مامتى مجنونه

الحلقه السابعه

بعد أن أنهت حياه أعمالها المنزليه اليوميه جلست تفكر بمعضلة كل يوم
ماذا ستطهو اليوم؟
وكالعاده تعبت رأسها من التفكير حتى أتى الصغيرين يريدان تناول طعاما ما فنهضت تحضره لتكتشف أن المكونات ليست موجوده فإعتذرت لهما واعده إياهما بصنعه لهما بالغد وليكتفيا اليوم بالموجود فوافقا على أن تنفذ وعدها بالغد
لذا هاتفت عز تطلب منه ما تريده

- أيوه يا عز بقولك متجيبلى معاك شوية طلبات وإنت راجع
- ليه انتى مش راحه السوق أنا ببقى راجع مش شايف قودامى أصلا
- يعنى مستنفعش منك بحاجه
- يابنت الناس قولتلك يوم اجازتى هاتى كل اللى انتى عاوزاه عشان متخرجيش بالعيال وأنا ف الشغل إحنا أيام عيا
- يوووه مهو فى حاجات بتخلص واحتاجها وحاجات بنساها وافتكرها بعدين
- طيب طيب خلاص اكتبيلى طلباتك ف رساله قدرت اجيبها كان بها مقدرتش ابقى اخرجى بعد ما ارجع من الشغل
- بالليل؟!!
- اعملك إيه مهو خروجك بالعيال اذى ليهم وانا مشغول ومش فاضى
- هوديهم لماما
- انتى هبله ولا بتستهبلى هتنزلى من البيت وتركبى مواصلات وتروحى لامك بيهم عشان تشترى طلبين من اول الشارع وترجعى تروحى مواصلات تجبيهم يابنى ادمه المشكله ف خروجهم أصلا الخوف يلقطوا من حد
- هلبسهم كمامات
- لو رحمه سابتها على وشها من غير ما تلعب فيها فارس مش هيطيقها دقيقتين
- طب اعمل ايه
- مفيش حل الا انك تستنينى اما ارجع او تلغى الطلبات دى مش هنموت من غيرها يعنى
- يوووه طيب تحب اعملك أكل ايه النهارده
- أى حاجه
- انا بكره الكلمه دى
- وانا مش فاضى لحواديت الاكل دى
- طب قولى اقتراح
- اقتراحى تقفلى السكه
- يييه

أنهت المكالمه وجلست تتأفف لا تستطيع تقرير ما ستطهوه حتى واتتها فكره
- ماما مفيش غيرها
هاتفت والدتها علها تجد لها إقتراح جيد

- أيوه ياحياه
- مفيش صباح الخير الأول
- يابنتى انجزى لو عاوزه حاجه قولى منتش عاوزه اقفلى
- الله مطمنش عليكى
- ورايا غسيل عاوزه اخلصه عشان الحق اعمل الغدا يابنتى انتى عارفه ابوكى معاد الغدا يجى امالقاش اكل بيقلب الدنيا
- جينا لمربت الفرس هتعملى غدا ايه
- ليه؟!
- جاوبينى بس
- مش اما اخلص الغسيل هشوف عندى ايه واعمله واللى ناقص هنزل اشتريه
- يا بختك بتعرفى تنزلى وقت ما تحبى
- بختى ايه بلا خيبه دا اما نفسى بينقطع ف النزول والطلوع ما انتى عارفه احنا ف التالت والعماره من غير اسانسير وانا حيلى بيتهد ف السوق وبرجع خلصانه
- طب قوليلى على اكله اعملها مخى فضى
- كنت نفعت نفسى اعملى اللى تلاقيه عشان متخرجيش بالعيال احنا ايام عيا با بنتى
تعجبت حياه مما تقوله والدتها فسألتها بإرتياب
- انتى كلمتى عز النهارده
- لا ليه؟!
- اصله قالى كده من شويه
- خايف على العيال
- وأنا؟!!
- مهو انتى كبيره هتعرفى تحتاطى
- ما علينا انا محتاره اعمل اكل ايه
- دى حيرة كل يوم مشيها بأى حاجه
- ياماما اى حاجه دى ترجمتها ابه
- ترجمتها تقفلى السكه وتروحى تشوفى الموجود ف تلاجتك وتصرفى نفسك بيه وتسبينى لغسيلى
- طيب سلام
تأففت بغيظ لما لا يضعو مقررا لطعام الشهر كاملا وتنفذه حسب المكتوب
لم تجد بدا من محاولة التغيير فنهضت تبحث بثلاجتها عما قد يصلح للطهى وها هى تعيد نفس الوجبات المعتاده يبدو أن محاولة التجديد ستغدو فاشله كسابقيها
بعد أن أنهت الطعام جلست مع الصغيرين وشردت قليلا تتذكر فى بادئ زواجهما حين أرادت أن تبرز مواهبها بالطهو وفشلت بجداره فحاولت تقليد الشيفات ببرامج الطهو وكانت النتائج كارثيه فيأست وإستمعت لنصح عز
- حياه اللى ف التليفزيون حاجات للنظر بس هما بيقولو انه تحفه بس حد داقه غيرهم
- انت بتحبطنى ليه
- ياحبيبتى مبحبطكيش ولا حاجه بس الاكل اللى بيعملوه يناسب ذوقهم ممكن ميناسبناش احنا كمان تكلفته عاليه اوى
- مكنتش اعرف انك بخيل
- مش بخل بس العقل حلو اللى يخلينا نصرف مبلغ كبير ف وجبه واحده متشبعش يخلينا نعمل بيه أكل يومين تلاته يشبعنا ويوفرلنا إحنا لسه ف بداية حياتنا لازم نصرف بالعقل عشان منتعبش بعدين احنا لسه مخلصناش الاقساط اللى علينا من الجعاز والجواز
- اخص عليك مش كفايه عملنا شهر عسل اسبوع بس
- احمدى ربنا انى عرفت اعملك اسبوع بعد الفرح اللى قطم وسطى ولحد دلوقتى مش فاهم لزمة المصاريف الزياده دى كلها ايه منظره عالفاضى كنا احنا اولى بيها
- يعنى معزمش اصحابى
- يا حياه انتى عزمتى دفعتك كلها اللى متعرفيش نصهم اصلا عشان منظره فارغه لو اقتصرنا على اهلنا واللى بنحبهم وهيفرحولنا بجد مش كان احسن بدل المولد اللى مبقتش عارف مين اللى بسلم عليه ولا ايه اللى جابه اصلا ولا اللى جايين بس عشان يتفرجوا وينمو علينا
- ياعز واحنا هنتجوز كل يوم دى مره ف العمر مش عاوزنى افرح
- ياقلبى افرحى بس بالعقل
- اعمل زى ماما بقى وقولى الفرحه ف القلب واحبطنى
تنهد بيأس فهى لن تستوعب أبدا : عالعموم الموضوع انتهى وياريت تعقلى وتبطلى تقلدى وخلاص
- يوووه يعنى هنفضل ف ملل على طول
- مقولتش كده جددى ف الاكل بس التجديدات اللى تليقلنا ونستطعمها مش كل تقليعه تطلع
- طيب
تنهدت حياه بضيق فدوما عز محق أم هى فقط حمقاء لا تعلم وللحظه اشتاقت لتناول طعام محرم عليها لأنها دوما ما تمرض منه كما أنه مضر لصحتها وصحة صغيريها فقررت محادثة عز بهذا الشأن وإنتظرت حتى عاد وتناول طعامه وجلس يرتشف كوب الشاى الساخن