خاتم زواج

البارت ال25

خاتم زواج
البارت ال25
هند الصالحي....
..............................

يا سيِّدتي: أنتِ خلاصةُ كلِّ الشعرِ.. ووردةُ كلِّ الحرياتْ. يكفي أن أتهجى إسمَكِ.. حتى أصبحَ مَلكَ الشعرِ.. وفرعون الكلماتْ.. يكفي أن تعشقني امرأةٌ مثلكِ.. حتى أدخُلَ في كتب التاريخِ.. وتُرفعَ من أجلي الرّاياتْ
..............................
ثناء..... مر شهرين تقريبا على زواج سناء وهي بعدها بالكوت وبعد أسبوعين يبدي دوام الجامعات وترجع هنا تكمل المرحلة الاخيرة.. بالبداية تأثرنا عليها بس بدينا نتعود والوالده الچناين يمها وقبل اسبوع اركان هم خطب بنية من الگرايب البعيدين هو رايدها.. الحال بيني انا ومخلد على نفس الوضع.. اجازته المرضية خلصت وبعد يوميين يداوم. تحول دوامه لدوام مكتبي.. وزوجته هم كملت اجراءات نقلها لمقر الوزارة وراح يستكنون بغداد والي عرفته مشترين بيت 100 متر .. والحجية راح تبقى بمكانها يم بيت مؤيد.. بس مخلد هسة هو يتحرك ومايحتاج احد.. البارحة ساعة 11 وأنا بالمطبخ دگ تلفوني نصيت الجداري ورحت أخذت  الموبايل وفتحت خط بدون مااشوف منو.. الووو

حجي عادل... الووو سلام عليكم ثنيوة

ثناء... عليكم السلام حجي شلونك اخبارك الحجية شلونها

حجي عادل... زينة الحمد الله.. اگول ثنيوة شمسوية غدا اليوم

ثناء.. خير من الله حجي... سويت تشريب لحم اليوم علمود ابو جود من زمان فارضين عليه حصار علمود وضعه الصحي

حجي عادل... اها زين تستقبلون خطار يو لا

ثناء.. عين غطا وعين فراش حجي.. وحدك تجي لو انت والحجية

حجي عادل... لا وحدي وراح اجيب سمج مسكوف ويايه.. اليوم اربعاء واكل السمج بركة بوية

ثناء... تنورنا حجي.. انتظرك

حجي عادل.... ثيمالا بويه

ثناء.... سديت التلفون وية الوالد.. وعرفت اليوم يوم الحساب وية مخلد الحجي انتظر هواية.. وحتى الرزاله أنا هم اكلها مو بس مخلد.. المهم كملت الأكل ورحت بلغت مخلد

ابو جود.. ابو جود وينك

مخلد...هياتني ثناء تعاي

ثناء... هاي شدسوي ابو جود عوفهن أني ارتبهن

مخلد... ميخالف انت ماتعرفين شاخذ لبغداد وشأبقي هنا

ثناء.. ماشي بس الوالد هسة اتصل وگال راح اجي اتغده وياكم

مخلد.. اي هلا بي ينور بأي وقت.. زيدي من الأكل مادام وأذا محتاجة شي گولي.. الحجية ماتجي

ثناء.. لا گال وحدي اجي وگال اجيبلكم سمچ ويايه

مخلد.. هلا بيه ينورنا

ثناء.. تسلم ابو جود.. يله انا اروح اكمل الغدا
عفت مخلد ورحت كملت الغدا ورتبت ميز الطعام لان بيتي چبير وعندي هول خاص بس بأوقات الاكل.. وقت أذان الظهر واندگت الباب جود راح فتحها ودخل الحجي بعد الصلاه تغدينا والجو جان هادئ.. من كمل الحجي غدا اخذتله الخاولي ومن ديغسل گالي
ثنوة بويه فرغي  البيت