#مثلث_برمودا
الحلقة 17
بقلم PULSE
(BS.AM.YA)
رماح:تنهد انا مستعد لكل حاجة وكون واثق انه بعيد السو لو تعبت بعدين انا أول واحد بيوقف جنبها ويكون معاها ومستحيل انفكر انتخلى عنها في أكثر وقت المفروض اتكون محتاجتني فيه واللي ينسحب هذا بعد تمرض زوجته حشاك ميكونش راجل ياعمي لذلك كون مطمن
سالم:ابتسم ونعمة التربية ياولدي انشوف البنت و انشالله انردو عليكم في أقرب وقت
رماح:أكيد يا عمي خوذو راحتكم
وتمت الموافقة ورماح جاب خالته بش اتشوف وعد وعجبتها وانخطبو رسمي ورماح قعد ايكلم وعد 24 ساعة بما انه كل حاجة قعدت واضحة قدام كل الناس وانهم ميديروش في حاجة حرام من ورا حد
رماح شاف كم شقة صغيرة تناسبهم في بداية حياتهم وباتها مكانش عندة مشكلة انه ياخذ شقة تأجير راعة ظروفة لأنه عرف انه رماح الراجل اللي يقدر ايأمن على بنته الوحيدة معاه
صورهم ودز لوعد بش يختاروا معا بعضهم واختارو شقة حلوة على قدهم وبدو يفرشو فيها وكانت كل حاجة يختاروها معا بعضهم رماح حب ياخذ رأي وعد في كل حاجة اتخص تفاصيل عالمهم لصغير وكملو كل حاجة في وقت قصير وكان رماح يحب وعد حب مش عادي حب صادق مفيش فيه أي مصالح أو شهوات ووعد حتى هيا نفس الشي ❤
وحددو موعد عرسهم اللي كانو ينتظروه بفارغ الصبر وبعد مقعدش على العرس إلا شهرين صار اللي كانو خايفين منه وعد مرضت💔 وكان مرضها المرة هذي صعب وضروري ايديرولها دخول على المستشفى
رماح عرف بالمرض اللي زاد بدون سابق إنذار 💔
أما وعد اللي معاش كلمت رماح اللي خايفة انه ايسيبها بعد عرف بمرضها لأنه مش معروف إذا هتقدر تشفى وتكمل بيه حياتها ولا بيقضي عليها كانت ليل نهار تبكي وخصوصا انه مكانش على عرسهم إلا شهرين 💔
أما رماح مكانش حالة أقل منها أول ما سمع بحالة مرضها اللي ساءت فجأة كانت كل حاجة تمام معاش فيه شي على عرسهم بس كان القدر له كلمة أخرى💔
رماح خذا قرارة الحاسم وكلم بات وعد وحدد معاه موعد انه ايجي ايزورهم لأنه اتخذ قرار وبيقولة
طبعا بات وعد عرف على طول انه رماح بيلغي كل حاجة لأنه توقع الشي هذا من قبل وهذا اللي خاف منه متوقعش انه رماح ايتخلى عليها في شدة مرضها وميكونش قد كلمته
سالم:وعد يابنيتي حرام اللي اديريه في روحك هذا هذي مشيئة رب العالمين كوني على ثقة بالله انه هذي هتكون أزمة وتعدي على خير ماتوجعيليش قلبي بزيادة يابنيتي
وعد:تبكي لا يا بابا أنا حاسة انه المرة هذي بنموت منبيهاش المستشفى على الأقل انموت في حوشي وفي داري اهئ اهئ ورماح المسكين اللي كان يرجى في الشهرين ايكملو عشان ايجي يوم العرس له يومين مكلمنيش بس هوا شن ذنبة يرتبط بوحدة احتمالية موتها أكبر من احتمالية انها تقعد عايشة
سالم:دموعة خاناته ومقدرش يمسك روحة بعد سمع كلام بنته طبطب عليها
سالم:رماح كلمني اليوم الصبح وقال انه بيجي بعدين
هنا وعد زادت تبكي خافت انه رماح ايكون بيتخلى على كل شي وايسيبها بس هيا كانت واثقة انه ايحبها وايموت فيها ومستحيل ايسيبها بس ليش معش كلمها من لما عرف بمرضها معقولة ايكون بيتخلى عليها!
