى واكيد احنا وولد عمي ونسايبنا القدامى والجدد دانتناقش بينا على عرسي الي راح يكون بعد أسبوعين لأن بلال لازم يداوم بالكلية المرحلة الثالثة ولان هو هندسة نفط فلازم تطبيق وروحة وجيه لبغداد فيحتاج يبقى بقسم داخلي والحل الوحيد بحسب جدي الي هو شيخنا انه اني اتزوج واكون قريب من عمتي صراحة منطق غريب... المهم واحنا ننتظر العشا ماحسيت الا سناء طبت مثل العاصفة والمشكلة هاي البنية عمرها 15 سنة بس تملك عقل اكبر من عمرها والثورة تمشي بدمها وبطبتها الكل نصدم لأن بفستان الحفلة وحجاب ماكو ونزلت بالحجي على مخلد .. الي گدرت افتهمه مخلد غالط علينا وظارب ثناء يعني هذا الإنسان مايصير له حل.. مخلد بقى صافن لأن تفشل ماعرف شنو يحچي  وأول ماسكتت سناء أني طفرت على مخلد ولزمته من ياخته وجريته قوي
لك ماتستحي تظرب بنتنا بنص بيتنا مو كافي ماتتعب من الظرب شنو هي حيوان عندك.. وبأي حق تغلط علينا شايف شي حتى تگول ادبسزية أنت ليش ماتحترم

عادل... نعمان عوف الولد مو هيچ خلي نفهم السالفة أخذ اختك وطلعوا بره وبعدين نتفاهم

صفاء.. يابة شتتفاهم انت بصف مخلد لو بصف بنتك الي يومية مكتولة

الجد.. محد يدخل مرة ورجال بينهم... نعمان اسمع كلام أبوك وهير النسوان يصبن العشا ووراها نحل الموضوع...

نعمان.. أنتو من صدگ تحجون البنية عمرها 20 سنة وعدها خمس جهال كل سنة يلله توصل لبيت أهلها الظاهر يا حجي ثناء مو بنتك مخلد ابنك... بعد هاي المشادة جدي اصر على الخطار يتعشون واني اخذت سناء من أيدها وطلعت بره المضيف  ومن كثر الأعصاب المشدودة ماانتبهت على العباية الي على راسها ومن طلعنا سألتها ولج غضب هاي العبايا مالتمن