#مثلث_برمودا
الحلقة 18
بقلم PULSE
(BS.AM.YA)
رماح حس بوعد ارتخت وهيا في حضنه بعد من عليها شوية وحاول ايوعيها
رماح:وعد وعد وعد ردي عليا لا يا وعد متسيبينش وععععععععد
وتوفت وعد وكان أسوء يوم في حياتي دفنتها بيديا مش عارف كيف طاوعني قلبي ونزلتها في القبر بيدي حطيتها في المكان المظلم اللي بتقعد فيه وحيدة حاولت انتماسك قدام الناس اللي قعدت
تعزي، عمي اللي كان يواسي فيا وهوا يبي من يواسيه على فراق بنته وحيدته أول ما فضت المقبرة انهرت قدام قبرها طحت على ركبتي كرعيا مكانوش شايليني
رماح:وهوا يبكي ليش يا وعد ليش سيبتيني انكمل الطريق بروحي معا من بنكمل طريقي توا يعني خلاص حوشنا حياتنا اللي تخيلناها معا بعضنا من بيعيشها من ياوعددد
وكانت الفترة اللي بعد وفاة وعد أصعب فترة في حياتي سيبت حوش خالتي وعشت في حوشي انا ووعد سنه كنت انتخيلها في كل زاوية انتذكر ايامنا ويوم ما أصرت اني نجيبها اتشوف الحوش كان قلبها حاس انه مش هنعيشو فيه معا بعضنا 💔
بعد كملت السنه لملمت كل ما تبقى من ذكريات وقررت انهاجر
نردو للحاضر
رماح:وهذي هيا قصتي معا حبيبتي وعد
غدي:تمسح في دموعها هذا كلة عشته وجعتني بكل ماتوقعتش اتكون القصة واعرة هكي
رماح:خلاص يا هبلة ليش تبكي توا محكيتلكش بش تقعدي تبكي الله يرحمها توفت لها توا 4 سنين
غدي:كيف تبيني منبكيش أي حد يحس بيبكي الله يرحمها
رماح كان خايف يضعف معا دموع غدي ويقعد يبكي لأنه هوا لو مرت عشرين سنه احساسة ناحية وعد مستحيل يتغير
رماح:باه اسمعي هذي مرة وحدة اسمها علياء كبرت قعدت على الواو
غدي:ضحكت من بين دموعها هذا وقت حناطتك
رماح:باهي اسمعي هذي مرة وحدة اسمها دارين خبطت في الساس قعدت كل دار بروحها
غدي:ابتسمت رماح انا نهنيك على صبرك ووفائك لوعد انت انسان كويس وفي حجات لو تخليت عليهن أكيد وعد بتقعد فرحانه أكثر و انشالله ربي يجمعك بيها في الآخرة
رماح:بلع ريقة يعني صح نقدر انشوفها في الآخرة
غدي:أكيد بس انت راجع نفسك وفكر كويس هتعرف كيف ربي يقدر يجمع بيناتكم هي نستأذن انا منتبهتش على الوقت واستمتعت بالقصة أو بالماضي لأنه هذا حقيقة تصبح على خير
رماح:هز راسة بمعنى تمام وكان ايفكر في كلام غدي
غدي خشت من هنا وهاشم خش من الباب اللي برا وقرب من رماح
هاشم:وخير انشالله شن الموضوع المضحك للدرجة هذي صوت الضحك سمعته من برا
رماح:امتى جيت انت
هاشم:من لما قعدت اتنكت شن الموضوع؟
رماح:يستفز فيه و انت ليش محروق عادي يعني انبصرو معا بعضنا شن تعنيلك بش تهتم
هاشم:تنهد صاح شن تعنيلي
ومشا وهوا معصب هاشم كان واثق في رماح انه مستحيل ايفكر في غدي لأنه عارف رماح قديش ايحب وعد ومخلص بحبة لها حتى وهيا ميته بس هاشم مكانش يعرف انه نوح هوا اللي يحب غدي 💔
بعد مرور يومين
غدي معاش طلعت من دارها بكل ومعش اختلطت بيهم تبي تتجنب نظرات نوح اللي فاضحته وانه تشوف هاشم اللي قاللها انه ايحبها وهوا مش في وعية هيا متعرفش مشاعرة شنو بالضبط لكن متبيش اتخرب الأمور بينهم والافضل انها تبعد لين يتم الإفراج عنها
