#مثلث_برمودا
الحلقة 2
بقلم PULSE
(BS.AM.YA)
سيف فتح لشكارة وهنا كانت الصدمة
قطن اطفال😂😂ومعاها ورقة مكتوب فيها
"انتمنى اتكون الهدية نالت اعجابك واتكون القيت فيها الحاجة اللي تبيها كان غيرك أشطر ياسيفو"
سيف عزق لشكارة بقوة وبعصبية وعيونه بيطلع منهم النار
سيف:شنو هذا نلعبو معا عيال نحنا وامسكو هذا اللي جاب لقرفف
عسكري:مشت وراه سيارة من سياراتنا بس منظنيش بنستفيدو شي
سيف:خبط يدة على الساس بقوة تو إيجي يوم وندمكم يامثلث برمودا
رماح:وووه بطني ريت منظرة😂
نوح:هههه خلاص اقريب اتجيلة سكته قلبية مسكين خابت ظنونه😂😂
هاشم:ايتفرج على الفيديو وساكت
رماح:كنك ياهيشو مسمعناش صوتك ولا وجعك حالة
هاشم:ضروري انسيبو المكان هذا في أقرب وقت مش كل مرة بتصدف حاس انه المرة الجاية بيقعد موضوع جديات
نوح:تكا على الكنبة نظرتك هذي في من وراها حاجة مش مطمن للموضوع
رماح:انت ليش مقلق نحنا واخذين احتياطات من جميع الجهات وكل حاجة اتصير عندنا علم بيها متشغلش تفكيرك
هاشم:شبك ايديه في بعضهم مهما كان الفترة الجاية ضروري نمشو حاس في فخ قاعد يندار خاطي هذ
بقلم PULSE
(BS.AM.YA)
غدي خشت على أمها في المطبخ
غدي:السلام عليكم
نادية:وعليكم السلام كنك طولتي
غدي:شغل ياماما انتي عارفة انه كل حاجة على راسي بعدين لين جاني يعقوب روحت
نادية:باهي امشي غسلي وغيري دبشك والبسي حاجة كويسة مش توته في عرب برا في المربوعة
غدي:وووه مش وقتهم بكل عرب شنو هذوما في آخر الليل
نادية:ماهو حضرتك طولتي بعدين جرانا هما يعني اهو حوشهم مش في آخر الدنيا ومش قتلك الصبح بتجي هيا واختها بيشوفوك
غدي:ماما ومن قالك اني موافقة اصلا كيف تخليهم ايجو
نادية:غدي خلاص ديري كيف ماقتلك واسمعي الكلام بعدها جايين على اساس تعارف واختها هذي اول مرة اتجي فخليك هادية ومتحرجينيش قدامهم
غدي:حاضر المرة هذي بنسمع الكلام وبنمشي القعدة بس ها من توا مش موافقة
نادية:غير امشي توا بس
غدي غسلت وغيرت دبشها وخشت اتسلم على العرب
غدي:السلام عليكم
كلهم:وعليكم السلام
وسلمت عليهم
غدي:قعمزت قبالهم أنستونا
جارتهم:الله ايآنسك شخبارك انتي وشن دايرة في الشغل وفي المستشفى
اخت جارتهم:مشالله دكتورة
جارتهم:اها مشالله عليها دكتورة جراحة
نادية:سلمكم ياربي
جارتهم:باهي ياغدي مش ناوية اتفرحينا بيك
غدي:وافرحو بيا شن المشكلة اهو مشالله متخرجة ودكتورة ونشتغل في مستشفى وماسكة قسم كامل في فرحة بعد هكي؟
نادية:اتفنص فيها تبيها تسكت
جارتهم:لا قصدي امتا يعني تجوزي وتجيبي عيال يعني خلاص اللي في عمرك تقريبا كلهن اجوزن وانتي خلاص كبيرة توا شوية ويفوتك القطار
غدي:ابتسمت ببرود مش مشكلة ايفوتني القطار اتجيني الطيارة عادي نصيبات من ربي ومحد يأخذ أقل من نصيبة
نادية:اتفنص في غدي وتبتسم بمجاملة ههه هيا غدي من يومها اتحب لبصارة
جارتهم:نحنا ندوو لمصلحتها بس اتشوفي انتي في البنات توا العرايس أعمارهم 15،16،17
اخت جارتهم:عندي بنت سلفي الأسبوع اللي فات كان عرسها في ثانية ثانوي ومرات ولدي توا كيف بتسكر عشرين خذيناها صغيرة بس لعند توا ربي مرادش تجيب عيال وهوا يبي
غدي:توا شن يستفيدوا هذوما اللي يعطو في بناتهم صغار في عمر 15،16 هنا شن شافن في الدنيا اصلا بش ايخشن على زواج وراجل ومسؤولية وعيال اللي في عمرهم ايعيشو طفولتهم ايكملو قرايتهم ياخذن شهادة تنفعهن في حياتهن مش شطارة هذي
جارتهم:بس الكل توا ايدور في البنات لصغار
غدي:والله انا في رأيي تزويج البنات في السن هذا غلط كبير وظلم في حقهم متسمعيش عن حالات الطلاق اللي صايرة توا كلهن من السبب هذا شن الفايدة ايزوجوهن اصغيرات وايجوهم مطلقات
جارتهم:والله كل واحد مسؤول عن نفسة بعدها صبت هي تصبحو على خير الوقت تأخر
نادية:خليكم مزال بدري
جارتهم:بدري من عمرك والله حتى اختي أكيد بتروح توا
نادية:تشرفنا معرفة خير انشالله
اخت جارتهم:انشالله سلمك
جارتهم سلمت على نادية
غدي:تصبحو على خير في امان الله
جارتهم:وانتي بخير وربي يهديك ياغدي
غدي: أمين يارب يهدينا أجمعين😊
