خرافات زمان ليبية💗

"الدرويشه"💕

ليكم وحشهه😊

خرافه الليله..
قصة الدرويشة..

تحكي علي مرا ....زمان خذات راجل ...وهذيك لمرا كانت مقطع زين ....طول وڨد زي السنبلة ...والشعر سالف يضرب لحزامها ...والوجيه خلقه المولي منقوش نقش ...المهم ...هاديكا لمرا من نهار تزوجت  الراجل وهي تجري ولا تدري من قضية لقضية ... لغسيل ...لعجين ...لطبخ ...وتزرع ...وتحلب ..ورادة بالها من رزقو ..مايجيها الليل حتى  اطيح زي الرطبة من التعب ...يجي هو حداها ...تقولو  اليوم عييت قريب نموت من التعب ...يرد عليها هو ...يقول ..كان تموتي نحفر لك بقادومة الذهب .. هو يقول هكي وهي تزيد في الخدمة ..لين هملت روحها لاعاد خمت في ضفير ولا حنة ولازينة ولالبسة زينة كيما  النساوين ....عاد ماهو بيحفر لها نهار تموت بقادومة الذهب ..
نهار من النهارات فيه عجوز حاذڨة  ..وحدة فالحة تعرف البسباس ومن زرعو ...جت هذيك العجوز فاتت عليها المرا ..رايحة في حويلة سرافتها زي الجيفة ...وشعرها مكشرد عليها ...وحواجبها محط صبع ...والسنون مايبانوش من الغبش والايدين والرجلين حالة من الوشن ...من الزرع والحرث والقضية والغسيل ...شوي شدتها العجوزة  قالت الها خيرك يابنيتي هكي شكلك ...راجلك ميت وانتي في العدة؟! 🤔 ....قالت الها لا ياودي راجلي حي وهكي كبره ..وانا مش فاضية لروحي لاهية بيه وبولادو  وبحوشو وماكلتو وغسيلو  ورزقو ...علي خاطر ديما يحلف لي نهار نموت يحفر لي بقادومة الذهب ...ناضت العجوزة قالتالها طيح والله سعدك يادرويشة ...وانت صدقتيه ...ماهناك راجل مات علي مرا ...ونهار تموتي يغسل ايديه علي النعش ويقول ربي يرزقني خير منها...اشوي هذيك المرا نطت في العجوزة قريب كلاتلها وجهها ...إلا راجلي مافيش منه .
امشات العجوزة  قالتلها ليوم  نوريك راجلك وش يسوا.... ندبر عليك دبارة توريك راجلك كيف يفكر .
الصباح بكري ناضت هي وياها سقدت هاداك الرجل للسانية . هو طلع ماوصلش راس الشارع ناضت هاديكا العزوزة وسبلت المرا علي طولها ودردرت علي وجهها شوي بزار حتى ولات صفرا...بدات العجوزة تعيط وتبوص علي طول رقبتها ...جا الراجل يجري.... خير وش كاين ...قالتلو مرتك ماتت ...وربي خذى امانتو خبط ايديه علي بعضهم ...شوي قالت له العزوزة برا شوف شن دير في العزي واني الحين انغسلها وانكفنها واندير اللازم...هو مشي من هني .. ..وجات العجوزة ... شدت هذيك المرا غسلتها من قبوعة راسها لصبعها الكبير في رجليها ونظفتها رجعتها تضوي ضوي ونقات لها حاجبها وكحلت لها عيونها ...وحكت لها سنيناتها بطريف سواك وضفرت لها شعرها بالزيت والقرنفل ...وحنت الها ايديها ورجليها ...الحاصول كي لحڨ العصر ولات هذيك المرا صيفة تانية.
لبستها رويبة حرير و وقعمزتها قبالة باب الحوش ..ومشت ضبحت علي راجلها ....جي هاداك الراجل يجري...وش خصك يالحاجة..
قالت انا درت لي عليا  غسلت وكفنت  ليك مرتك شوف وين  تدفنها ....واني ضركا نروح انا وبنتي قبل صلاة العصر ونعتتلو على بنتها الي هي مرتو وقالتلها ..تعالي يابنينتي سلمي علي الراجل وعزيه باش نروحو ....جت تتستل دوب ماتتحرك ومدت له ايدها سلمت عليه ...هذيك  الايد محنية خطيفة زي الرطب ..وركبت معاه صنة القرنفل في شعرها والعين قابلت من ركن مكحلة سودة ..والحاجب زي خط الوڨيد...هاداك الراجل تخلطتلو ..ريڨو نشف .😂 ...وشد العجوزة من ايدها ...وقال الها ...هذي بنتك ياسعد من داها  ..ماشاالله ...ناضت العجوزة  قالتلو  فرقت حالها بنتي قاعدة بلا ماخذة .(يعني بدون زواج) ..انصدم هاداك الراجل ...قال للعجوز لواه قاعدة بلا زواج  ...وهي زين وڨد..ماخاصها شي ....والله كان تقبلي فالحين نقرا فيها فاتحة وماتروح معاك وتبات من الليلة مرتي ...بعد ماندفن مرتي الاولى ......ناضت العجوزة  قالت له مادبيا وين نلقا خير منك غير حاجة وحدة برك ...بنتي عندها شرط واحد وحالفة ماياخذها راجل الا لما يوافق عليه ...
قالها وش شرطها ...اهيا رقبتي وتشرط حتى  تعيا ...اللي هكي شكلها تشرط كيما تحب ...ومرتو ..تسمع فيه . تسف في الملح وتاكل في بعضها .
ايا لعجوز حكات للراجل على شرط بنتها واللي هو "الراجل لي يخذها يڨعمز في الوطا ويتربع ويحط فوق راسو ليان حديد كبييير
قالها هذا الشرط برك؟؟  ...اجري ياعجوز جيبي الليان ...مشات العجوزة  جابت ليان كبيييير وقعمز و تربع في الوطا وحط الليان فوق راسه ...نادت العجوزة  لمرتو وقالت الها اركبي ...ركبتها في الليان ..
امشت هاديكا العجوز ضربتو بعكوزها علي عنقته بقوة قوتها ...لين تبزع عليه البول ... وهبط مع لحدور جا راسو في شجرة وطاح ميت  وقالتلو ..
هادي الاولى ياولد القبيح ....اللي ما ينفع معاه مليح ...وهذي خرافة على لمرا الدرويشة لي طالڨة على روحها وتحسب الراجل هو كل شي وان شاءالله تكونو فهمتو العبرة وعجبتكم حكاية الليلة
هيا اسلامتكم توا ليلتكم سعيدة وتصبحوا على خير