خاتم زواج

البارت ال19 الجزء الثاني

خاتم زواج
البارت ال19 الجزء الثاني
هند الصالحي
..............

مجتبى... ثاني يوم ب9 الأهل وصلوا وأنا اخذت أجازة من الدوام  دخلوا البيت وخطية لگيت سجاد متسوك مسواگ كامل للبيت وطبت العلوية بس مبين وجهه مال واحد ماخذي للأعدام وياخوفي لا تتعمد تخرب الأول والتالي..

هلا والله نورتوا البيت وديالى كلها

العلوية... منورة بأهلها يبن ديالى

مجتبى.. افا علويتنا زعلانه مني.. أنا ابن الكوت ومافد يوم انكر أصلي علوية.. واذا گلبي راد بنية من ديالى مو معناه اغير اصلي وداعتج بس تصير  القسمة اسويهاكوتاوية بعد شتردين

سجاد.. علوية بروح ابوي لاتكسرين خاطر مجتبى مو هذا بزر الگعدة والمدلل مالتج بعد شنو هلحچي

العلوية... الله كريم خلنا نروح ونشوف المحروسة وبعدين اقرر

زهراء.. علوية ساعة 10 نتهير تانروح لبيت حجي عادل لو شتگولين

علوية.. هسة ماكو روحة تونا واصلين من سفر انا اريد اسبح واطلع تعب الطريچ وأنت يله كل وحده على شغلها وحضرن الغدا عود منا للعصر الله كريم.. فطيم گومي حضري هدومي دااغسل

فاطمة.. تأمرين علوية

مجتبى.. العلوية مبين عليه راح تعلگها اليوم.. الله اليستر.. يا جماعة شفتوا الحرب الباردة الي شانتها عليه

سجاد.. مجتبى اهده انت تعرف العلوية كلما حچيت وياها باللين والهدوء تقتنع بس من تعاند يعني هاي الله كتبها عليك اهده

مجتبى. يمعود فشلة من الحجي أني كتلهم  الصبح يجونكم وهسة اجلتها للعصر والعصر الله يعلم شسوي

زهراء... لا تشيل هم وابقى هادئ هي متقصده تضوجك لان تريدك تنفعل حتى تزعل وتسحب نفسها من الموضوع..

محتبى... هو انا صابر دانشوف وين تريد العلوية.. البنات سون غدا وتغدينا وب1 العلوية ترخصت وطبت للغرفة نامت واني گوة لازم اعصابي يعني اذا ماتروح اليوم شلون اواجه حجي عادل شگول والله فشله وهم استغفرت رب العالمين.. وسكتت ب3 ونص گعدت العلوية

العلوية.. فطيم يافطيم وينج

فاطمة. هياتني علوية اامري

العلوية.. روحي سويلي  استكان چاي ثگيل وهيرن روحچن حتى نروح نشوف الخاتون

فاطمة.. من عيوني ادللي علوية

علوية ها الجن ربع ساعة ان ماجهزتن ماكو روحة  وباجر من الفجر انا راده لولايتي.. الهوه هنا يخنك

زهراء..الهوه يخبل هنا علوية لما جنتي تجين بالشهر وشهرين هنا يم حبيب الگلب

العلوية.. هسة تلوث مايمر من الخشم.. تگومن لو اغير الحچي