#مثلث_برمودا_الجزء_الثاني
الحلقة 9
مع اني مش فاضية وفي ورايا مية حاجة بس مبيتش انسيبكم اليوم من غير حلقة لأنه أكيد بكرة مش هنفضى ومش هنزل لذلك سهرت ونا نكتبلكم اليوم وحبيت قبل ما نبدأ بالحلقة انعيد عليكم انشالله كل عام وانتو بألف خير وأعاده الله عليكم بالخير واليمن والبركات واللهم تقبل منا ومنكم صالح العمل وربي يرحم كل شخص عزيز وغالي علينا بيمر علينا العيد السنه هذي وهوا مش معانا ربي يرحم جميع موتانا وموتى المسلمين ويرحم شهدائنا يارب ويسكنهم فسيح جناته ويصبر هلهم على فراقهم واعاده الله علينا بالخير وعلى سائر الأمة الإسلامية ❤
نبدو بالحلقة
بقلم PULSE
(BS.AM.YA)
سيف مقدرش ايتحمل ومعرفش يرقد الليل و هوا ايفكر أنغام كنها متردش عليه وتلفون امها كذلك مقفل ناض الصبح بدري وقبل مايمشي للمركز خطم على حوش هلها وقعد ايدق الباب ومحدش كان ايرد 🤷♂️
لعند شافة واحد مصري مسؤول عن سكان العمارة
الراجل:يابني الشقة ديه مفيهاش حد
سيف:كيف؟
الراجل:صحاب الشقة سلموني المفاتيح من أسبوع
سيف:كيف سلموك المفاتيح من أسبوع شن قاعد تدوي
الراجل:والله انا معرفش في حد جيه وسلمني الايجار الأخير والكلام ده من أسبوع
سيف:تنهد بعصبية أسمعني ادوي وقول وين مشوه خيرلك راني ضابط في الشرطة وكان طحت بين ايديا اقسم بالله محد يفكك مني
الراجل:مقولناش حاجة يا حضرة الضابط ولو مش مصدقني اهو المفتاح اتفضل شوف بنفسك
سيف:باهي من اللي سلمك المفاتيح
الراجل:واحد معرفوش اداني المفاتيح والفلوس ومشي
سيف:نزل من العمارة بعصبية وركب سيارته ضرب الدومان متع السيارة بقوة وين مشت هذي مسح وجه بيدة بعدين سمع صوت مسج وبعد فتح الرسالة هنا كانت صدمة عمرة......
___________
غدي وهاشم طلعو معا بعضهم ووصلو للمستشفى خشت غدي ومعاها هاشم
غدي:واو المرة اللي فاتت جيت للمستشفى ونا مش طايقتها بكل المرة هذي متحمسة بكل 😍
هاشم:ضحك باهي اهدي وانتي قريب اطيري 😅
بعدها بشوية جاهم رماح
رماح:اووو كفارة كفارة مبروك البرائة
غدي:ضحكت الله ايبارك فيك حسستني بشعور اني كنت محبوسة جديات
رماح:والله أمس كلمت هاشم وقبل بنكلمك انباركلك بعدها اذكرت انه بتبدي دوام من بكرة قلت خليها وجها لوجه خير
غدي:لا ولو عارفتك متقصرش
هاشم:باهي أمور كلها تمام
رماح:مية مية متخافش مسرع ما هتاخذ على الجو على الأغلب غدي اجتماعية وتنسجم بسرعة ولا شنو
غدي:انشالله 😊
رماح:الدكتور يبيني لحظة وجاي
هاشم:بحت في غدي بنمشي نا توا ورماح وصيته عليك لين تاخذي على الجو
غدي:باهي تمام متخافش عليا نعرف نصرف
هاشم:به ديري بالك على روحك
غدي:انشالله حتى انت في أمان الله
هاشم:همسلها نحبك وطلع قبل ماغدي تدوي ❤😂
غدي:مفنصة عيونها وتدوي في سرها هذي اول مرة ايقولها ليا وهوا في وعية مخطرش عليه إلا في المستشفى ركزي ياغدي انتي جاية هنا للشغل مزال أول يوم اتفكري في هاشم
بعدها جا رماح
رماح:ها روح هاشم
غدي:اها
رماح:باهي يا دكتورة تعالي بناخذو جولة انعرفك على الدكاترة اللي هنا وبنخطمو على مدير المستشفى بعدها تبدي شغل
غدي:تمام هيا
وقعد رماح ايوري فيها المستشفى وايعرف فيها على الدكاترة والممرضين اللي معاه و غدي انسجمت وحست انه هذي أول مرة تشتغل فيها 💙
__________
وصل لسيف مسج وهنا كانت الصدمة كان مكتوب
"عارفة انك توا بتهبل وتعرف انا وين أول حاجة انقولك وانت تقرا في الرسالة أنا بنكون سافرت وقاعدة في بلاد بعيدة ولو تموت متعرف توصل فيا ثانيا واللي انت أكيد بتعرف السبب اسمع يا حضرة النقيب سيف زواجي منك والحب اللي وهمتك بيه مكانش إلا انتقام انتقام السنتين اللي قعد قلبي محروق فيهن على زوجي اللي انت السبب في موته اها صح ولعلمك انا لاني مطلقة ولاني عندي ولد أنا أرملة وولدي مات قبل مايجي على الدنيا من حسرتي على بوه والولية الكبيرة في العمر والعيل لصغير هذوما وحدين اجرتهم وعطيتهم فلوس عشان ايمثلو الدور هذا ومهمتهم كملت من أسبوع وحتى انا مهمتي كملت وانتمنى انكون اديتها على أحسن وجه طبعا أكيد حضرتك ناسي الشخص اللي حكمت عليه ظلم وعطوه إعدام في المحكمة من سنتين بعد قبضت على عصابة بتهمة تهريب ممنوعات وارتكاب جرائم ولما جيت تقبض عليهم في واحد منهم قتل ضابطين اللي على الأغلب كان واحد منهم صديقك المقرب المهم مسكتو مجموعة وكان منهم زوجي الله يرحمة اللي مسكوه ومكانش له ذنب في أي حاجة والمجرمين هذوما نحبسو كم شهر وطلعو كلهم برائة كيف عاد الله أعلم من طلعهم وراجلي هوا الوحيد اللي خليته بتهمة قتل الضباط ومات اعدام ومن زعلي عليه مات ولدي قبل مايجي على الدنيا مننكرش انه هوا اشتغل معا العصابة بس مكانتش شغلته غير انه ينقل في البضاعة وحجات زي هك وياخذ عليهم بش يقدر يصرف عليا وكان بيسيب الشغل هذا في أقرب وقت ومن يوم ما مات ونا ناقمة عليك وحالفة ناخذ حقي منك وعرفت انه هذي كانت أحسن طريقة بش نحرقلك بيها قلبك زي ماحرقت قلبي على حبيبي وزوجي وعزوتي مننكرش اني حاسة بالذنب واني خنته وتزوجتك بس كلة بش نشفي غليلي منك ونقهرك كيف ماقهرتني وعلى فكرة كل حاجة خططتلها من قبل وأوراقي لعبت فيهن وزورت حتى أوراق الناس اللي ادو بدور العائلة طبعا عند خبير تزوير معروف لدرجة انك مشكيتش واحد في المية انهن مزورات حتى الحادثة اللي صارت وبسببها جبتني المركز وبعد تسكر باب المكتب علينا ومحد فتحة هذا كلة كان مخططات بس انت سهلت عليا واجد مننكرش وخطرها مبروك برائة بنت عمك اللي كنت تحبها ومقبلتش بيك اصلا بصراحة متستاهلهش انا عارفة انك ماخسرتش شي مادي يعني هلك قاعدين شغلك قاعد حياتك قاعدة بس انكسر قلبك اللي حبني وهنقعد جرح اتعاني منه عمرك كلة كيف مادرتلي مستحيل اترد كيف قبل عارفة ومستحيل وجعك هذا تنساه عارفة انك قاعد تقرا ومصدوم ومش مصدق حقك على فكرة انتمنى منشوفكش لا على خير ولا على شر
"أنغام" "
سيف:ضربات قلبة زادت عيونه انحمرو مكانش مصدق اللي قاعد يقرا فيه معقولة معقولة نطلع مغفل للدرجة هذي كيف سمحتلها تضحك عليا وانا ما نندري على شي كييييف وضرب على الدومان بقوة وقعد ايعيط بصوت عالي حبيتهااا اقسم بالله حبيتهااا ليش هكي ليييييييش وطلع بأعلى سرعة ومنتبهش للبطاح اللي طلع قدامة فجأة وصار حادث شنيع......
____________
رماح:ها شن رأيك تمام هكي عجبتك المستشفى
غدي:بفرحة تمام بكل أخرى
رماح:كلمت سحاب تو اتجي وتوريك شن مزال وتبدي شغل اهي جت
سحاب:بابتسامة اهلين دكتورة غدي نورتي وسلمت عليها
غدي:اهلين سحاب كيف حالك
سحاب:الحمد لله بخير خلاص رماح تمام شوف شغلك ونا تو نقعد معا غدي
رماح:تمام هي سلام انتلاقو بعدين
سحاب:تمام بجد فرحانه انك بتشتغلي معانا بعدك رماح قالي انك شاطرة بكل 😍
غدي:ضحكت بخجل شكرا
سحاب:تعالي معايا هذا دولابك تمام وهذا دبش المستشفى كملي انتي وتو نرجاك برا بش انشوفو المرضى وطبعا انتي استاذتي هنا ونا المتدربة
غدي:ههه تمام هي خمس دقايق
وفعلا خمس دقايق بالضبط وغدي لبست لبس المستشفى وفوقة البالطو والسماعة 👩⚕️
وطلعت هيا وسحاب وتعرفت على المرضى اللي بتكون مسؤولة عليهم فترة العلاج
