اماندا من صحت جات طالعة وهي بس عايزة تعرف نهاية الدفتر شنو وحتلقى الورقة المقطوعة وين؟.. مشت المقابر وطوالي مشت على المقبرة ال باسم فرح..وبقت تعاين حوالين المقبرة م لقت شي!
اماندا:م عشان المرة الاولى لقيتيها بسهولة حيحصل نفس الشي!
وبقت تحفر شوية وبرضو م لقتها ختت يدها في راسها بحيرة..جاها نفس حارس المقابر اللقتو اول مرة:ي بت انتي مجنونة؟؟؟؟ (وهو بجيها بقدام وبعاين في وشها) انتي جيتي هنا قبل كدا! وكان معاك ولد وبرضو بتفتشو في شي! عايزة شنو انتي؟؟؟ ميت ليك زول يعني ولا شنو؟؟؟
اماندا وهي بتقوم:اا لا ولا شي.
وطلعت..الراجل هز راسو ورجع لكرسيهو..
ركبت العربية وقالت:يبقى امشي على الاحتمال التاني!
تلفونها ضرب ردت بدون م تشوف:الو؟
حازم:انتي وين؟؟؟ عايز اجيك!
اماندا:ليه في شنو؟؟
حازم بحنية:اشتقت ليك.
اماندا وهي مبتسمة:امبارح كنا مع بعض!
حازم:اعمل شنو؟ بقيت م قادر اقضي وقت بدونك والله ..حتعزبيني كدا لحدي متين؟
اماندا:تاني نفس السيرة ي حازم؟؟ انا قلت ليك شنو؟؟
حازم:شنو؟
اماندا:بعد اشوف نهاية ايسر وفرح حتى اديك جوابي!
حازم:العلاقة شنو ي اماندا؟ حتى قصتهم م زي قصتنا!
اماندا:انا م قادرة افكر والله..تفكيري كلو فيهم هم لو م عرفت نهايتهم ما حقدر ارد ليك.
حازم بتنهيدة:حاضر.
اماندا:م تزعل طيب؟
حازم:لا م زعلان بس بتمنى نخلص من الموضوع دا قريب!
اماندا:حنخلص خلاص الليلة انا حعرف كل شي!
حازم:كيف؟؟؟
اماندا:عرفت الورقة الاخيرة وين!
حازم:عرفتيها كيف؟
اماندا:اللغز بقول "ما ابشع النهاية التي تعيدك الى البداية".
حازم:ايوا؟
اماندا:م حبيت ازعج صبا في يوم زواجها الاول! ولا حبيت اكلمك وشغلت مخي شوية جربت اشيل اول حرف من كل جملة..وجربت اشوف اول صفحة لانو قال حتعيدنا للبداية! بس الطلعت بيهو انو يمكن قصدو ارجع لمكان اول لغز ولمن مشيت المقابر م لقيت ورقة!
حازم:اها طلع معاك شنو في الاخر؟
اماندا:المكان اللقيت فيهو الدفتر لانو هو البداية هو المحل البدت منو كل القصة دي! هسي ماشة على المكان دا ولو م لقيت يبقى حليت غلط وحرجع افكر تاني.
حازم:ان شاء الله حتلقيها..يعني هسي انتي ماشة على حديقة الطاهر؟
اماندا:اي.
حازم:انا في بيتكم دقايق وبكون معاك في الحديقة م تدخلي من غيري.
اماندا:حاضر.
وساقت عربية امها لحدي م وصلت الحديقة..واصلا بيتهم كان قريب ف لقت حازم مستنيها هناك!
دخلو مع بعض بس لقت الطاهر من برا!
الطاهر:ماشة وين انتي؟؟؟
اماندا:الطاهر عليك الله خليني اخش.
الطاهر:اخليك تخشي وين؟؟؟ مش قلت ليك طلعي الموضوع من راسك؟؟؟ انا خلاص حقفل الحديقة الليلة ف لو سمحتي اتفضلي برا!
اماندا:الطاهر...
الطاهر وهو بجرها من يدها وبكورك:ياخ قلت اطلعي برا انتي م بتفهمي؟؟؟؟؟؟
حازم جا وقف قدامو وفك يد اماندا من الطاهر:انت هسي مالك هايج؟؟؟؟ البت عايزة تخش عندها حاجة عايزة تشوفها وتطلع طوالي.. والله لو م كنت كبير كان حيكون عندي معاك تصرف تاني!!!
اماندا:اتطمن م عايزة انضف ولا اهبش حديقتك عندي حاجة جوة حاشيلها واطلع طوالي!
الطاهر وهو بدخل على بيتو:استعجلي بلاي.
حازم :شفتي بتدخلي نفسك في شنو؟؟؟
اماندا:خلينا منو هسي وارح نفتش.
دخلو الحديقة جوا.
حازم:متزكرة المكان الكان فيهو الكتاب؟
اماندا:يعني م بالضبط انت عارف الحديقة كبيرة..(سكتت مساافة حتى قالت)..دقايق! انا كنت واقفة هنا وانت كنت واقف هناك بتنضف وجيت ارتاح في الكرسي دا (وهي بتمشي عليهو).. يبقى الورقة في مكان هنا!
بقت تفتتششش وتحفر.
اماندا بفرح:لقيتها😭😭.
حازم:اممم بس مليانة طين!
اماندا:هي ملفوفة يعني الطين من برا بس الصفحة جوا حتكون نضيفة..ان شاء الله.
قعدت في الكرسي وحازم قعد جنبها.
حازم:اقري بصوت عالي.
اماندا بتوتر:اوك.
حازم:مالك؟
اماندا:متوترة!
حازم:ليه؟
اماندا:خلاص دي اخر صفحة يعني..حتنتهي الالغاز والدفتر وفرح وايسر واي شي..رغم انو كان في تشويش شديد وخلاني اكون خايفة واشك في الحولي بس حفتقدو شديد لانو اتعلمت من قصتهم وكانت عاملة لي موضوع ..حشتاق ليهم!
حازم:اي شي مصيرو ينتهي في الاخر! حتنتهي من قصة فرح وايسر ومين عارف؟ يمكن تبدا قصتنا!😉
اماندا:حقرا احسن🌚.
حازم:اخخ حتتعبيني معاك..اوك رايك شنو نمشي مكان فرح وايسر ونقرا هناك؟؟؟
اماندا:اللهه ممكن فكرة حلوة!
حازم:يلا.
ادتو مفتاح عربية امها وساق لحدي هناك.
طلب لنفسو قهوة وطلب ليها.
اماندا:عارف اني م بحب القهوة!
حازم وهو بعلي صوتو:بدل التاني بشاي..(وعاين ليها) ابدي يلا.
اماندا:طيب..
——-
" حتى أن الوهم بدأ يتضاءل، كان كبيرا في البداية واليوم صار ينكمش ويصغر، مع هذا لا أزال متمسكاً به."
