أريد رجلآ

ج٤٣

أصعب شعور تحسه بعد مايندفن ميت عزيز عليك تظل تتخبط بكل شي وكل دقيقة تحس انو كابوس كاتم ع نفسك ومأذيك  وتتمنى تغمض عينك وتفتحها وتلگى كل هذا وهم ويختفي لا فقدت حبيب ولاعشت الم تتمنى لو الوقت يرجع بالايام بالساعات حتى الدقائق والثواني  بس عمود تصلح الماضي وتعيش بسعادة عمود لاتحس بتأنيب الضمير يارب العشته شنو جان حلم وگعدت على هذا الكابوس لو الكابوس صار حقيقة واني لازم اتقبل انو اسماعيل توفى واني ظالمته هو چان يحبني واني ظلمته ..تعرفون الاصعب من هذا انو جنت عايشته بصمت محد حاس بي الكل تجي تسلم وتعزي وتبوس واني بعالم ثاني مو مصدگة مو گادرة ابچي ع شنو ابچي اني مو كادرة اتخيل حبيبي جوا التراب شون أبچي علي ..بس باين عليه كل ملامح الحزن ..
زينة: خالة لطيفة شو احس خالتي مو بوعيها دتشوفيها ..اني كلش خايفة خاف يصير بيها شي مبقالي غيرها ..

لطيفة: الله يساعدها الصار مو سهل ..

انتي ماشفتيها من فوتو التابوت ظلت تباوع ع عمو أسماعيل وتبتسم عبالها نايم ..

لطيفة : الله يكون بعونها الخسرته مو سهل ..

زينة: شنسوي لعد خاله نبقيها هيچ ...

لطيفة : خل يفض العزا واني ابچيها عمود ترتاح ..
يلة روحي قدمي مي للجاين اروح اوصي ع الجاي واشوف الاكل ..

حاضر خالة..

صابرين: اجوي اصدقاء اسماعيل من محافظات واكو وياهم زوجاتهم ..
كعدت ع صفحة وحطت بنتها بحضنها جانت حيل حلوة شعرها نيكرو وبيضة وناعمة اول ماكامت وصاحتها امها ..

أيناس..أيناس..

لچ ماما تعاي ..

وكتها بچيت ..بچيت هواي وكعدت الطم ..
والنسوان تعجبو عليه هسة بس حسيت انو ظلمتك يااسماعيل ..سامحني حبيبي ياما ضوجتك جكد اذيتك سامحني ..لك ابريني الذمة مالحگت اشبع بيك اوووف منو يحبني بعد منو يحن عليه رحت وعفتني بلا سند ..
بلا عزوة ..فدوة لعينك ارجع ، ارجع وماازعلك بعد ،وعد الله وعد ..

جتي لطيفة حضنتني ..

الله يرحمه حبيبتي ..الله يرحمه ادعيلة ..

لطيفة راح وزعلان عليه ..

مازعلان والله مازعلان ..يحبج ..هو يحبج..

أي ..چان يحبني بس اني غبية ..اني غبية لطيفة ماقدرت حبه ماقدرتة ..اوووف يمة النار بيه شيطفيها ..

ظليت الطم وابچي لحد ماتخربطت ..

نقلوني مستشفى وشدولي مغذي ورجعت للبيت والمغذي باايدي ..
خلص العزا وراحو الناس ..

لطيفة : صابرين حبيبتي ..لازم شوي تقوين نفسج ..هاي مر اسبوع وانتي نفس الحالة ميصير تبقين عالمغذي تموتين هيج ..

صابرين: دخيلج خل اموت لطيفة عوفوني اموت اسبوع مر واسماعيل جوا التراب شلي بهالعيشة الي مابيها هو ..