أريد رجلآ

ج١

مثل كل صباح استيقظ بي ع صراخ امي المتكرر اللي ميتوقف الا تكعدني....

ولج صليوة ...لج كعدي كل هذا نوم ..النوم لو فاد جان فاد اهل الكبور ..ولج كعدي ..خرب هذا البيت الي واكع ع راسي بس ماكو احساس فد مرة الواحد يكعد من الصبح يقول يالله ..يتريك يكمل شغل ينظف ..اجانا احد شيقول ..بيت مابي نسوان ...

صابرين : اكمل كلام امي الي كد ماسمعته حفظته واخليها تكمل مقطوعتها المعتادة واليومية ومن اكعد تكلي ليش كعدتي اني قصدي عالجناين من مبدأ احاجيج يابنتي واسمعج ياجنتي ..بس بهذا الوقت معاد هالمثل شغال الجنه حاطة سماعات او نايمة متأخر مثل الكل يعني واحد اذا ماعندة دوام ولا عندة شي ليش يكعد من الصبح اظل وسوسة الشيطان واني مطية اذن الطرشة بلكي واحد من اخواني الثلاثة يكعدون نسوانهم ويقوللهم اكعدو امي دتصيح ..
اسمع دكات باب غرفتي ..

صابرين ...صابرين ...ولج صابرين مدا تسمعين امي تصيحج ..

وافتح عيني كلها..مثل كل يوم ...ها خير احمد ؟
أحمد: يعني مدا تسمعين امج تصيح ..يعني يومية على هالحال يابة نامي يمها احنا هم ريد نرتاح شنو هالصياح من الصبح مو تعبنا والله تعبنا..

صابرين: اسمي صابرين ..ومن جنت صغيرة ع كد ماجنت هادئة وصبورة جان الكل يحلف براسي ..بس بمرور الوقت الواحد بعد ميتحمل طك مرارتة بين قوسين وبالاخير يخلي ينزل لااوطأ مستوى عمود لااحد يطخك ..

وبلحظة الهدوء المفرط تنفجر...

صابرين: تمشيت خطوات نحو الدرج وامي بعدها تصيح ..

بعد ..بعد الجيران مسمعوج يومية صياحج وعياطج دتسمعين الجناين وهم ميسمعن افهمي اعقلي هذا اسلوبج مدا يضوج احد غيري اني وابوية انتي يومية على هالسالفة ..
وامي تاشرلي اسكتي ..مو يمج الحجي ..بس اني صدك اتمنى لو حياتنا سهلة والنا الحرية والوضع الي يسمح لكل بنية تعيش وحدها وبراحتها او بوضع يسمح ان كل واحد من اخواني يستقل بحياتة ويصير اله بيت اني كاعدة بنص ٣ ولد متزوجين ويوميا عما ينومون جهالهم ميبقى من الليل شي وامي مشغلة منظار ع اخوتي ورقيب ع زوجاتهم يعني ماكو حرية ماكو ضحكة ماكو سالوفة اي شي تريدون تسوو سوو بغرفتكم ..مااعرف شنو هذا المبدأ ..اجمل شي جان بمخيلتي انو الرجال والمرتة دائما تجمعهم الكلمات الحلوة وزيد لهفتهم اللمسات الحنون او همسات الاشتياق قبل لا يسدون بابهم ويعيشون علاقتهم السرية ..

أمي جانت مثل الشرطي بالبيت ..مااعرف هي شون زوجت وخلفت مااتذكر يوم حجت ع علاقتها باابوية او لحظات حلوة عاشوها ..جانت دائما متشاءمة ومو راضية ..

مااقول ابوية ملاك ولاعندة اخطاء مثل باقي الرجال ..بس يبقى ادم هو أدم ..

هواي جنت اسمع شكاوي اخواتي المتزوجات جانت دائما تنصحهم يحافظون ع بيوتهم رغم هي مامقتنعة بااي وحدة من خواتي بزواجاتهم ودائما يجون فرحانين ويطلعون محملات كلش ع ازواجهم وبعدين تصير مشاكل ..