After Being Turned Into a Dog [Translation - U+Z]

25. Betrayal At Boutique - I

၂၅. အထည်ဆိုင်၌ သစ္စာဖောက်ခြင်း (၁) ။

လင်းရုန်ကတော့ ပြောပြီးပြီးချင်း ရပ်လိုက်တာပါပဲ။ ဒါပေမဲ့ နင်ယန်တစ်ယောက် ရင်တုန်းပန်းတုန်ဖြစ်သွားတဲ့အပြင် ဝေ့ကျိုးနန်လည်း အင်မတန် စိတ်ရှုပ်သွားတယ်။ 

နင်ယန် ‌နည်းနည်းတော့ လိပ်ပြာမလုံဘူး။

သူက တကယ်ကို စေ့စေ့စပ်စပ်မရှိလှတဲ့ လူစားဖြစ်တယ်။ အခုကိစ္စမှာ ပူးပေါင်းပါ၀င်ပေးဖို့ သူ့အရင်းနှီးဆုံးသူငယ်ချင်းကို သူရော၊ သူ့အကိုရော မတောင်းဆိုမိတာကိုသာ ကြည့်ပါလေ။

ဒါပေမဲ့__

ဒါက ပြဿနာကြီးကြီးလည်း မဟုတ်ဘူးလားလို့?

နင်ယန် ဝေဝေဝါးဝါး တွေးလိုက်တယ်__ တကယ်လို့ သူတို့အစီအစဉ်မှာ လင်းရုန် အဖြစ်မှန်ကို မြန်မြန်ဆန်ဆန် ရိပ်မိပြီး ဝိညာဉ်စွမ်းအင်ကို တုံ့ပြန်စေလောက်တဲ့ ဟာကွက်မျိုး ရှိမယ်ဆိုရင် နင်ယွဲ့ အဲ့လောက် အေးအေးတည်ငြိမ်မှာ မဟုတ်ဘူး။

ဆိုလိုတာက ဘယ်ဟာကွက်မဆိုက အလွန်ဆုံး လင်းရုန်ကို သံသယ၀င်စေယုံလောက်ပဲ၊ အဖြစ်မှန်ကို အတည်ပြုဖို့ မလုံ‌လောက်ဘူး။

ဒါ့ပြင် ကနဦးပိုင်း နင်ယွဲ့ လင်းရုန်ကို ဒီအကြောင်း ပြောတုန်းက ၊ ကိစ္စအားလုံးက သံသယဖြစ်စရာကောင်းပါတယ်လို့ အတိအလင်း ပြောထားပြီးသား။

အင်းလေ၊ ဘယ်လိုပဲဖြစ်ဖြစ် ဝိညာဉ်စွမ်းအင်ကလည်း မတုံ့ပြန်ဘူးမလား။

အကယ်၍ လင်းရုန်မှာသာ အထောက်အထားအခိုင်အမာရှိရင် သူလည်း ဒီ‌လောက် တည်ငြိမ်မှာ မဟုတ်ဘူး။

မေးခွန်းတွေ တောင်စဉ်ရေမရ တွေးပြီးနောက်မှာ ဒီထက်ပိုပြီး ဂရုစိုက်မနေတော့ဘူးလို့ နင်ယန် စဉ်းစားလိုက်တယ်။ သက်ပြင်းချပြီး သူ့အာရုံတွေကို လွဲပစ်တယ်။

တစ်ဖက်က ဝေ့ကျိုးနန်ကလည်း ခုနမေးခွန်းကိုပဲ နက်နက်နဲနဲ တွေး‌တောတယ်။ လင်းရုန်က စကားကို အကြောင်းမဲ့တော့ မပြောလောက်ဘူး။ အထူးသဖြင့် မေးခွန်းမှာ နင်ယန်နာမည် ပါတယ် ဆိုကတည်းက သေချာပေါက် အဓိပ္ပာယ်မရှိတာ မဖြစ်နိုင်ဘူး !