The One I Hate Becomes Mine

15

[Unicode]

" ဦး ကျွန်တော့်အတွက် တရားမျှတမှု ဘယ်မှာလဲ "

" အိပ်စမ်း နားငြီးတယ် "

" ဦးကို ဖက်အိပ်ချင်တာလို့ "

ဂျုံအင် ကြမ်းပြင်ပေါ်ခင်းထားတဲ့ အိပ်ရာခင်းပေါ်မှာ လူးလိမ့်နေမိသည်။သူကတော့ တစ်ခန်းထဲအတူနေရလို့ပျော်နေတာ။ဦးက သူ့ကိုကုတင်ပေါ်တက်ခွင့်ပင် မပေး။

" ဦး "

ဂျုံအင် ပြောတော့ ဦးက ဘာမှထပ်မပြောလာတာမို့ ဦးကို တိုးတိုးခေါ်လိုက်သည်။

" အိပ်နေပြီလား "

တိတ်ဆိတ်နေတဲ့ အခန်းငယ်လေးထဲ ဂျုံအင်အသံကသာ ကြီးစိုးနေ၏။အိပ်ပျော်သွားပြီထင်သည်။ဦး မျက်နှာကိုကြည့်ပြီး နမ်းရှုံ့ချင်သေးပေမယ့် မနက်ဖြန် စောစောထရမှာမို့ အိပ်ပျော်အောင်ကြိုးစားမိသည်။

* တီ တီ တီ *

ဂျုံအင် နှိုးစက်ကိုပိတ်ပြီးတာနှင့် အိပ်ရာခင်းတွေကိုခေါက်ကာ ဘီရိုထဲသိမ်းလိုက်သည်။ဦးက အိပ်နေဆဲမို့ အသံမကြားအောင်တိုးတိုးလေးလုပ်ရသည်။ဦးရဲ့ အိပ်ခန်းထဲမှာရေချိုးခန်းမပါ။အပြင်မှာအခန်းသပ်သပ်မို့ ဂျုံအင် မျက်နှာသစ်ဖို့ အခန်းထဲကထွက်ခဲ့လိုက်သည်။

မေမေနဲ့ဘွားဘွားက အောက်ထပ်မှာနေတာမို့ အပေါ်ထပ်ရေချိုးခန်းက ဦးတစ်ယောက်တည်းသုံးသည်တဲ့။ခုတော့ ဂျုံအင်နဲ့တူတူပေါ့။

မျက်နှာသစ်၊သွားတိုက်ကာ အိမ်အောက်ထပ်ဆင်းခဲ့လိုက်သည်။အောက်ထပ်က တိုင်ကပ်နာရီကိုကြည့်တော့ မနက် ၇နာရီ။

" အစောကြီး နိုးနေတာပဲ "

" ဟုတ်ကဲ့ မေမေ .. သား ကူပေးမယ်လေ "

ခြံထဲ ရေလောင်းနေတဲ့ မေမေ့လက်ထဲက ရေပိုက်ကိုဆွဲယူပြီး ရေကူလောင်းပေးလိုက်သည်။ဂျုံအင်က လိမ္မာတဲ့လူမဟုတ်တာမို့ ကြိုးစားပြုပြင်ပြီး မေမေ၊ဘွားဘွားတို့နဲ့အဆင်ပြေအောင်နေရမှာ။

မေမေ့ကို ရေကူလောင်းပေးပြီး ဖိနပ်စင်နားခဏအလုပ်ရှုပ်ပြီးတာနှင့် အိမ်ပေါ်ပြန်တက်ခဲ့သည်။ဒီနေ့ ဦးက ကျောင်းအသစ်မှာစာသင်ရမှာမို့ နှိုးရဦးမည်။အခန်းထဲဝင်လိုက်တော့ ဦးက မရှိ။ရေချိုးနေသည်ထင်။ကုတင်ပေါ်ကလုံးထွေးနေတဲ့ စောင်ကိုခေါက်ပြီး အိပ်ရာခင်းကိုပြန့်နေအောင် ဖြန့်လိုက်သည်။ဦးရဲ့ အငွေ့အသက်တွေပြည့်နေတဲ့ ကုတင်ပေါ်တစ်ခါလောက်ထပ်ပြီးလှဲအိပ်ချင်ပေမယ့် ဦးက မကြိုက်တာမို့ မလုပ်ဖြစ်။