طلعو من الصالة و هم بضحكو بي اعلى صوت
متاب قالت لي حازم:يعني انا كنت قايلة بس اماندا الفاكة منها لكن طلعت انت ماشاءالله اكعب منها😂
حازم:صدق الي قال من عاشر قوما اربعين يوماً صار مثلهم
بسمة:بجد كان يوم حلو من اولو لي اخرو و حازم،لازم تورينا قلت شنو لي العروس في اضانا
حازم قليهم:يشباب خلوني في حالي لو سمحتو 😍
اماندا عاينت ليه بي طرف عينا و حدرت ليه و قالت:انا م حخليك
حازم:م تغيري يا بيبي بس مشيت قلت ليها في بت معزباني شديد و م عاوزة تقول الفي قلبها حنت على وضعي و زعلت معاي 😔
كلهم بقو يعاينو كدا🌚 اماندا قالت ليهم:هوي انتو بتعاينو لي ليه
حسن قليه:و دي منو البت المتعباك دي 😉
حازم:احسن م نحرجا يجماعة اسكتو حسا بتركب لي فوق راسي
اماندا:تحرجني شنو انا م بتحرج هيع
حازم :حسا في زول وجه ليك كلام؟الفي قلبو حرقص براه برقص🌚
اماندا:عاين ارح وديني البيت سريع م عاوزة معاك قلة ادب فارغة
ركبت العربية و خلتوم في الشارع ،رؤى و زين مشو بي عريبة و بسمة و عمر مشو بي عربية و متاب ايمن و حازم و اماندا و حسن و صبا مع بعض
—————
زين و روى دخلو العربية و هم كانو بضحكو
زين قليها:اخوكي د والله م نصيح
روى ضحكت و قالت ليه:دلال دي امي كانت تمووت و تعرسا لي حازم بس حازم طبعا رافض😂
زين:اخير ليه داير بي العرس شنو
رؤى :اجي كيف يعني، العرس د احلا شي يحصل لي اتنين
زين:م هو حلو في بداياتو لحدي م تولد و تنكد عليه باقي عيشتو
رؤى:حيبقا احلا نكد لو البتنكد عليهو زولة بحبها .
زين ضحك بي استهتار و قليها:حب شنو يا رؤى؟حتحبي و حتخشي في علاقات كتيرة في النهاية حتعرسي ولد عمك
رؤى و هي بتعاين ليه بي نظرات يع م كنت قايلاك بتفكر كدا :يعني انت م بتأمن بي الحب؟
زين:حب قال😂
رؤى:م كنت قايلاك بتفكر كدا!
زين:والله يا اماندا انا م عندي معاه مشكلة لكن بحس بيه م بستمر و صرف قروش و اهتمام على الفاضي في النهاية تجي تقول ليك معليش نحن م حنقدر نكمل مع بعض عشان شنو ؟عشان اتفه الاسباب
قال كلامو الاخير د و هو معصب
رؤى ضحكت و قالت ليه :شكلك طالع من علاقة ممرمطاك مرمطة شديدة😂لكن م تخلي دي تجربتك الوحيدة بعد مرات نحن بنكون معمين و بنختار الزول الغلط و بدون م نحس بتحصل مشاكل كتيرة و بعدين كل زول بلوم الطرف التاني و هم م بكونو عارفين انو الشخص د م هو المطلوب انك تكمل معاه باقي حياتك د م هو البناسبك ،انا بين اولاد الحرام و الحلال كلهمم اخترت طلال و شوف وصلنا لي شنو؟لي نقطة انا م كنت اصلا خاتاها في حساباتي لمن دخلنا في علاقة ،و بلعكس لو سألتني مستعدة تعيشي قصة حب تانية و تخوضي تجربة تانية حقول ليك اي طبعا!م حخلي تجربتي الاولى،الفاشلة تتحكم في مشاعري و في مستقبلي ابدا حأتخذا كأنو د درس اتعلمتو جديد خلاني اخد بالي من نقطة معينة عشان ما اعيدا في علاقتي الجاية،و الحب بدوم لكن طالما م انت خاتي في بالك عكس الفكرة دي ممكن ينتهي حتا لو م كان في سبب واضح .
زين:كلامك على عيني و على راسي بس مستحيل زول يقنعني انو الحب د ممكن يدوم او ...
رؤى قالت ليه:او ممكن نقفل السيرة عشان رفعت لي ضغطي؟
زين ضحك و قليها:بس كدا؟ انتي أمري بس و انا بنفذ
رؤى ضحكت و قبلت على الشباك و فضلت ساكتة و بتفكر،يعني امالا كلها اتحطمت من انو هي و زين يكونو مع بعض، حتا خلاها ولا تفكر في نقطة انو تحبو او تتعلق بيه .
——————
حازم نزل صبا و متاب و ايمن و فضلو هو و اماندا و حسن ،حسن حسا انو حازم و اماندا عاوزين يكونو براهم فقال لي حازم:ابو النسب وقف هنا عاوز اعمل كم حاجة و برجع البيت كداري اصلا م بعيد
حازم:بنتظرك اعمل حاجتك و تعال
حسن:لا لا انا حطول و عاوز ارجع بي رجلي اشم هوا شوية
حازم:تكرم عيونك معليييم
حسن ضحك و قليه:وحياة ديني انت الليلة م نصيح
حازم وقف على جمبة و قليه :انزل و انت ساكت
حسن نزل و اماندا كانت ساكتة و بتعاين لي حازم
حازم قليها:اماندا حياتنا نحن الاتنين في خطر خلي بالك
اماندا و هي بتضحك:يا حازم كدي قول بسمالله مالك😭
حازم:شغلي مخك د شوية و بتفهمي مالي،هردتي لي جوفي خلاص
اماندا :هردت ليك جوفك قلت لي😭
حازم:و هو برفع ايدو عليها:اي و لو علي حسا اضربك لحدي م تتوبي
اماندا:د زعل شديد د ها😭
حازم:اخلاقي منك واصلة السما فيا ريت تسكتي
اماندا و هي بترفع حواجيبنا:بالله؟
حازم:جادي معاك انا
اماندا:طيب انا حسكت لاني م عارفاك بتقول في شنو فعشان كدا وصلني بيتي انا تعبانة😍
حازم و هو بمد ليها يدو:م نفسك ترتاحي هنا؟
و اشر على صدرو
قالت ليه بعد م وشها قلب طماطم:بكتم ليك نفسك و بتموت بعدين يقولو اماندا قتلت حازم
حازم ضحك و قليها:م اصلا انا متاكد انتي الحتقتليني يعني يا حتجيبي لي الشلل يا حترفعي لي ضغطي يا حتجلطيني
اماندا:اقتلك انا احسن من م يقتلك الغريب ولا شنو يا بيبي😚
حازم:بيبي و اماندا؟عيانة انتي ؟
اماندا:خليني م تركز معاي 😭
حازم سكت مسافة و بقا بعاين ليها في عيونا وهي بتعاين ليه و بتقول ليه:لا م تعاين لي كدا بتجهجهني
حازم:والله؟
اماندا و هي بتضربو في راسو جادة معاك انا
حازم:م قلتي لي رأيك شنو في الكانت حتكون مرتي ههيهي
اماندا :سمحة ماشاءللله عقبالك انت كمان
حازم:عقبالنا لو سمحتي
اماندا:م بعرس لي زول عندو ازمة
حازم:ليه انشاءلله؟
اماندا:عشان لو يوم نفسو قام شديد و البخاخ كان خلصان و م قدرت اشيلو عشان هو ضخم و مات حيتم اولادي و انا قلبي م بستحمل الحاجات دي والله 🦦
حازم قعد يضحك و قليها:تعبت من افلامك دي والله لكن م تخافي بخت في اي حتا بخاخ عشان م اسيبك و اسيب اولادي
اماندا:انت قررت خلاص عاوز تعرسني؟
حازم:اي الفي شنو و الماف شنو وريني بس
اماندا: و هي بتضربو في راسو :م قلت م بتعرس ليك شافعة بتسك مواضيع تافهة
قليها بعد كلاما د طوالي و بي نفس نبرة صوتا :لكن م قلت اماندا
اماندا سكتت و ضحكت بعدين عاينت لي الشباك تاني رجعت عانيت ل يحازم و قالت ليه بي خجل :ي زول م تعاين لي كدا
حازم:بقيتي تخجلي كمان ،كلام والله
—————
صبا دخلت البيت و طوالي على اوضتا عملت حسابا كويس انو ماف زول يشوفا بي الفستان د،دخلت الحمام بي مزاج فكت شعرا و دخلت تحت الدش و طلعت لابسة البجامهة و بتنشف في شعرا سرحتو و عملتو ضفيرتين و لبست شرابا و اتكومت في السرير كدا و جرت عليها البطانية كان بالا رايق كدا و مبسوطة جدا جدا جاية تنوم امها دخلت ليها قالت ليها انو ابوها منتظرا في الصالة
مشت قعدت جمبو و قالت ليه :اي يا ابوي انشاءالله خير
مجدي:خير يا بتي
صبا عاينت لي ابوها مسافة و قالت ليه:اها
مجدي:ودعمك اتقدم ليكي و قال بحبك و بريدك و عاوزك
صبا ضحكت و قالت ليه:اكيد انت قلت ليه ماف طريقة
مجدي عاين ليها بي استغراب:و ليه اقول ليه كدا ؟شاب ممتاز و عايش برة و بريدك دايرة اكتر من كدا شنو؟؟
صبا:و قرايتي ي ابوي؟
مجدي:قال م عندو مشكلة تقري و تشتغلي كمان بس حتقري برا مكان عايش هو
صبا:اسيبكم و اسيب حياتي و جامعتي هنا و امشي برا؟اصلا انا م جاهزة لي العرس و غير اني م جاهزة اشرف زول معقد و م بشبهني و م بحبو
مجدي:حتعرسيه يا صبا انا م جاي اخد رأيك انا جاي اكلمك بس ،ولو بتفكري انو ممكن انتي و حسن تعرسو شيلي الفكرة دي من راسك ولا تفكري فيها بينك و بين نفسك فاهمة
صبا كانت عاوزة تبكي بس مسكت دموعا دخلت جوة الاوضة و بكت قدرتا كانت حاسة بعد م حياتا هي و حسن ظبطت في شي و حيجي يخربا ،كانت خايفة تكلم حسن بي الموضوع د خايفة شديد ،عارفة لو كلمتو م حيحصل خير قعدت تبكي لحدي م نامت
—————
صباح اليوم التاني
كل زول كان بجهز نفسو عشان يمشي الحديقة كانت الساعة ٨ صباحاً
حازم و حسن و اماندا نزلو و دخلو جوة الحديقة حسن طلع برة و فتح العربية كان ناسي تلفونو قبل لقا مجدي جاي عليه من بعيد حسن ملامح وشو كلها اتغيرت و كان ماسك نفسو و بهدي في نفسو و بقلو ليها يا نفسي روقي جا وقف قدامو و ضحك و قليه:الشوارع نضفتك
حسن:ما كان فيني وسخك كلو يا مجدي
مجدي سكت مرة وحدة بعدين قليه:على العموم شفتك قلت اجي اعزمك عرس صبا في النهاية انت م غريب اتربيتو في بيت واحد
حسن مسك مجدي من قميصو و قربو عليه بي زهج :كدي بس اعمل كدا يا مجدي و شوف انا حعمل فيك شنو
مجدي:نزل ايدك دي
حسن و هو بقربو من قميصو عليه اكتر:وحياة ديني العرس د يتم الا اقتلك انت و العريس و ادفنك
مجدي:قايلني بجدع بتي لي زول مريض زيك؟
حسن :و منو الجايب لي المرض غيرك يا معفن ،و حياة ديني الا اكلم صبا بي العملتو
مجدي:كلما لكن هل حتصدقك ؟
حسن فكاه و ضحك في وشو بي استهتار:صبا لو قلت ليها اقعي في النار بتقع و انا ممهد ليها اصلا انو انت عامل مصيبة ،صبا م بتصدق غيري يا مجدي شوف و وريني اذا حتتراجع ولا لا
مجدي:م حتراجع عن قراري و لو داير امشي كلما وريني حتصدقك كيف
حسن لصق في وش مجدي بنية رمتو بعيد و مع رميتو ديكي جرا و خلاهو
حسن كان نفسو قايم و ايدو بترجف بي طريقة م عادية قعد في الارض جمب العريبة و ختا يدو في راسو بي خوف لمن حسا انو صبا ملجأو الوحيد حتروح منو بقا بكورك بي اعلا صوتو .
صبا كانت جاية على الحديقة و شافت الزول القاعد في الارض د و حاولت تعرف د منو و كل م تقرب ملامح وشو بتظهر لمن لقتو حسن جرت عليه و زحت يدو من راسو و بقت تسالو:في شنو حسن انت كويس
حسن كان بعاين ليها و ساكت و كل م تهبشو بزح منها صبا بقت تبكي و قالت ليه:حسن مالكك يا حسن م تقطع لي قلبي
حسن:كنتي عار انو ابوكي دايرك لي اشرف و م بتوريني ؟
صبا بكت زيادة و جاية تمسك يدو زحاها منها
صبا:حسن م تعمل فيني كدا والله م بقدر
حسن قليها:انطقي يا صبا
صبا:والله العظيم والله العظيم يا دوب عرفت امبارح بليل بعد رجعت والله م كنت عارفة و ابيت اكلمك عشان م يحصل ليك الحاصل ليك حسا دا😭
حسن:كضابة يا صبا كضابة ابوكي حدد يوم العرس و انتي ..
صبا قاطعتو :حدد العرس؟😳
——————
حازم و اماندا قعدو في الارض و اماندا قالت:خلاص بما انو لسا م جو ارح نقرا الدفتر
حازم قليها:يعني يا اماندا انا كل م اجي اقعد معاك و نلقا فرقة نتونس تقولي لي دفتر و م دفتر
اماندا:نتونس في شنو عليك الله كلامنا زاتو خلص كل يوم في وش بعض و تقول لي نتونس يا ود هي ها امسك اقرا لي و انت ساكت
حازم :اقرا ليك و انا ساكت!؟
اماندا:المهم انت فاهمني صح ؟بس يلا اقرا لي بدون كلام🤭
حازم:بدون كلام؟
اماندا قالت ليه :خلاص جيب الدفتر د عاوز تتعاور لي و انا م فاضية ليك
اماندا جاية تشيلو منو رجع الكتاب لي ورا و بقو قراب من بعض شديد اماندا طوالي زحت بعدين قالت ليه:قلة ادب فايتة الحد خليت ليك الكتاب زاتو يا ابو النسب
حازم قليها:ابو النسب؟خلاص سمعتيها من حسن حتجي تكرهيني بيها؟
اماندا:لقيت ابو الزوز قدم و ابو النسب حلو قلت لي لا😼
حازم و هو بنكش ليها في شعرها :شافعة لئيمة خلاص
اماندا:لئيمة لكن بتحبني
حازم:ماف شك طبعا
اماندا ضحكت و فتحت الكتاب و بدت تقرا
——————
عن وردي لمن قال :
"بعيد منك يموت صوتي و يغيب فرح الزمن يكمل 🖤"
كان اسوأ اسبوع في حياتي لمن فرح فجأة اختفت لا عرفت ليها خبر لا عرفت ليها طريق ..اليوم الاول كنت في حالة قلق ليه م جات الجامعة مع انو هي كانت حريصة م تفوت يوم ،م ضربت لي حتا ورتني سبب غيابا و انزعجت من الحركة شديد فقررت اضرب ليها انا و الخلاني اتوتر زيادة انو تلفونا م بخش معاي .
القلق اتحول لي خوف لمن تاني يوم مشيت ليها بيتوم و ملقيتا ضربت الباب كذا مرة ماف زول فتح رجعت بيتنا في هدوء لكن جواي كانت في حاجات كتيرة و اصوات كتيرة و افكار كتيرة كانت قادرة تقتلني فضلت باقي اليوم كلو في محاولة اني اضرب ليها او اوصل ليها لكن تلفونا لسا م كان خاشي معاي
اليوم التالت الخوف اتحول لي رهبة مشيت من الصباح بت جمب باب بيتوم لا في زول طلع لا في زول دخل الخوف كل ما ليه يزيد لمن طلعت في راسي فكرة انو قاسم يكون عامل ليها شي لمن فقدت الامل و عرفتها هي مافي البيت رجعت بيتنا و كملت قلقي و خوفي عليها هناك
رابع يوم من خوف و رهبة اتحولت لي حاجة مخيفة قابلة لي الانفجار يعني انا لي اول مرة اكورك و اتنرفز في اخواتي او اعلي صوتي على امي لاحظت انو حالتي النفسية رجعت تاني تتدهور و هدوئي بقا اكتر من زمان و بقيت معزول خالص بمرق استناها جمب بيتوم بي الصباح و برجع بليل
خامس يوم بقيت زول تاني خالص م بطلع من الاوضة نهائي م باكل م بعمل اي شي حتا الجامعة بقيت م بمشيها كنت عبارة عن جسد و روحي مع فرح تفكيري عقلي اي شي كانو معاها هناك في الحتا الانا ما عارفا هي وين بظبط و فكرة انو هي ماتت كانت بتموتني كل دقيقة ،و كل يوم كلمة حب بتوضح لي اكتر لسا م قادر اشرح هو شنو يعني معقولة هو الغيرني لي الاحسن و رجعني لي نفس النقطة الانا كنت فيها و اكعب؟
اليوم السادس بعد مكالمات كتيرة مني ليها و تلفونا لسا م داير يخش رميت التلفون من يدي كسرتو و فقدت اعصابي كلها و تعب الخمسة سنين كلو راح بقيت زول عصبي مفترس ماف زول بتكلم معاي خوفاً اني اعمل فيه شي ..
اليوم السابع مشيت من الصباح قعدت جمب باب بيتا و لمن خلاص حيلي اتهد قمت من هنا و بقيت ماشي في الشارع و مستغرب شديد لي الحالة الانا وصلت ليها دي م كنت متخيل زول يأثر فيني كدا وقفت و عاينت قدامي بي خلعة و لقيت فرح و فجأة مشاعري اتلخبطت شديد بين اني مشتاق ليها و عايز اترمي في حضنها و ترجعني لي الانسان الخلتو قبل م تمشي وبين اني عاوز اكورك فيها و افرغ فيها غضبي و الومها على الوصلتني ليه و عن شعور الخوف الزرعتو جواي ...
اماندا قفلت الكتاب و قالت:ههه كلعادة ورقة مقطوعة شكرا يا الكاتب مفستورما شكرا على حراق الروح❤️
حازم:في لغز؟
اماندا:اي بس نحلو بعدين لمن صبا تجي بحب ذكائها د
حازم:عارفة زكرني زمان لمن سافرتي بدون م تكلميني و كنتي قافلة تلفونك اسبوع
اماندا ضحكت و قالت ليه:معليش لي المرة المليون 😭
حازم:اسبوع و كنت متأذم شديد و خايف طيب لو اتفرقنا ممكن يحصل فيني شنو؟
اماندا ضربتو و قالت ليه:حسا جايب السيرة لشنو ،حسي ناس امين بقولو امين الله يازاك
حازم:الله الله م بتقدري تعيشي من غيري
اماندا:اكيد يا حازم ،منو العندي غيرك امعطو؟😔
حازم:جادي انا
اماندا و هي بتمسك يدو:حازم انا م بقدر ابعد عنك يومين تقولي بتقدري تعيشي حياة كاملة من غيري؟فاهم يعني شنو انت بقيت دنيتي؟انا و انا جمبك بحس بي امان بحس بي انو عندي سند اسند عليه عندي صاحب اخو راجل اتكل عليه !انت الوحيد الاتقبلتني بي كل حالاتي عارفة اني زولة انانية و م قاعدة اديك نفس البتديني ليه بس والله مكانتك قي قلبي م بقدر اوصفا..حضنتو و قالت ليه:لو في يوم قلت حاجة و جرحتك اعفي لي والله م بكون قصدي ،زعلك م بهون علي
حازم ضماها عليه اكتر و قليها:و انت كمان اذا قلت شي كدا ولا كدا زعلك اعفي لي .
اماندا زحت منو و مسحت دموعا وقالت:القصة مأثرة فيني شديد😔
حازم:احلا تأثير البخلي اماندا تقولي كلام جميل زي د😌
اماندا:اهىئ م تتعود حبيبي
مهند ولد الطاهر سلم عليهم حازم قام وقفو وقليه:ماشي الجامعة ولاشنو؟
مهند:اي لاحق امتحان
حازم:علي الطلاق الا اوصلك اها
مهند :لا لا بمشي براي الجامعة م بعيدة من هنا
حازم:بتقرا وين
مهند :هنا في جامعة (...)
حازم يا زول؟والله كويس عديل و بتقرا شنو.
مهند:طب اسنان
حازم:تمام والله ..و هو صعب؟؟
انا هنا خلاص شكيت انو مهند هو الكتب الدفتر غير انو هيئة جسمو زي الوصفا لي الطاهر لمن سالتو اذا في زول دخل الحديقة في اليوم اللقيت فيه الدفتر،اي حازم نفس الهيئة برضو بس برضو شكيت في مهند الحديقة حقت ابوهو و عايش فيها و ساكن يعني م بعيد يكون هو الكتب الكتاب !بس الأنا ما فاهامو هو غرضو شنو من انو يعمل كدا؟غير انو م عندو اي مصلحة في البعملو د غير حراق روح و تعب على الفاضي و حتا نحن م بنعرف بعض العرفة الياها عشان يعمل كدا .
استغربت شديد و بجد بقيت م فاهمة البحصل بعد م كنت شاكة في حازم مية في المية مهند شال نص الشك د ...
عاينت لي بيت الطاهر و دخلت جوة لقيت الطاهر خاتي كباية الشاي حقتو و فاتح الجريدة و خالف رجل على رجل و البيت كان مكركب شوية اول م شافني طبق الجريدة و ختاها في الطربيزة جمبو ،قلي :جاية تعملي شنو؟مش قلت ماف زول يدخل البيت
اماندا:هدي خلاص يا الطاهر طالعة خلاص
اماندا و هي بتطلع لمحت ورقة قاعدة في التربيزة القدام الطاهر، اماندا مسكت الورقة دي مسافة و كان ظاهر عليها علامات الاستفهام .
#يتبع
