عمر(وهو بحاول ياكلها):اماندا ممكن اسالك سؤال؟
اماندا:اسال+يدي م مشلولة عشان م اقدر اكل بس انا م نفسي.
عمر:لا ماف كلام زي دا لو م بتاكلي براك حاكلك انا بالغصب عشان هسي حتجي واقعة.
اماندا:طيب..المهم سوالك شنو؟
عمر: ح تصلي وين؟
اماندا(وهي بتدخل لقمة في خشمها):في شنو؟
عمر:في الدفتر.
اماندا:انت كمان زهجت وبقيت زي حازم؟
عمر:م عشان زهجت او كدا بسالك بالجد يعني.
اماندا:م عارفة والله.
عمر:يعني انتي ليه مصرة تعرفي القصة كدا؟ اوك انا قريت القصة وهي حلوة وحماسية واي شي بس م للدرجة ديك البتخليك تخلي اي شي عشانها! +بعد تنتهي القصة حيحصل في حياتك شنو؟ ليه الا تعرفيها للنهاية؟
اماندا:غير الفضول يعني انا حاسة انو القصة دي بتشبهني!
عمر:القصة مختلفة عنك تماما بتشبهك من ياتو ناحية؟
اماندا:م انو بتشبهني يعني بس في حاجات كتيرة فيها بتشبه تفاصيل واشخاص في حياتي.
عمر:زي شنو؟
اماندا:زي انو الولد كان بقرا علم نفس زيي! والبت كانت في بورتسودان زي حازم! وايسر بتكلم زي حازم! وزي انو فرح هدفها انها تنقذ زول زيي! وتفاصيل كتيرة يمكن تكون صغيرة وماف زول ملاحظ ليها بس بتشبهني شديد!
عمر:حتعملي شنو يعني؟
اماندا:انا حاسة يعني انو الكاتبها دا بعرفني او قريب لي + زول عارف اني فضولية وححاول اعرف ب اي طريقة..ومرة اتكلم معاي بصيغة البت! عرف كيف انو الدفتر دا حتقراهو بت ما ولد؟ المهم انا لازم اعرف الكتب القصة دي منو.
عمر:لاحوووللل..يعني حننتهي من موضوع الدفتر حنبقى في نعرف هوية الكاتب؟😭
اماندا:يس😗.
عمر:حسبي الله.
اماندا:انا قلت عمر م بزهج مني م كنت عارفاك زيهم😔.
عمر:م زهجت منك ولا اي شي بس يعني الكلام دا حياخد كم وجامعتك وحاجات كتيرة ي بت يمكن في الاخر وقتك يكون بضيع ساي وما تصلي ل شي.
اماندا:لا ح اصل ان شاء الله وححاول انجز سريع سريع.
عمر ختا الصينية جمبها و قليها:اها اسيبك ترتاحي
اماندا هزت ليه راسا بعدين قالت ليه:عمر قبل م تطلع اديني التلفون من الشنطة حقتي
عمر:يبت ارتاحي شوية
اماندا:بس عاوزاه يكون جنبي عشان اظبط بيه المنبه
عمر مدا ليه التلفون و اماندا فتحتو و بقت تفتش في قوقل على رقم تلفون الفندق الفي قرية عروس ، و لمن لقتو ضرب عليه على طول و اول م ردو:
السلام عليكم
-عليكم السلام ،كيف اقدر اساعدك .
اماندا:عاوزة بس استفسر عن حاجة
-اتفضلي
اماندا:قبل يومين راجلي حجز اوضة عندكم تقريبا الاوضة رقم سبعتاشر
-امم دقيقة خليك معاي ...ايوا اها
اماندا:بس عاوزة اعرف حجزا متين و الساعة كم بظبط
-انتظري دقيقة ،قبل يومين يا استاذة
اماندا:بس عاوزة اعرف الزمن بظبط
-الساعة اربعة
اماندا:حجزا لي كم يوم؟
-يوم بس يا استاذة
اماندا قفلت الخطو بقت محتارة اليوم داك لمن شافتو طالع من البيت كانت الساعة وحدة و من بيتوم لحدي هناك تقريبا زي تلاتة ساعات غير انو حجزا لي يوم واحد ،الشكوك حول حازم بدت تزيد شديد ختت التلفون جمبها و نامت بعد تفكير انو ليه حازم يعمل د كلو!و طيب لو د هو بجد لي م عاوزني اكمل الكتاب ؟
———-
-صباح اليوم التاني
في جانب ايمن
مشى ليها الجامعة عشان يسوقها..كانت واقفة مع مجموعة من الناس اول م شافتو بقت تتونس مع الولد الجنبها..هنا ايمن عروقو كلها ظهرت ورغم انو عارفها بتعمل كدا عشان تغيظو بس اتغاز من الحركة دي..مسكها من يدها وركبها في العربية.
متاب:مالك؟
ايمن كان ساكت.
متاب:مالك انت ليه سايقني بالطريقة دي ممكن افهم؟
ايمن:حتسكتي لحدي م نصل م عايز اسمع حسك دا.
متاب:اجي الجن ولا النفسيات!
ساق لحدي م وصلو الحديقة..شال مقص الاشجار وبقى بقص.
متاب:من متين انت قاعد تشتغل مع العمال؟
ايمن:م عندك شغلة.
متاب:هيي في شنو انت مالك ي زول؟
ايمن رمى المقص من يدو وجا عليها وهو هايج:قايلاني م فهمت الحركة العملتيها قبل شوية دي؟
متاب:حركة شنو؟
ايمن:م تسوي غبية..قعدتي تتونسي مع الولد وانتي شايفاني واقف!
متاب:اجي انت راجلي وانا م عارفة؟
ايمن:اي راجلك!
متاب:عاين امشي تم شغلك احسن.
ايمن(اخد نفس وقال ليها):متاب انا بحبك.
متاب:مور يقلبي😗.
ايمن:انا جادي على فكرة!
متاب:جادي كيف يعني!
ايمن:عديللل كداا!
متاب:ايمن بلاي م تضحكني وشوف العمال ديل.
ايمن:عمال في عينك ي بت وبعدين البضحك شنو؟
متاب:ايمن وبحب؟؟؟ وكمان بحب منو؟ انا دي؟؟؟ حسكت ي شافع شوف ليك شغلة غيري.
ايمن:متاب انا م بهظر في الموضوع دا ممكن تبطلي استهتار؟
عاينت ليهو لقت ملامحو جادة يعني هو بالجد طلع بحبها!
ايمن:ها قلتي شنو؟
———
-في جانب اماندا
صحت من الصباح وقررت انو ما حتنزل نهائي عشان م تلاقي حازم وتتغاز من حركاتو لانو لاحظت انو زعلها منو هو سبب مرضها:لو هو الموضوع م هاميهو انا كمان ما حيهمني ولا حزعل نفسي على الفاضي..
عمر جا داخل ولقاها يادوب قامت:ها يلا قومي جبت ليك الفطور.
اماندا:م جادي طبعا!
عمر:هيي م تصدقي اني عملتو..طلبنا اكل وجبت ليك بس.
اماندا:اي قول كدا لاني اتخلعت😭.
عمر:يلا خلي النقة وقومي.
اماندا:طيب.
دخلت الحمام استحمت واتسوكت وطلعت.
عمر:اها الليلة كيف؟
اماندا:كويسة والله.
عمر:طيب لو كويسة ليه م نزلتي للاكل؟
اماندا:تعبانة م كان نفسي انزل.
عمر:اممم طيب اكلي.
اماندا:دقايق طيب اجيب الدفتر عشان تقراهو لي.
عمر:ي كلبة بقيتي تستغليني.
اماندا:يعني شوف الصباح الجميل دا والدفتر وصوتك السمح اللههه بسسس.
عمر:اي حنكيني😏.
اماندا:هوي ها ي شافع ابدا.
عمر:سمح ي بتي.
وبدا يقرا ليها الدفتر.
—
"وجودك يمنحني الطمأنينة، وينير لي الطريق، وينشر السلام في مدينتي المتعبة!"
-
ايسر وصل فرح على البيت وقبل م تنزل قاليها:الليلة اسعد يوم في حياتي ما بتصدقي فرحت قدر كيف!..من الليلة حنرمي الماضي ورانا ولا كانو حصل في يوم..انتي م اتزوجتي ولا انا دخلت مصحة زابط؟
فرح:زابط😼.
جات نازلة بس رجعت ركبت العربية بسرعة.
ايسر:حصل شنو؟
فرح وهي خايفة:عاين وراك!
