اذا فهمتي الكلام المكتوب في اخر الصفحة وقدرتي توصلي لي الورقة دي يبقى انتي عرفتي انو مرتي ماتت💔.. طبعا ح تقولي ليه بعمل الحركات دي كلها وليه قاطع الورقة؟ ما بقدر اوريك الجواب هسي بس ح تعرفيهو لقدام..واكيد فكرتي انو تمشي للصفحة البعدها عشان تفهمي القصة بدون م تفتشي الورقة بس صدقيني م كنتي ح تفهمي حاجة وبتشوفي بنفسك! نرجع للقصة..
وقفت في الجملة دي وقالت:دقايق هو عرف كيف انو انا بت؟!
حازم:منو هو؟
اماندا:لا ولا شي ركز في سواقتك.
حازم:اماندا!..لو الدفتر دا بعمل ليك حاجة وبخليك تفكري وتكوني مشوشة خليهو.
اماندا:م بقدر عايزة اعرف القصة.
حازم:اماندا...
اماندا:حازم ما ح تقدر تغير رايي انا لازم اعرف الحصل شنو.
حازم:على كيفك بس بعدين م تجي تقولي لي ي حازم هناي ولا ي حازم هناي.
اماندا:اتطمن ما ح اقول ليك ي حازم هناي..
حازم:احسن.
اماندا:بس ممكن اقول ليك ي حازم هناية😙.
حازم:انتي في زول قبل كدا قال ليك انك ظريفة شديد؟🥴
اماندا:اي عارفة نفسي😗.
وكملت من محل وقفت..
زي م قلت بعد هي مشت انا رجعت لنقطة الصفر..كيف رجعت لنقطة الصفر؟ يعني رجعت لنفس الشي القبل م الاقيها اكيد عايزة تعرفي قبل م الاقيها كنت كيف وبعد م لاقيتها شنو الاتغير؟..زمان قبل م الاقيها كنت هادي شديد وم بعرف اتعامل مع الناس وخاصة البنات..السبب ممكن تحسوهو غريب شوية وخاصة انو نادر في الوقت دا بس انا كنت بخاف على مشاعر البنات شديد وبخاف أأذيهم خاصة اني عندي اخت وبحبها اكتر من اي شي في العالم وبخاف عليها عشان كدا م جربت اقرب من بت ولا اعرفها رغم محاولات البنات حولي..طريقة تعارفنا كانت عادية وعفوية شديد والحصل كالاتي:
كنا في محاضرة والدكتور طلع من الموضوع وقال نتم باقي الوقت ونسة ومنها نعرف تفكير الناس.
الدكتور:الليلة ح اديكم موضوع وخليت ليكم انتو حرية النقاش وتدوني ارائكم ونشوف الصاح منو والغلط منو..
كل الناس وافقت واتحمست عشان طلعنا من جو الكآبة والقراية.
الدكتور:الحب هو شنو؟
الناس كلهم بقو يتكلمو والاجابات تطاقش بس م عارف ليه انا وقفت في السؤال دا كتير! يمكن عشان م حصل فكرت فيهو ولا كنت خاتي الموضوع في راسي؟! بس كنت متاكد من حاجة وحدة اني عايز اشارك في الموضوع دا بالزات واعرف الاجابة!
_ثقة.
الناس كلهم اتفقو معاهو في الاجابة دي بس انا حسيت انها م مقنعة..
انا:اممم مثلا انا مريض ومشيت لدكتور ووثقت فيهو لدرجة سلمتو اغلى شي واللي هي نفسي دي كدا مش ثقة؟ يبقى انا بحبو؟
الناس كلها بقت تضحك.
~(بت معاي):يمكن انت واثق في شغلو م فيهو!
_اي صاح.
انا:كونو انو اثق في شغلو معناها واثق في قدراتو وكيف ح اثق في قدراتو لو انا م متاكد انو ح يبدع في الشي دا؟ وكيف اكون متاكد انو ح يبدع فيهو لو م كنت واثق فيهو؟ ما ح تفهميني بسهولة بس دا نوع من انواع الثقة حتى لو م هو المقصود.
~(وهي بتضحك):فهمتك وسكتني الصراحة.
الدكتور:ماف اجابة تانية؟
•اممم الاحترام.
انا:انا بحترم امي وابوي هل معناها اني بحبهم الحب القاصدو الدكتور؟
~(نفس البت):بس الدكتور م حدد نوع معين!
انا:ي دكتور انت قصدك الحب عامة؟ اذا قصدك كدا معناها اجابتها مقبولة.
الدكتور:انا قصدي الحب العادي البين الذكر والانثى.
~م كنت عارفة قصدك!
انا:طيب نقول انو قصدو الحب عامة انا بحترم استاذي معناها بحبو؟
~خخخ سكتني للمرة التانية.
صحباتها بقو بسكتوها ويقولو ليها جبهتك وشنو م بعرف.
الدكتور:م تسكتوها انا فاتح الموضوع دا عشان اشوف تفكير الناس وارائهم وتحصل نقاشات وكدا وديل اكتر اتنين متفاعلين نشوف نهاية التعريف ح يكون شنو..في اي رأي تاني؟
-ممكن يكون الامان او الملجا؟
*امي ملجاي واماني ليه افتش على زول تاني؟
كنت حاسي اني جادي شديد في الموضوع واي زول بقول كلمة بقيف ليهو في حلقو بس كنت عايز اعرف المعنى!
•الراحة والطمانينة؟
انا:ديل مفردات تانية للامان والملجا وكلهم تبع الام.
~(البت وهي بتتلفت علي):صراحة انا اجوبتهم برضو م كنت مقتنعة بيها شديد بس حاسة انت عندك الاجابة عشان كدا بجادلك.
انا:صدقيني انا لنفسي م عارف الاجابة وبرضو بتناقش ساي!
الدكتور سال البت زاتها:انتي في رايك الحب شنو؟
~اممم م عارفة والله بس اعتقد انو كل الاجابات القالوها تكون في الشخص دا زيادة للشعور بالسعادة وبس.
انا:شعور!
انتهت الصفحة في كلمة "شعور"!
اماندا(مع نفسها):شعور شنو؟ كدا م عرفت التعريف ياخخ..الا ارجع البيت عشان اشوف تكملة القصة في الدفتر!
حازم:م عارف عندك شنو في البيت بس وصلنا.
اماندا:اخخخ الحمدلله.
حازم:البتاع دا بقاك غريبة والوقت كلو بتفكري م معقول.
اماندا:برجع طبيعية بس اعرف الحصل شنو.
حازم:اشتقت لعوارتك!🥺
اماندا:اجي الوقت كلو بتعاور فيك.
حازم:م زي زمان.
اماندا:بكرا بعد الجامعة عندك شي؟
حازم:لا ليه؟
اماندا:بدور اجيب ليك وجع وش😗.
حازم:اي بلاي ارجعي كدا.
اماندا:سمح ي ابو الزوز😗.
حازم:امندا انزلي☺️.
اماندا:نازلة نازلة اصلا انت لاقيني وين عان دا.
بعد مشت ابتسم مسافة حتى اتحرك.
————
-في جانب حسن
كان قاعد هو وصبا واخوانها بحضرو في فيلم كلهم مع بعض..دخل عمو من برا وهو سكران كالعادة ومن م شافهم مع بعض جا على حسن وبقى بضربو!..
مجدي:مش قلت ليك م اشوفكم مع بعض؟
صبا:ي ابوي م قاعدين برانا م شايف صالح وسجى؟ وبعدين هسي هو عمل شنو عشان تضربو؟
مجدي:انتي خشي جوا م عايز كلام كتير.
صبا:م بخش كان م فكيتو!
مجدي(وهو بضربها هي زاتا):بقيتي تقلي ادبك كمان!
حسن:صبا خشي جوا لانو لو هبشك تاني انا ح اطلع من طوري.
صبا طوالي خشت جوا.
مجدي:عان عامل فيها العاشق تطلع من طورك تسوي شنو يعني؟ م كفاية بتحرش بتي علي؟ لا وكمان بقت تعصي كلامي وتسمع كلامك انت مليت ليها راسها بشنو؟
وبقى مستمر بضرب فيهو لحدي م في الاخر تعب ودخل غرفتو..حسن بقى م قادر يقوم من الارض من شدة الضرب..وقف وبقى تاكل نفسو على الحيطة لحدي م دخل غرفتو ورقد في السرير وبقى بفكر.
هو كان بقدر يضربو م غالبو يعني بس في حاجات كتيرة بتمنعو واولها حبو ل صبا..بت عمو الاتربى معاها في نفس البيت..من هو صغير ورغم انو كان بتعنف من الوقت داك بس كان حاسي انو علاقتهم ساهلة شديد لمجرد انهم عايشين في نفس البيت بالطريقة دي هو حسى انو هو اولى بيها ومستحيل يدوها لغيرو وكان ولازال بستحمل معاملة عمو ليهو عشانها هي وخاتي امل كبير في علاقتهم رغم كل الظروف البتوحي انو مستحيل في يوم صبا تكون ليهو!.
كان بشوف الناس وعلاقتهم مع اعمامهم رغم انو م كلهم علاقتهم بتكون مثالية بس على الاقل م زيهم! كان عايز يعرف ليه عمو بتعامل معاهو كدا؟ بس نهااائي م اتوقع انو السبب يكون كدا!!..
-flash back
كان عمري 12 سنة لمن عرفت سبب معاملة عمي لي! لمن سمعت اكعب شي ممكن زول يسمعو في السن دا!!..
تسنيم:ي مجدي انا كلمتك مية مرة الشافع دا م تتعامل معاهو كدا..حرام عليك الولد يتيم ياخ حس شوية!
مجدي:وانا سبب يتمو!
تسنيم:عشا...
مجدي(قاطعها):انا القتلت اهلو!
تسنيم:ودا بدل تتعامل معاهو كويس تعمل ليهو كدا؟ انت داخل مارق تضرب في الولد انت الحرمتو من اهلو تعنفو بدل تعوضو؟!
مجدي:م قادر...
تسنيم:م قادر تنساها؟
مجدي:م قادر استحمل كونو اربي ولد المرا البحبها وكمان جابتو من اخوي بدل م يكون مني انا! حبتو هو م حبتني انا! دا م بخليني اتعامل معاهو طبيعي ابدا!
اكيد ما ح تعرفو الشعور الحسيتو في وقتها!!!..م قادر اتخيل كيف هو عمل كدا؟!!..حرمني من اهلي ودمر حياتي وم خلاني اعيش زي باقي الاطفال الفي سني بسبب انانية وقصة حب تافهة!! لا وكمان بدل يعوضني وينسيني بعنفني! م عرفت اعمل شنو!..وقتها م عرفت اتصرف! ول هسي م اتغير شي وم اتصرفت! م عارف مستني شنو!!
—————
-في جانبي
بعد م دخلت البيت وغيرت هدومي طلبت من امي تجيب لي اكل في اوضتي عشان م بقدر اكل معاهم من شدة فضولي على الدفتر!..زي م قلت الورقة الكانت في المقابر انتهت في كلمة "شعور" والتكملة ح تكون في الدفتر ف كنت عايزة ارجع البيت ب اي طريقة عشان اشيل الدفتر واعرف تعريف الولد ل الحب!..كنت عايزة اعرف اجابتو رغم اني م بنتبه للحاجات دي بس حسيت انو صاحب القصة دا الم بعرفو غير فيني لدرجة حتى بقيت زيو!..هو كان م شغال بالحب والكلام دا بس كان عايز يعرف المعنى يمكن انا برضو عايزة اعرف المعنى بس عشان ارضي فضولي م عشان شي تاني!..اكلت في مكاني داك وبديت من محل وقفت...
الدكتور سال البت زاتها:انتي في رايك الحب شنو؟
~اممم م عارفة والله بس اعتقد انو كل الاجابات القالوها تكون في الشخص دا زيادة للشعور بالسعادة وبس.
انا:شعور!
~هاا؟
انا:الثقة،الاحترام،الراحة،التضحية،التنازل وغيرو دي كلها تعتبر اساسيات وحاجات لابد منها بس دا م هو الحب في حد زاتو..والاجابة عن السؤال دا بتختلف من زول ل تاني..مثلا انا زول كنت حزين وانت فرحتني ف بشوف الحب البينا سعادة..انا زول م بثق في اي زول وجيت وثقت فيك ح احس انو علاقة الحب البينا هي ثقة وهكذا..بس التعريف الحرفي ليهو انو هو شعور بس م اكتر! وكلمة شعور دي في حد زاتها عميقة لانو بتحتوي على اي شي! ووقت تحسو بيهو ح تعرفو هو شنو بس ماف كلمات بتوصفو ولا عندو تعريف اكتر من انو شعور!.💕..هو كمال! الحاجة الناقصة فيك ولقيتها في غيرك وكملك! بس م دايما بتكون عايز زول يكملك ف دا معنى ركيك.. عارف انو اجابتي متناقضة ف ح ارجع للاولى واللي هي انو شعور وبس!❤️
الناس كلها سكتت والمحاضرة انتهت وطلعنا.
كنت ماشي ل ايهم (صحبي) بس البت جات وراي نفسها البت الكانت بتتناقش معاي في المحاضرة.
~لو سمحت دقايق.
وقفت وقبلت عليها.
~عايزة اقول ليك انو انت زول فاهم شديد وانا اقتنعت باجابتك جدا.
انا:تسلمي ودا من زوقك والله💕..بس عايز اقول ليك انو دي ما الاجابة الصح..تعريفو بختلف من زول ل تاني.
~ايوا عارفة بس بما انو م جربتو ف لحدي الان في نظري دي اكتر اجابة مقنعة بالنسبة لي..وشكرا ليك بالجد لانو خليتني افكر دايما بكون متسرعة وبتكلم طوالي بس اول مرة افكر!
انا:على شنو ياخ..بس خليك وسط لا متسرعة لا بتفكري لانو التفكير كمان مهلك💔..ف خليك على طبيعتك💕.
~ان شاء الله💕.
ودي كانت اول مرة لي اتكلم مع بت!..اكيد ح تقولو م عندي بنات اعمام او خيلان او كدا بس دايما لو بالغت بسلم عليهم! حتى هم مستغربين من شخصيتي..ودي لاول مرة اتكلم مع بت في موضوع زي دا حتى ولو كان نقاش عام لاني اصلا عادة م بشارك!
وهنا ممكن نقول انو عقدتي اتجاه البنات شوية بدت تفك..
قاطع قرايتها ايمن وهو داخل...
ايمن:ي اماندا عايزك تساعديني في حاجة.
اماندا:قول.
ايمن:في بت...
اماندا:قبل م تتم كلامك عاين م تدخلني في مواضيع البنات دي لاني م بفهم فيها😗.
ايمن:عايني غلطان انا ماشي اضرب ل متاب.
اماندا:اي احسن.
———
-في جانب رؤى.
مشت لحازم وهي بتبكي.
حازم(وهو بحضنها):هي في شنو مالك؟
سكتت وهي لسة بتبكي..بعد مسااافة هدت.
حازم:ها يلا احكي.
رؤى:ليه دايما البنحبو م بحبنا؟!
حازم(سكت مسافة بعدها قال):ليه حصل شنو؟ مش قلتي هو بحبك؟
رؤى:هو قال بحبني بس تصرفاتو بتقول عكس كدا!
حازم:ابعدي من الباذيك!
رؤى:ياريت لو بقدر!
حازم:اها الحل؟
رؤى:م عارفة.
حازم:حسسيهو انك م دايمة معاهو! لانو هو حاليا شايف انو مستحيل يخسرك ووقت يكون عايزك ح يلقاك..حسسيهو انك ممكن تبعدي عادي في اي وقت.
رؤى:حاسي انها بتنجح؟
حازم:لو بحبك ح تنجح وبالمرة يكون اختبار عشان تشوفي هو بحبك بالجد ولا كلام ساي.
رؤى(وهي بتبوسو في خدو):م عارفة اعمل ليك شنو عشان اعبر ليك اني بحبك قدر كيف.
حازم:اعملي لي قهوة بس.
رؤى:عان المستغل دا😭.
حازم:قومي ي بت وخلي النقة.
رؤى:م حنك عشان ساعدتني بس لكن تاني ماف ليك.
حازم:نشوف😗.
————
-في جانبي.
بعد ايمن طلع شلت الدفتر تاني..الليلة اول يوم اقرا منو كتير كدا بس الفضول ح يقتلني! فتحت الصفحة الوقفت فيها وبديت اقرا...
في يوم تاني كانت قاعدة هي ومجموعة من الناس وكانو برضو بتناقشو..العرفتو انو هي بتحب النقاشات الجادة وبتحب الهظار في نفس الوقت يعني بتكون مع الناس حسب هم شنو..واللاحظتو برضو انو بتضحك كتير وزولة اجتماعية شديد بتكون قاعدة مع دا فجاة تلقاها مع دي وكدا..واللاحظتو برضو اني بلاحظ ليها كتير ومركز معاها!😂❤️..المهم كانو بتناقشو حول موضوع وجات جرتني من يدي وقعدتني جنبها كنت مستغرب من حركتها و جرائتا وبعاين ليها.
~:عارفة انك مستغرب بس كانو بتكلمو عن موضوع وبرضو حسيت انو عندك الاجابة.
-عان الوسخة يعني م مقتنعة بكلامنا.
~لا مقتنعة بس ما مية في المية.
انا:الموضوع هو شنو؟
~كانو بتكلمو عن الحزن وكدا وقالو الزول لمن يكون حزين يعمل شنو؟
انا:و اجاباتكم شنو؟
•انا عن نفسي بستنى زول معين عشان يسعدني🙈.
_طبعا زي م عارفين الاكل اهم شي ف في الاغلب ح اكل😗.
<اممم بطلع او بشوف اي حاجة اشغل بيها نفسي.
~زي شنو؟
<اغاني،مسلسلات،او اشوف زول اتونس معاهو.
^انا قلت انو بشكي لاقرب صاحب لي وبعدها برتاح شوية.
-م بثق في زول ح اشكي ل الله بس.
انا:اممم اجاباتهم صاح بس م بالطريقة الصحيحة او يمكن م مرتبة.
~كيف؟
انا:طيب ح اشرح ليك..اول شي الحزن دا قرار ومسؤولية..والمسؤول منو؟ ماف زول غير نفسك! انا المسؤول عن فرحي وحزني..يمكن تقولي لي في ظروف او في زول خلانا نحزن..اي صاح بس ردة فعلك تجاه الموضوع دا مسؤوليتك انتي!..زي م قلت ليكم اجاباتكم صاح بس م مرتبة ف لمن احزن اول شي اشكي ل الله..اها يلا وبعدو؟
~اذا كان السبب شخص م ممكن اواجهو؟
انا:طيب قولي مشيت ولمتو في الحالة دي في احتمالين انو يراضيك او هو كمان يزعل وتحصل مشكلة..اها وبعدو؟
^ممكن احكي ل زول قريب لي.
انا:ايوا كويس الفضفضة للزول الصاح بتخليك مرتاح..يلا البعدو؟
<زي م قلت قبل شوية اطلع ولا اشوف مسلسل ولا اي شي.
انا:اي دي ما بعد الحزن..لانو وقت الضيقة زاتها م بكون نفسك تعملي اي شي بس لمن تفك شوية ممكن تعملي الحاجات دي..اها وبعدو؟
•استنى زول يسعدني؟
انا:يلا دي الاجابة الغلط!..هل انتي متاكدة الزول دا ح يجي ويسعدك ولا ح تنتظري ساي؟ وح تنتظري كم؟ ولا ح تمشي وتطلبي منو انو يسعدك؟ ف الاجابة دي طلعوها من الخيارات..اي زول بقى همو في نفسو ف ما تستني من زول شي واسعدي نفسك براك..احزني وابكي لو عايزة بس ح تعملي شنو بعد داك؟..كلنا بنقع في مشاكل واحزان بس في مننا العايز يطلع من المشكلة ويغير من نفسو وفي العايز يعيش دور الضحية ويلوم الحواليهو..ف يا تلوم نفسك وتستسلم للتعاسة والنكد ويا تغيرو..انت المسؤول من حزنك! عميقة فكرو فيها!😂
^اممم عندي سؤال!
~شنو؟
^كيف اعرف انو الزول دا مناسب عشان احكي وافضفض ليهو؟
انا:طيب..لازم يكون واحد من تلاتة اللي هم:
١/زول ح تحكي ليهو الفي قلبك وتاني ما ح تشوفيهو لا هو ح يعرف الحصل شنو بعد مشى ولا انتي ح تكوني خايفة انو يخزلك او يحكي لزول.
٢/زول علاقتكم م سنين علاقتكم ثقة من شخصيتو بتعرفي اذا دا زول ممكن تشكي ليهو همك ولالا.
٣/زول ممكن يساعدك.
اغلب الناس اقتنعو برايي او تقريبا كلهم وبعدها اي زول مشى وبقينا برانا انا وهي..
~وكالعادة ابهرتني اجابتك واقتنعت واثبت لي انو م جبتك انت دون عن الناس ساي!
انا:لاحظت انك م بتتكلمي معاي الا في المواضيع الزي دي😂.
~هو انت اصلا بتتكلم مع بت؟!
انا:اجابة مقنعة😂.
~بالجد انت ليه م بتتكلم مع البنات؟
انا:م عارف..ممكن تقولي معقد.
~معقد من شنو؟
انا:م عارف برضو.
~خخخخ متاكدة دي م الاجابة بس اوك.
انا:الاجابة معقدة برضو وعايزة ليها قعدة.
~متين؟😼
انا:شنو؟
~القعدة!
انا:انتي جادة؟ انا قصدي يعني الاجابة موضوع طويل.
~عايزة اسمع الموضوع الطويل.
انا:متاكدة؟🌚
~اييي😼.
انا:طيب يوم الاربعاء في شارع (...) الساعة ٦.
~جادي؟ منو البمشي الشارع دا اصلا!
انا:حاسة اني غريب الاطوار صاح؟😗
~ايييي.
انا:لمن نمشي المكان دا واحكي ليك ح تتاكدي!
خليتها متحيرة ومشيت منها مسافة..
~اا دقايق اسمك منو؟؟
انا:ايسر! وانتي؟
~فرح!
قفلت الدفتر وانا مخلوعة.
اماندا:فرح!!..نفسها فرح الزين؟!!!
*#يتبع*
