#مثلث_برمودا
(مقدمة)
السلام عليكم رجعتلكم برواية جديدة انتمنى اتنال اعجابكم
طبعا الرواية هذي مختلفة عن اللي كاتباهن من قبل هيكون فيها مغامرات وأكشن واجد🔥🔥
القصة تحكي عن بنت اتكون دكتورة جراحة واتكون شاطرة في شغلها ودارت إنجازات في مجالها رغم صغر سنها
وثلاث شباب أعمارهم متقاربة ايكونو من أكبر العصابات وأشهرها في مجال التجارة بالأسلحة والمخدرات طبعا مبلغ عليهم في كل مكان لكن لعند توا محدش عرف يوصل فيهم وكل مرة يمسكو عليهم حاجة أو ايحاولو ينصبولهم فخ ايطيحو هما فيه وايضيعوهم وكل مرة يفشلو في أنهم يمسكوهم صفقاتهم كلها ناجحة ايتعاملو حتى مع أشهر تجار الأسلحة والمخدرات من برا لبلاد وايهربو من غير محد يمسك عليهم حاجة أذكياء بكل في شغلهم أسم عصابتهم #مثلث_برمودا وكل واحد منهم صايرة معاه قصة خلاته ايخش على المواضيع هذينا هنعرفو قصة كل واحد فيهم مع الحلقات
طبعا الأحداث اللي هتكون في الرواية انه الدكتورة هذي هتتعرض للخطف من قبل عصابة مثلث برمودا زعما شن هيديرو فيها أو شن بيكون سبب الخطف وهل بعد ترد لهلها هيصدقو انه هيا كانت فعلا مخطوفة أو هيطلع عليها كلام أخر وهيا مش قاعدة وشن بيصير معاها من أحداث وهيا ساكنه معا العصابة هذي كلة هتعرفوه في حلقات الرواية
نتعرفو بالأبطال
غدي عمرها 26 سنه بنت طيبة وعسل ومحبوبة من قبل الناس اللي تعرفها مواصفاتها طولها متوسط جسمها رقيق بس حلو عيونها على العسلي بشرتها قمحية ملامحها ناعمة شعرها قهوي دااااكن لعند نهاية ظهرها متخرجة من طب بشري قسم جراحة اتحب شغلها بكل ومجتهدة فيه ونظرا لشطارتها وتفوقها في شغلها عينوها رئيسة قسم الجراحة في المستشفى اللي تشتغل فيها متهاونه في كل حاجة إلا في موضوع الشغل متعرفش فيه حد وأهم حاجة عندها انه ايكون المريض مرتاح فترة علاجة في المستشفى وكل المرضى ايحبوها لجمال أسلوبها وأخلاقها الإنسانية قبل انها اتكون مجرد دكتورة اتأدي شغلها وبس باتها متوفي عايشة معا أمها وخوها هنتعرفو عليهم في الحلقات الجاية
أعضاء عصابة #مثلث برمودا
هاشم عمرة 28 سنه مواصفاته بشرته سمرا عيونه رصاصية جسمة عضلات رياضي طويل شعرة ولحيتة على القهوي الدااااكن وفي خصلة طايحه على عيونه🔥شخصيته واعرة طبعة صعب جدي حتى من ملامحة ونظراته اللي اتخوف وليهن رهبة غامض وميحبش يحكي لحد اللي ايحس بيه كلمته مسموعة ومتكررش مرتين بس حنون وقلبة ابيض بس ميحبش ايبين الشي هذا
رماح عمرة 30 سنه مواصفاته قمحي عيونه عسلية شعرة ولحيتة قهوي مايل بشدة للأسود جسمة رياضي طويل ذكي وشخصيته مرحة وايحب لبصارة الواجدة
نوح عمرة 27 سنه مواصفاته أبيض عيونه وشعرة ولحيته أسود كيف الليل جسمه رياضي طولة متوسط مش طويل واجد حتى هوا شخصيته غامضة هادي وايحب القراءة والشعر رغم انه مهنتهم اللي مفيهاش ميدعو لشي زي هذا بس في جانب غامض من شخصيته ايحب انه ايكون له جانب بعيدا عن كل شيء ايدير فيه الحاجة اللي يحبها
مقتطفات من الرواية
*كل سنه اتمر عليا صاح نكبر في العمر بس روحي مزالت قاعدة كيف مسيبتوها ونزلت منه دمعة خسرتكم كلكم مرة وحدة خلاص بنمشي وهذي أخر مرة انزوركم فيها بنمشي ونسيب طيوفكم اللي لعند توا انتعذب ونا عايش معاهم مسيب كل حاجة ورايا وأسف اني مقعدتش الشخص اللي تمنيتو اتشوفوني فيه
*كيف كل سنه كيف كل يوم مفش حد يرجى فيك إذا روحت أو لا إذا كليت أو لا أو إذا عايش حتى أو ميت مفيش حاجة عشان نقعد على خاطرها هنمشي ونسيب المكان اللي مش حاس أصلا انه ليا فيه ذكرة كويسة ولا حاجة تستاهل اني نزعل عليها
*جيت للمرة الأخيرة اللي بنزورك فيها جيت انودعك لأني قررت انسيب المكان اللي فيه طيفك الراحل ضحكاتك كلامك صوتك خيالك عايش معاهم معش قادر أكثر من هكي بس سامحيني مش هنقدر اندير اللي قلتيلي عليه وتذكري انه كل حاجة اتخصك محفورة في ذاكرتي وفي قلبي وفي عقلي مستحيل مرة ننساكي ولا اتغيبي عن بالي تأكدي اني كنت وهنقعد عمري كلة انحبك ومستحيل انحب غيرك
*جيبي جهاز الصدمات بسرعة
-دكتورة خلاص نبضة وقف
قلت جيبيه بسرعة خذت الجهاز وقعدت تخبط بيه على صدر المريض هيا هيا
-دكتورة بدا النبض ايرد بس ضعيف بكل دكتورة الحقي النبض وقف بكل
وهيا تجهد حولت الكمامة ساعة الوفاة 8:14
وهذي كانت مقدمة مختصرة عن الرواية طبعا هيطلعو شخصيات أخرى مع الحلقات وهيكون فيها أكثر من قصة شن رأيكم في المقدمة وهل حابين انكملها ونبدأ بالحلقة الأولى
بقلمـ PULSE
(BS.AM.YA)
