Falling For A Star ( Myanmar Translations)

45. Their Honeymoon for Real +M+

အခန်းအပြင်ဖက်ကနေ အခန်းတံခါးကို မှီပြီး ထိုင်နေမိသည်မှာ သုံးနာရီ နီးပါးလောက်ရှိပြီ။ ဂျန်းနီ ထွက်လာပြီး စကားလာပြောမည့် အချိန်ကို စောင့်ဆိုင်းနေသည်။ ကိုယ် ပြောမိတဲ့စကားတွေကြောင့်လည်း နောင်တ အကြီးအကျယ်ရနေပြီး ကိုယ့်ခေါင်းကို ပြန်ထုကာ အပြစ်ပေးနေမိသည်။ အခုထိလည်း အဝတ်မလှဲရသေးဘူး။ အဝတ်အိတ်တွေက အခန်းထဲမှာ။ ဟူး..... ဒါ သူ စိတ်ကူးယဉ်ထားတဲ့ ဟန်းနီးမွန်း ပုံစံမဟုတ်ဘူးလေ။ အတူတူ ပျော်စရာတွေ ဖန်တီးကြဖို့ အများကြီး ကြိုတွေးထားခဲ့တာ...ဒါပေမယ့် အဲ့စိတ်ကူးတွေဟာ အခု သူ့ကြောင့်ပဲ လွင့်ပြယ်ကုန်ပြီ။

"အရူး! အရူး! အရူး!"

နံရံ ကို ခေါင်းဖြင့် အားရပါးရ အဆတ်မပြတ် ဆောင့်တိုက်ကာ ရေရွတ်နေသည်။

တစ်ဖက်တွင် ဂျန်းနီလည်း အခန်းတွင်းဖက်တွင်နေ၍ အခန်းတံခါးကို ကျောမှီကာ ထိုင်နေသည်။ အပြင်ဖက်မှ ဂျီဆူး၏ အသံများ ကြားနေရပါသော်လည်း မတတ်နိုင်ပါပဲ ငိုချည်း ငိုနေမိသည်။ နံရံ ဆောင့်သံကြားလိုက်ရသည်နှင့် ဂျီဆူး. သူ့ကိုယ်သူ နာကျင်အောင် လုပ်နေပြီမှန်း အတပ် သိလိုက်သည်။ ထို့နောက် ဂျီဆူး ဆီမှ စကားသံ ထွက်လာသည်။

"ဘေဘီ.... အခု ကိုယ် ပြောတာကို ဘေဘီ ကြားနေရလားမသိပေမယ့်...ဘေဘီ့ကို ကိုယ် သိစေချင်တာက ... ကမ္ဘာကြီး နှစ်ခြမ်းကွဲသွားရင်တောင် ကိုယ် က ကိုယ့်အလုပ်ထက် ဘေဘီ ရှိတဲ့ဖက်ခြမ်းကို ပဲ ဦးစားပေးရွေးချယ်အုံးမှာပဲ"

အပြင်ဖက်က ဂျီဆူး အသံမကြားသွားအောင် ပါးစပ်ကို လက်ဖြင့်အုပ်ထားလိုက်သည်။

"သရုပ်ဆောင် တစ်ယောက်ဖြစ်ဖို့က ကိုယ့် အိပ်မက် ဆိုတာမှန်တယ်။ ကိုယ့် အမေတောင် မတားနိုင်ခဲ့တဲ့ ကိုယ့်အိပ်မက်။ ဒီနေ့ ဒီလိုနေရာ..ဒီလို အောင်မြင်မှုမျိုးရအောင် ကိုယ် အသဲအသန် ကြိုးစားခဲ့တာ.."

ဂျီဆူး ရဲ့ ငိုသံကြားတော့ သူမ နှလုံးသား‌တွေ ပူဆွေးလာပြီး သူမ ပါးပြင်ပေါ် မျက်ရည်တွေ စီးကျလာရသည်။

"ကိုယ် အမှန်အတိုင်း ဝန်ခံရမယ်ဆိုရင်...ဟုတ်တယ်..ကိုယ် ကိုယ့်အလုပ် ကို လွမ်းတယ်။ ကိုယ် သရုပ်ဆောင်ရတာကို သတိရနေမိတယ်...အဲ့တာက ကိုယ် ငယ်ငယ်လေးကတည်းက အမြဲလုပ်ချင်နေခဲ့တဲ့ အရာမို့လေ။ ဆယ်နှစ်လုံးလုံး ရုန်းကန်ကြိုးစားပြီး တည်ဆောက်ခဲ့တဲ့ အရာတွေကို စွန့်လွတ်ခဲ့ရတဲ့အတွက် ကိုယ် အရမ်းဝမ်းနည်းမိတယ်...ဒါပေမယ့်...ဘေဘီ သိတယ့်အတိုင်း....ဘေဘီ့ အတွက်၊ ဘေဘီ့ကြောင့် ဆိုတဲ့ စိတ်နဲ့ ကိုယ်ဘာမှ တွေဝေ တွေးတောနေခဲ့တာ မဟုတ်ဘူး။ အခုကိုယ့်ကို နောက်တစ်ခေါက် ထပ်ရွေး ခိုင်းရင်လည်း ကိုယ်ကတော့ ဘေဘီ့ကို ပဲ ဆက်ပြီးရွေးချယ်အုံးမှာပဲ။ ဘေဘီနဲ့အတူရှိဖို့ပဲ ရွေးမှာ"