#مثلث_برمودا
الحلقة 1
لايك قبل ماتقرو حبايبي وكل سنه وانتو طيبين ❤
بقلم PULSE
(Bs.Am .Ya)
غدي:صباح الخير مامي وباست امها على خدها
نادية:صباح الورد تعالي افطري قبل ماتمشي للمستشفى
غدي:بحتت في ساعة يدها لا مفيش وقت تو نفطر في المستشفى وين يعقوب وعا ولا مزال؟
يعقوب:صباح الزبادي يامعذب فؤادي فاقديني ولا عادي
غدي:هههه اهو جا البارد
يعقوب:باس راس أمه صباح الخير ياست الحبايب
نادية:صباح الورد ياوليدي تعال قعمز افطر
يعقوب:لا وين نفطر متأخر عندي كلية واتية أمسي
غدي:يابارد معش اتقولي أمسي😑
يعقوب:أمسي غدي كلهن أيام هيا نرجاكي في السيارة تشاو تبي حاجة يمي
نادية:سلامتك ياوليدي رد بالك من الطريق بس
غدي:هيا أمي تبي حاجة سلام
نادية:ارجي اشوية
غدي:نعم
نادية:فكرتي في الموضوع اللي قلته لكي أمس؟
غدي:برفعة حاجب أي موضوع؟
نادية:تي شن أي موضوع وين عقلك انتي نحكي على العريس
غدي:وووه ياماما شن حكينا عليه الموضوع هذا من قبل
نادية:والله وانشالله كل مرة بتمشيني على مزاجك لولية اليوم بتجي شن انقوللها
غدي:ماما أسمعي مش وقته الكلام هذا تو بعد نروح نحكو تمام وطولت على يعقوب قاعد يرجى فيا برا هيا باي وطلعت تجري
نادية:معا السلامة لا حول ولا قوة الا بالله ربي يهديها البنت هذي بتجلطني هيا وخوها
"انتعرفو على أهل غدي،نادية امها عمرها 52
خوها يعقوب عمرة24 في الكلية العسكرية وبوها عرفنا من قبل انه متوفي"
عند عرب اخرين (مثلث برمودا )
هاشم ونوح قاعدين في المطبخ
نوح ايدير في الفطور وهاشم مقعمز على طاولة السفرة وماسك في يدة دفتر كبير شوية ويرسم
نوح:توا اليوم في الليل بتكون صفقتنا معا العصابة اللي جاية من مالطا صاح
هاشم:اها ليش تسأل؟
نوح:مش عارف شاك في موضوعهم حاسة كمين
هاشم:سيب اللي في يدة وبحت فيه بتركيز كيف يعني شن اللي خلاك تكتشف الموضوع هذا توا لنا اقريب اسبوعين نتفقو معاهم!
نوح:اهو قلتها اسبوعين عادة الصفقات الكبيرة واللي جاية من برة انكونو على تواصل معا صحابها قبل شهر ولا شهرين وايكونو اصلا عصابات معروفة ومتعاملين معاهم من قبل أو من طرف حد معروف في مجالنا هذا بس هذوما خشو فجأة وطلبوا كمية كبيرة مرة وحدة موضوع غريب
هاشم سند ظهرة على الكرسي ومسك الدفتر ورد يرسم
هاشم:تو انشوفو الموضوع مش هيخيل علينا لو كمين تو انطيحوهم فيه قبل لايوصلو فينا مش مثلث برمودا اللي ينضحك عليهم😏
نوح:الله أكبر هذا الكلام الصح
بعدها خش عليهم رماح
رماح:طلعت يامحلا نورها شمس الشموسة يلا بنا نملاه ونحلب لبن الجاموسة صباح الخير ياجواميس🙂
نوح:الله يقرفك ويقرف صوتك لمعفن الزح طرشتني عنشكلك وبعدين شن فايدتها صباح الخير وانت تعلق في جواميس صباح كيف وجك شكلة
رماح:اششش سكرلي فمك انت مش شورك انقول اللي انقولة بجوي وكمل لفطور وانت ساكت هي سلم وليدي
نوح:بلكي شغال عند بوك نا
رماح:ايوة بالضبط راجل خدامة جدتي هي اشتغل وانت ساكت وكم مرة بنعلمك تسمع كلام الأكبر منك وتقول حاضر
نوح:واطي وربي
هاشم:ضحك على هبالهم بعدها جت عين رماح على رسمة هاشم
رماح:صفر تصفيرة الاعجاب من الطرف هذي
نوح:كرا وجا بحت صح من الطرف هذي
هاشم:ايبحت في الصورة بتأمل مش عارف جت في خيالي ورسمتها
نوح:بس قوية بكل انا شفت كل اللوحات اللي قالب بيهن دارك بس هذي أحلى وحدة مرت عليا
رماح:كلام نوح صاح بعدها قعمز على السفرة وثاوب تي هيا يا باير هذا كلة تقلي في دحية
نوح:سكر فمك مش شغال عندك كنك جعان صبي دير فطور لروحك
رماح:خزي معفن اها خطرها صفقة اليوم هذي كذبة مفيش منها وكمين ناصبينه بش ايطيحو نا فيه
هاشم:وكيف عرفتها؟
رماح:اتكا على الكرسي راجعت كل الايميلات اللي دزوها اول حاجة مفيش أي حاجة أدل انه لهم تعاملات من قبل وثآنيآ مفيش حاجة أدل انهم جايين من مالطا اصلا
نوح:ايحط في لفطور مش قتلك بس مش على أساس بيجو معقولة هكي ايجو وميلقوناش عيب متجيش😂
هاشم:ابتسم لا كيف عاد ايجو ويتعبو وايروحو ايديهم فاضية ضروري انقومو بالواجب
رماح:احبك وانت جامد وتفهم في الاصول😂😂
هاشم:قعد ياكل هيا افطرو بلا دوة زايدة
بقلمي PULSE
(BS.AM.YA)
في المستشفى
يقين:والله هذا اللي صار مرقدت إلا على الفجر ونا نهدرز معاه
سارة:طح سعدك لعند الفجر تي غير امتى عرفتيه انتي
يقين:اااه شن بنحكيلك بس هدرزته اتهبل مينملش منها
بعدها جتهم غدي
غدي:شن اديري هنا انتي وياها
سارة:اا كنا
غدي:كم مرة قلت الهدرزة في الممرات وعند الرسبشن معا موظفة الاستقبال ممنوع قاعدين في مستشفى نحنا مش في لمة انتن ممرضات هنا يعني اديرن شغلكن المطلوب منكن وتشوفو المرضى كل شوية كان محتاجين شي مش يقعد المريض مسكين ايضبح يبي حاجة ميلقش حد وحضرتكن اتهدرزن هذي اخرلكن مرة المرة الجاية بنمشي لمدير المستشفى هي كل وحدة على شغلها
مشن يقين وسارة
يقين:هالكلبة هذ شايفة روحها علينا عقاب دكتورة مش عارف على شنو معينينها هالعانس تي غير نمسك عليها حاجة بس تي وحق ربي إيجي يوم وانوريها
سارة:اسمعي را هيا الكل يشهدلها في شغلها والمرضى كلهم ايحبوها
يقين:انا متأكدة في من وراها موضوع تي وحق ربي إيجي يوم ونفضحها
سارة:باهي خلاص اسكتي وامشي لشغلك را ناخذو هزيبة أخرى
يقين:وووه وانتي خوافة
حنين (ممرضة وصحبت غدي):كيف صار مروحة توا
غدي:تحول في بالطو المستشفى بتعب اها خلاص كمل شغلي اليوم والله حرام الشغل كلة عليا خليهم ايجيبو دكاترة أخرى ايجو يومين وايغيبو عقاب الأسبوع تعب عليا حتى كم عملية مثلا بندير واجد يالا عمليتين بش نقعد مركزة
حنين:ماهو لانك شاطرة في شغلك معتمدين عليك
غدي:سلمت على حنين هي سلام تبي حاجة
حنين:لا سلامتك منوابتك بكرة انتي صاح
غدي:اها بكرة اكيد يوم طويل بيقعد
حنين:عليك بخت يوم مناوبتي مش نفسه يوم مناوبتك
غدي:ههههه نصيب هي باي
حنين:باي
سيف (ضابط وولد عم غدي):تي وينهم هذوما طولو مش على أساس متفقين ايجو توا
عسكري:والله على اساس بيجو مقالوش غيرو رأيهم
بعدها جت سيارة
سيف:اهو شكلهم هما وتيتو كل حاجة أخيرا بطيحو في يدي يا مثلث برمودا
عسكري:بس مش هما اللي في السيارة
سيف:كييف امسكوها السيارة هذي
اللي ايسوق في السيارة فتح الروشن
مجهول:معايا أمانه من مثلث برمودا
سيف:وكنهم ماجو هما وجابوها
مجهول:منندريش عليهم المهم قالولي سلم على الجماعة وهذي امانتكم وعزق شكارة من الروشن وطلع يجري
سيف:فتح لشكارة وهنا كانت الصدمة
سيف:...
يتبع...
شن رأيكم في الحلقة حبايبي بنشوف تعليقاتكم وتفاعلكم❤
بقلم PULSE
(Bs.Am.Ya)
