خرافات زمان ليبية💗

جميلة وغول الوادي💕

حكايتنا اليوم علي عويلة علي قد حالها فقيرة .. الشويباني فيها صحته علي قده والاميمة حاشاكم مقعدة ..ولطف من ربي سبحانه رزقهم براس بنية اسمها جميلة باش تعانيهم وترد بالها منهم قايمتهم برة وداخل مامغيبة عليهم حاجة تنوض الصبح بكري مع الفجر تنوض اميمتها ووبيها وتفطرهم وتوتيلهم حويجاتهم ومالازمهم وبعدها تطلع معاها جريرات المية تمشي للعين تعبيهم وبعدها تمشي  الوادي تلقط اللي تلقاه من حميظة من خبيزة من ترفاس ولا زويتينات ولا فواكه من الشجر وكان لقت في طريقها حطيبات اللي مخليينهم الحطابة تصرصرهم وتكرهم علي ظهرها .. وبعد تروح تاخد منهم شوية ماسدها والباقي ترفع فيه لحوش مرت كبير التجار تبيعلها فيه والفليسات حقهم تشري بيهم مالازمهم من الحاجات التانية .. وبعد تكمل تروح للحوش تحط القدر عالنار واطيب غديها بهدوكة العشيبات اللي جايبتهم والدقيق اللي شراته مرة رشدة مرة بازين مرة بركوكش تعدي في الوجب كل مرة حويجة وفي الليل تبدا عجينتها واتية وخامرة ترمي هديكة خبيزتها في رماد الحطب ويتعشو خبيزة سخينة مع زيت الزيتون وحبيبات زيتون ولا مع طويسة لبن يتحمدو ويتشكرو ويقضو الصلاة اللي عليهم وكل واحد يتكى في فريشه يرقدو في دويرة وحدة زي ناس زمان مدايرين ستير بيناتهم ترقد هيا واميمتها في جهة ووبيها في جهة وزماااان لا كان عندهم لا تلفزيونات ولا راديو ويبدو يهدرزو طرالها جرالها ويخرفو في خرافات لين ياخدهم النوم لتاني يوم ... نفس الروتين عايشين بيه عمر..
تمشي اايام وتجي اايام وهما علي هالحال حياة بسيطة عايشينها القلوب صافية وراضيين باللي اعطاهم ربي لا يوم اضايقو ولا شكو وكل يوم يحمدو في ربي علي النعمة وراحة البال ..لين جي هداكة اليوم اللي تغيرت فيه حياتهم واللي عليه خرافتنا اليوم ..
ياحناا يامنااا في يوم من ايامات ربي زي العادة طلعت جميلة من الحوش بعد كملت شغلها اللي ادير فيه
كل يوم رفعت جراتها علي ظهرها ومشت للعين وعبتهم وخشت للوادي باش تلقط زويتيناتها والحطيبات تمشي وادور من هني من هني والعويدة اللي تلقاها تصرصرها وتقيمها فوق ظهرها تمشي هني وهني ادور وتلقط لين خشت في دغاريق جديدة وشجر متشابك لين معاش عرفت روحها وين .. وبعد لقطت مايعبي صرتها قامت راسها تبي تروح ماعرفتش لا هيا وين ولا جهة حوشهم منين تقبل .. مشت يمين مشت يسار بالك تلقى امارة صخرة ولا شجيرة ولا كبوة تعرفها ولا تدلها علي طريقها ... شيء مالقت .. ياحليلي كيف بندير ..يحليلي اني وين وشن دخلني لهالدغاريق .. تمشي وتوحوح الدنيا خالية مابان عليها كان الشجر والتراب علي حد شبح العين جبال حايطين بيها وخلاص .. فات النهار وعشت العشية وقرب المغرب وهيا رويقها يابس تجري هني وهني تمشي مسافة وترجع..  لا هادي الطريق ..لا مش هادي ..لا غير خلي نزيد القدام وشي ماعرفت لا منين تطلع لا منين تخش .. حوش بوها ماعاد عرفتله طريق..  ظلمت عليها الدنيا وهداكة القلب من الخوف قريب يطلع من بين ضلوعها.. ياهمي شن اللي درته لروحي .. ياحليلي تو راهو امي وبوي مشغولين عليا وحتى من الشر واخد فيهم خصة من الصبح وفطور الصبح ماضاقو حويجة ، نزلت صرتها وجت فوق كومة حطبها وقعمزت تفكر شن بدير وتدعي لربي يبعتلها من يونسها ويدلها عالطريق ... استنت استنت مابان عليها حد .. تحركت هديكة الريح والجو صقع كمشت يدياتها ورجليها وتكمكمت زين بحويجاتها وشالها اللي كانت طارحاته علي كتافها وجت قرب شجيرة اتكت عليها باش اتقي عليها الصقع وقعدت تخمم شن بتدير... قعدت مشوار وبعدين قالت : تو شن عندي ماندير بنرقد في مكاني لين يصبح عليا الصبح وتبان عليا الطريق زين ... باش اروح هكي ربي رايد .. تكت راسها غمضت عيونها وهداكة النوم قال بوي باعني هرب ..تقلبت علي جنبها اليمين اليسار رقدت علي ظهرها فتحت عيونها العقل مشغول والقلب من الخوف والهدوء اللي حايط بيها والوسواس ماخلاهاش ترقد ..وقعدت تتخايل في الحاجات بحداها كانها تتحرك وتتخايل  في الغوال اللي سمعت بيهم في الخرافات  اللي كانت هيا وبوها وامها يخرفو فيهم كل ليلة ..  تعودت من الشيطان وقرت شوية قرآن وقعدت تصبر وتلهي في روحها بلا فايدةً كان مازادت في خيالاتها اكثر ... تكفتلت في هداكة الشال وغطست راسها في الوطا زي النعامة وغمضت عيونها .. معاش فيها حل الا انها تستنى الصبح لين يصبح ... انتصف الليل والنوم طاير ودقات قلبها من الخوف تسمع فيهم تقول دربوكة ... شوية وجاها في وذانها صوت دوشة وحس كانه سباع يلقطو في روحهم وجايبنها ...
-ياكباااادي يامطول ليلتي شكلها ليلة طنبة الليلة علي راسي اياماتي سود .. هادو سباع ولا غوال زعمة 🤔
قرب الصوت وبدت تسمع في دوشة .. صوت حركة علي رجلين .. علي نفس .. شيء لله العجب هههه  .. غمضت عيونها وقالت لروحها : جميلة شن اللي جاك... اهدي يابنت هذا كله مش حقاني راهو ... خيال ووهم صورهولي عقلي من كثر مااني خايفة ونوسوس ...
الصوت شماله ويزيد وبدي يقرب منها اكثر واكثر لين تأكدت انه حق مش خيال ويتهيألها .. قلبها قعد يطق وركابها صبن فيهن المي 😂 وقالت:
-هذا شنو ياغبارتي ..شنو اللي جايني في عقابات هالليل .. ؟! اول مرة صوت بس وماشافت شيء قدامها وبعدين بدت ياحنا تحس في الوطا كانها تتهزز من تحتها ... ايديها بدو يرعشو ورجليها يتصرفقو في بعض والقلب يطق والعوينات يشبحو يمين ويسار والرويق يابس وتفكر ..زعمة من اي جهة جاييني غبر فيهم ...وشن هما ياكبادي ..وشن جيبهم في طريقي ارزيني فيهم..؟!
غطت وجهها بشالها وقعدت تتعوذ من الشيطان وحتى السورتين اللي حافظتهم في راسها راحو من الخوف وقعدت تدعي لربي يشبح فيها ... ماتندريش لين حست بجهامة طول وعرض ضخمة فوق راسها وظلها مغطيها وكانه وراه جيش من دوشتهم وصوت رجليهم وهزان الوطا تحتهم ..خافت وغمت روحها وتكمشت في شالها علي الوطا وحتى الشبح من الخوف ماقدرتش تشبحله ولا تقيم عيونها فيه  وقعدت علي هالحال بين صحوة ووقضة لين فاقت علي صوت غريب يرعش قاللها : منو هني..؟! النفس انقطع منها والصوت من الخوف معاش بي يطلع وهداكة القلب عالم بيه ربي قريب ينفقع ويطلع من صدرها .. قوت عزمها وبلت شواربها وزمطت ريقها وقالتله : اني ياعمي.. قلها تعرفيني اني منو ..؟ !قتله ايه وكيف مانعرفكش ..قالها باهي اني منو..؟!
جميلة مصلي عالنبي عليها مع زينها وسماحتها كانت ذكية حادقة وفاطنة قتله كيف عاااااد .. منو مايعرفكش ... انت سيد الغوال وسيد الخلا ومصدر للخير ومصدر البلاء ... ضحك وقالها بااااهي كيف تشبحي في زيني..؟! قتله ااااايه خليني ساكتة زينك ماهناك لا في انس لا جان قمر زاهي وضي يشكع في ظلامات الليل .. زاد في ضحكته لين الدنيا قعدت تهز من تحتها وقالها : باااهي غوالي اللي وراي شن رايك فيهم ؟! قتله:  اااااايه بالله تقول جيش ولاد هلال واميرهم بوزيد في زمانه ...الغول فطس من الضحك لين طاح عالوطا ... هدت جميلة وفرحت واطمنت انه الليلة ماهوش متعشي بيها كمل ضحكه وناض وقلها باهي منين انتي ووين تسكني ...؟!قتله في القرية الفلانية وبنت فلان الفلاني .. نادي علي كبير الغوال وقاله دندشها ذهب من راسها لساسها وعبيلها صرتها وارفعها معاها وصلها لحدود قريتها ... رمشة عين فتحت جميلة عويناتها لقت روحها قدام قبيلتهم وهداكة الذهب في ايديها ورجليها ورقبتها يشكع وصرتها في جنبها معبية لين تتبازع ... كرت روحها اشبح كيف ووصلت قدام حويشهم وطقطقت عالباب الاميمة والوبي قفزو من مكانهم مشغولين علي بنتهم اللي تنافص الليل لا روحت ولا سمعو عليها خبر يطمنهم فتحوا الباب واول ماشافوها قدامهم الفرحة عقدت لساناتهم قعدو يشبحو بعويناتهم يشبحو في بنتهم تشكشك مع بعضها زي كراريس القزدير ..ذهب ورزق لا كان يخطر عالبال لا على الخاطر حتى في الحلم ماحلموش بيه .. ذهب حقه يسدهم لولد الولد ويفيض .. خشت سكرت الباب وقعدت تحول في هداكة الذهب اللي لابساته وتعرم قدامهم وبعد كملت خدت صرتها ونكتتها حتى هيا ..
هذا شنو ... ولمنو ... ولقيته ولا اعطاهولك حد..؟! حكتلهم اللي صار معاها والغول اللي طلعلها واسألته ليها وشن جاوباته وقتلهم لولا خرافاتنا اللي نخرفو فيهم في الليل واللي تعلمت منها هلبة حاجات راني ماروحتلكمش .. قلها بوها هذا غول بو قفة مافيش حد مايعرفاش عايش في الوادي ليه سنين يحكولنا عليه جدودنا يطلع للبنادم لما يكون بروحه وينشده وكان عجبه كلامه يغنيه لولد الولد ويطلقه وكان لا يدكه في قفته ه ويختفي هو وياه وماعاد اماليه يعرفوله جرة والحمدالله يابنيتي اللي ربي الهمك للجواب الصحيح ..