مامتى مجنونه

الحلقه الثالثه والعشرون

سافرت سناء منذ اسبوعين لزيارة إبنة أخاها فقد رزقها الله طفلاً وديعاً بعد معاناة سنوات من العلاج وكم كانت سعيده جداً لأجلها وقد أصر أخ سناء على ان تظل معهم لعدة أيام ولم يكن بنية أى منهم تركها لتعود لولا أنها أصرت على العوده وأخبرتهم أن هناك من ينتظرها فقد عوضها الله عن إبنها العاق الذى لا يتذكرها أبداً بسبب زوجته فقد كانت لها صديقة دراسه مقربه منها وشاء القدر أن تتزوج إبنتها بجوارها وتصبح هى وأسرتها الصغيره أنيساً لوحدة سناء ورغم السنوات التى مرت على جيرتها لها لكنها لم تخبرها أبداً أنها صديقة والدتها وأن والدتها حين علمت أوصت سناء عليها فلو علمت حياه بذلك ستعاند وتظن أن والدتها تضع لها رقيباً ولم يعلم بالأمر سوى عز ليطمئن لسناء ويترك حياه تصادقها فهى بكافة الأحوال ستصادق إحدى الجارات وقد تقع بمشاكل معها أو تستدرجها لتعلم أخبارها وتنشرها ووجود سناء منع ذلك فقد أصبحت الناصح الأمين لهما وحافظ لأسرارهما وكانت أماً لكليهما

أحست حياه بحركه بشرفة منزلها فخرجت لتجد سناء تدق بعصاها على الحائط فتهلل وجهها فرحاً لرؤيتها
- وحشتينى أوى أوى أوى كل دى غيبه
- يابكاشه دول اسبوعين بس
- كتار اوى دى رحمه وفارس هيفرحوا أوى كل يوم يسألو عنك
- حبايبى هما فين؟
- إمبارح كنت عند ماما وشبطوا يباتوا وماما ماصدقت قولتلها أحسن خليهم فرصه أروق وأشوف اللى ورايا من غير صريخ قبالهم بس إنتى غيبتى أوى قلقتينا عليكى
- بعد الشر عنك من القلق ياحبيبتى أصل البت بنت أخويا ولدت روحت أزورها مع إن وغلاوتك يابنتى مافيا حيل والسفر قطم وسطى بس عشان ميزعلوش واما روحت أخويا حكم راسه لازم تقعدى معانا يومين واليومين بقوا اسبوعين ولولاكم مكنتش رجعت دا الهوا هناك يرد الروح والقعده وسطهم هنا بس انا مبرتحش الا ف بيتى وانتو جنبى
- حبيبتى يانوئه
- عيب يابت دا أنا جده
- وإيه يعنى طب ياريتنى وأنا جده أبقى حلوه وعسلايه كده
ضحكت سناء لكلمات حياه المرحه : ههههههه عليكى ياحياه وعلى أيامك إنتى بتعاكسينى يابت
- وإماعاكستش القمر هعاكس مين هه
غمزتها سناء بخبث : عكسى عز ياختى
تلعثمت حياه بخجل : أأ جج جرى إيه يانوئه
- إهيه هو عيب ولا حرام دا جوزك يامنيله
- وأنا قولت حاجه بس إنتى عارفه مبحبش أتكلم ف الحاجات دى
- ربنا يكملك بعقلك يابنتى أكتر حاجه تزين الست حيائها بنات الأيام دى الخشا ميعرفلهومش سكه وفى اللى عامله وش كسوف وتوت ما إتجوزت رمت برقع الحيا ومبيتكسفوش وهما بيكشفوا ستر بيوتهم
- مبحبش النوعيه دى بصراحه ولا الكلام ده مش لازم تبهرنا بغرامياتها هيا وجوزها وتخلينا نتخيل حاجات تموع النفس
- ربنا يهدى يابنتى المخاخ المفرقعه كتير
- تصدقى فكرتينى بالفرقعه دى واحده صاحبتى غضبت من جوزها بسبب اغانى الاطفال
رفعت سناء حاجبيها متعجبه مما تقوله حياه فتابعت حياه سرد الموقف
- آه مابقولك كده البت بنتها قاعده تغنى بابا جى إمتى جى الساعه سته راح ابوها باصص لامها وبيضحك ويقولها شايفه حتى ف الاغانى مواعيدنا مظبوط مش انتو ماما زمانها جايه وياعالم جايه إمتى ودى زى ما تكون مستنياه يكح بس راحت مفتوحه فيه آه مهى ماما بتشيل دا وتزعق لدى وتشترى من هنا وهنا وحرق دم مع البياع والعيال وقطط الشوارع وكلابها كمان مش بابا اللى شغله بمواعيد يرجع باشا يلاقى اللى تخدمه وممرمطها معاه ومش عاجب بيتنطط عليها وهيا شاربه الحزن معاه
- يوه يوه يوه إيه ده كله دى زى اللى ماصدقت
- مش بقولك وعنها ولمت هدومها وخدت العيال وسبته قاعد ياقلب أمه مبلم ومش فاهم إيه اللى شيطها كده
- بس أنا بيتهيألى فى سبب تانى ورا صرعها ده
- بينى وبينك أمه كانت حارقه دمها يومها هدت حيلها شغل وقعدت تبرطم بكلام ملوش لازمه عشان تخليها تغلط فيها ويمسكوا ف خناق بعض وتشكيها لجوزها بس دى أبدا منولتهلهاش وفضلت تبلع وتسكت لحد ما دكها غارت وهيا هتفرقع وأول ما جوز دى نطق إنفجرت فيه
- طب وبعدين
- راح يراضيها وهو مش عارف إيه اللى زعلها حكاتله كل اللى حصل وقالتله أمك على عينى وراسى لكن انا مش جايه من الشارع لأفعالها دى ولكلامها اللى زى السم وياتقتصر عنى ياكل واحد من سكه أنا مش ناويه أتنقط عشان الست الوالده غيرانه منى وناسيه انها اكبر من امى
- الصراحه عندها حق ستات بتستهبل هيا هتاخد زمنها وزمن غيرها
- قوليلى إنتى بقى حموات هم
- جرى إيه مالك؟ هيا حماتك عملتلك حاجه؟
- قبل ما تسافرى بكام يوم عملت معايا حركات زى كده بس على خفيف
- ازاى؟
- اتصلت بيا تقولى ان عز هيتعشا معاها قال عشان مبقاش اعمل حسابه ولا استناه فكرانى دقه عصافير روحت متصله بعز وقيلاله انا راحه لأمك اخدمها مفيهاش حيل تجهزلك عشا وزى ما توقعت طلع معندوش أى فكره نهائى المهم انى روحت وعملتلها كل حاجه وقرب معاد رجوع عز سربتنى عشان اما يرجع البيت يلاقينى معملتش الاكل واما اقوله عاللى حصل تكدبنى واتسوح انا  مهو مش هيكدب امه بس ربنا كريم وسترها كان عندى اكل من امبارح ولعدين انا دايما بفرز واخلى اغلب الحاجات جاهزه عشان لو اتزنقت ف مره الامر مبيسلمش وأنا معايا قردين يلخموا بلد عشان كده تانى يوم اما استلمتنى من اول النهار لاخره وقعدت تضرب عز بالكلام عشان تتشمت فيا لبست ف الحيط ونلتهاش ومشينا وهيا هتفرقع
- بس انتى عرفتى منين ان ده فيلم هيا عملاه
- اصلى فقسه حركاتها القرعه ايه عز وحشها لدرجة مش قادره تستنى لتانى يوم معاد ما هنزورها دا غير انه كان يوم رامى ودى عشقها فيه تقوم تطنش يومه ثم انها لو اتصلت بعز صحيح وهيتعشى معاها زى ما قالتلى كان أول حاجه عملها أول ما يقفل معاها هيتصل بيا يبلغنى عشان مستنهوش وأتعشى
- طب ليه روحتيلها
- حبيت اوريها انها مفقوسه واورى عز ان حياه اللى شايفها معتوهه اعقل من عشره من عينة امه
- ماعاش ولا كان اللى يقول عليكى معتوهه طب دا عز روحه فيكى
- مهو دا اللى كايدها دا اللى قاهرها هيا ومرات رامى اللى مش فاهمه دى حطانى ف دماغها ليه
- دى بينها معتوهه سيبك منها
- اسيبنى اوى مسيبنيش ليه خليها تفرقع هيا كمان
أرادت سناء التخفيف عنها بتغيير مجرى الحديث وإلهائها عما يحزنها : اسكتى طب دول عالم بتكايد اومال لو سمعتى اللى انا سمعته
- خير؟
- واحده معرفه ف البلد بنتها كانت بتحلم تبقى سيدة اعمال مهمه وتقعد على مكتب فخم وتحط رجل على رجل بس محصلش نصيب واتجوزت
- وليه محصلش نصيب؟
- عشان ملحقت ف الاعدادى وبالعافيه خدت دبلوم بس بدل ما تاخده ف تلات سنين خدته ف خمسه
- يالعوى وعاوزه تبقى سيده أعمال!
- دى سيده بس من غير اعمال بلا هم البت فاشله وضابعه ومش تحمد ربنا انها لقت الاهطل اللى يرضى بيها لأ مصممه برضو تثبت ذاتها اللى مش موجوده
- برضو! ازاى؟!
- اهى كل شويه تخترعله افكار مشاريع فاشله
- يالهوى دى هتخرب بيته
- لأ مهى بتخترع بالكلام وهو مبينفزش حرف واحد من تخاريفها عشان كده مفروسه وبتقوله انت اللى جبتنى ورا ودمرت طموحاتى لأ ومقتنعه أنها هتنجح بسهوله وهوب هيقع ف غرامها ملك جمال العالم
- غرام مين؟! هيا مش متجوزه؟
- آه بس هيا بقره حافظه ومش فاهمه سيدة الأعمال عاوزه اللى يناسب برستيجها اوماااال
- هههه دى نكته
- دى متخلفه وجوزها خلاص بيتعامل معاها معاملة الاطفال بيهاودها بالكلام
- ربنا يهديها
- ربنا يردلها عقلها دى جاموسه صرف تخيلى اخر اقتراح لمشروع كان إيه
- ياترى إيه ؟
- قال عاوزه تعمل جبنه فيتا من الجبنه القريش
- نعم
- شوفتى الهبل يقولولها ليه تقول العيال بتحب الفتيا بس القريش افيد فنطلع دى من دى عشان تبقى مضمونه وأفيد اكتر وتفرد اسهل ف الرغيف
- طب وجوزها قالها إيه؟
- بعد ما حسبن عليها قالها هاتى معلقتين زيت وحوطيهم عالجبنه القريش واهرسيها هتفرد معاكى زى القشطه
- بصراحه دى دماغها مسافره عالآخر ربنا يعينه عليها ويهديها
- اللهم آمين
- بتدعوا على مين عالمسا
إنتفضت حياه فزعاً حين تفاجأت بصوت عز خلفها فهى لم تشعر به حين عاد فقد إندمجت فى حديثها مع سناء
- خضتنى ياعز
- إنتى اللى مش هنا طبعا من لقى أحبابه نسى أصحابه
ثم أدار وجهه ببسمه سعيده تجاه سناء : إنبسطت قوى لما البواب قالى إنك رجعتى حمدلله عالسلامه يا طنط العماره كانت مضلمه من غيرك
- دى منوره بيكم يا ولاد ربنا ما يحرمنى من سؤالكم عنى أبداً
- اللهم آمين
- قومى يا بنتى حضرى لجوزك لقمه
- حاضر ولو إن قعدتك ميتشبعش منها أبداً
- ياستى الجايات كتير أنا هقوم أريحلى شويه أصل المشوار كان علقه ومبقتش أستحمل السفر زى زمان
- ربنا يديكى الصحه
- ويعافيك يا ابنى
إستندت على عصاها ثم إستأذنت منهما فتركا الشرفه ودخلا غرفة المعيشه
- تصدق والله فرحت أوى برجوعها
- ربنا يفرحك دايما يا حياه
- ويخليك ليا
إبتسم بحب فبادلته ببسمه مشابهه ثم دخلت إلى المطبخ لتحضير الطعام بينما دخل عز غرفته لتغيير ثيابه

الموده وحسن التعامل بين الناس يفشى السعاده والرضا كن جاراً ودوداً وإذا لم تكن إجتماعياً يكفى أن يأمن جارك شرك فالجار أقرب لك من الأخ حين تقع بك المصائب كفاك الله الشر
لاتنسوا التصويت والتعليق

إيمى عبده