Sylvestre's Wedding

CHAPTER 1

TULAD ito ng isang Star Cinema Rom-Com. Makikita natin ang top view ng isang paaralan. Magaganda ang mga buildings at habang papalapit sa quadrangle ng campus ang kamera ay makikita ang madaming estudyante. Mayroon ding mga magulang at mga gurong suportado ang kanilang mga anak. At kung pelikula nga ito, magpo-focus rin ang camera sa tatay ko at kuya ko.

"Yan ang anak ko, lalaking-lalaki," sabi ng tatay kong hawak ang camera, vini-video ako.

"Sakit naman nun," sabi ng kuya kong ahit ang kilay. Hindi ito ang kwento ng kuya ko, pero oo, bakla siya.

May dalawang pulutong ng mga kadete ang nasa gitna. Tig-isang platoon leader at sa harapan, isang Battalion Commander.

Hindi ako ang Battalion Commander. Siya si Cadet Colonel Sylvestre MDC, Corps Commander. Iyon ang nakasulat sa name plate niya. Pero hindi pa rin siya ang bida sa kwentong ito. Matangkad at matikas. Gwapo. Kung bakla ba siya? Hindi pa namin alam nitong mga panahong ito.

Ganun din ako. Matangkad at matikas din. Yung gwapo, paniniwala ko pa lang, hindi ko pa napapatunayan. Sapat na akong pinaniniwalaan din yun ng aming Corps Commander. Pero kung ano ang itsura namin ngayon ay hindi mahalaga. Magkakamukha kaming lahat sa quadrangle. Iisa ang uniporme, iisa ang tindig, iisa ang galaw.

Ako ang platoon leader ng mga lalaki. Cadet Lt. Col. Castillo DC, Ex-O. Naka-pin ang name plate ko sa aking puting-puting Drill A, CAT uniform, na tuwing tatama ang anggulo ng sikat ng araw, kumikinang ang mga tansong paraphernalia, naninilaw na parang mga ginto. Tuwid na tuwid ang liston ng pantalong kagabi ay pinatigas ng almirol. At ang sapatos, kinandila pa ang wax para kumintab, pwedeng gawing salamin nang sinomang titingin.

Nakatayo ako at walang galaw na nakatingin sa harapan. Stomach in. Chest out. Naghihintay ng command sa lalaking nasa harapan ko.

"Tikaaaaaaaaaaaaaaaaaaaaaas" mahabang sigaw ni Sylvestre.

Sa last note, nilingon ko ang aking platoon at inulit ang utos.

"Tikas!" sigaw ko.

"Pahinga!" sigaw ni Sylvestre.

Sabay-sabay kaming kumilos nang buong tikas. Pinaghiwalay ang mga paa, inilagay ang kaliwang kamay sa likuran at at ang riple sa kanang kamay ay ipinahinga sa harapan.

Tumalikod si Sylvestre at ginaya ang aming tikas pahinga.

Kahit nasa harap lang ang tingin, kita ko ang paglapit ng isang matandang opisyal kay Sylvestre. Napa-attention si Sylvestre. Kinuha ang papel at binasa.

Kita ko sa mukha ni Sylvestre na hindi na niya alam ang gagawin.

Sunud-sunod na commands ang isinigaw ni Sylvestre at inulit namin. Hindi ko alam kung saan patungo ang mga commands, pero sumunod ako. Kahit alam ko pa na mali na ang ginagawa ni Sylvestre. At iyun na nga. Nagkagulo-gulo ang aming platoon.

"Lumansag!" sigaw ni Sylvestre.

Nagulat kaming lahat sa sigaw ni Sylvestre. Sumuko na siya. Naghiwa-hiwalay kami at nagmamadaling bumalik sa aming upuan. Hindi makatingala si Sylvestre dahil alam niyang nakatingin sa kanya ang mga alumni namin, na last year, nag-champion sa tactical inspection.

Lumapit kay Sylvestre ang babaeng platoon leader. Si Clarin, ang G1. Hindi niya ito pinansin. Napahinto si Clarin. Kita kong nasaktan siya. Gusto lang naman niyang gampanan ang pagiging girlfriend.

Pumasok kami sa classroom na designated para sa mga lalaki ng school namin. Nagkanya-kanyang arm chair ang mga co-officers ko sa CAT. May mga bulungan na natahimik sa pagpasok namin ni Sylvestre.

"'Tention!" sigaw ko.

Agad tumayo at tumahimik ang lahat.

Naglakad kami ni Sylvestre patungo sa harapan.