خرافات زمان ليبية💗

الكلب بو سبعة سلاسل💕

#خرافتنا_اليوم

#الكلب_بو_سبعة_سلاسل

الحلقة الرابع و الأخير
وصلنا في حكايتنا لما اميرتنا طلبت من ولد السلطان يحكيلها حكايته وعلاش من صلاة المغرب لاذان الفجر يتحول لكلب مستغول ، وقاللها انى ولد سلطان هالبلاد والسلطان ماعنداش غيري اني وريث عرشه . السلطان كان حاكم عادل ويخاف ربي وجابلي احسن شيوخ في المملكة قروني أحكام الدين وحفظوني القرآن الكريم ، وفى يوم من الايام باقي على صلاة المغرب دقائق ونصلي طلعت نتنزه فى حديقة القصر لقيت نخلة صغيرة فيها عرجون بلح واحد وكل حبة بلح سبحان الخالق كبيرة وتشهي الناضرين ، مديت ايدي وخديت منها حبة وكليتها وطعمتها عمري ماننساه لحد الان في فمي ، وبعد كليتها خديت النواية وحذفتها على طول يدي جت في غدير امية وجت في عين طفل من الجان وخسر عينه ، وفجأة طلعلي مارد كبير موحش أطول من قصر السلطان ووجهه معبي عيون من جميع الجهات وعنده قرنين في أعلى جبهته شبحلي وعيونه يتقدو نار وخدي بايده امية من الغدير ورشها علي وجهي وقالي انت حامل كتاب الله وقاري تعاليمه وخليت ولدي يخسر عينه لكن تو تشوف شن يجيك؟!! احسب اسبوع واحد وبعده حتتحول إلى كلب مستغول من الساعة اللي حذفت فيها النواية علي ولدي ، (وكانت المغرب) إلى آذان الفجر طول حياتك الباقية زي ماخليت ولدي يعيش بعين واحدة بقية عمره.
وهذا الكلب المتوحش مايعرفش,بنادم اللي يجي في طريقه ياكله حتى بوك السلطان وامك ومايقدر يغلبك ولا يشدك حد وتقتل كل اللي يجي في طريقك ولازم يقيدوك في سبعة سلاسل كل سلسلة مايقدرش يفكها عشرة رجالة ، واللي يصنع هاذي السلسلة لازم يبخ كل حلقة بمية الغدير قبل مايركب الحلقات في بعضها كان هذا الكلب من قوته يقدر يكسرها في دقيقة ويقيدوك بيها كان هذا تقتلهم كلهم وماتخلي بنادم حي، وما يفك هذا السحر الا صوت ملايكة يسمعها الكلب. .. اني حذرتك وانت علي كيفك !!! وضحك ضحكة لين هزت الأرض من تحته واختفي، واني اغمى عليا، ولما فقت لقيت روحى فى جناحي وبوي السلطان وامي مقعمزين بحداي يقروا عليا في القرآن ، قالولي ان الخدم لقوني طايح بحدا الغدير ومش عارفين شن صارلك؟ حكالهم اللي صار معاه والسحر اللي دارهوله الجني . دموعهم نزلو وبكوا وبعدين سلمو امرهم لرب العباد وقالو هذا مكتوب ونصيب ، وامر بوي السلطان جميع الحدادين باش يصنعو السلاسل قبل ماتفوت مهلة الاسبوع ويرشوها بمية الغدير زي ما قال الجنى وقعدو يشتغلو ليل ونهار باش يقدرو يكملوهم في الوقت المحدد، وبنولي هاذي الدار وجهزوها بأحسن فرش ، وفى اليوم السابع كان كل شئ جاهز وجابوني في موكب بوي السلطان وامي والوزراء والخدم والحاشية وقيدونى بالسلاسل وودعوني بالحزن والبكي والدموع واول مااذن المغرب تحولت إلى كلب متوحش وضخم وقعدت على هالحال في النهار كلب وفي الليل نرجع انسان ومانبيش نضيع ولا دقيقة من غير صلاة ودعاء لله باش يفك عني هذا السحر ونرجع بنادم من جديد ، ومن اول يوم جيتي للدار شعرت بيك لكن قلت خلي تتعود عليا قبل وبديت نرقد في السجادة بدل السرير باش ماتخافيش,مني.
وهادى قصتى يا بنت الناس من اولها لاخرها، وتوة نبى نعرف قصتك انتي . اميرتنا سمعت القصة وعيونها تعبوا دموع ونزلت علي خدودها وبدت تحكى فى قصتها لولد السلطان من اول ماطلعت من قصر بوها السلطان لليوم اللي وصلت فيه للدار ، تحكي وتبكي والامير يصبر فيها وقالها وصلتي مكتوبك وربي كريم مش حينسانا نصبرو لين يجينا الفرج وينفك عني السحر.
سمعت وسكتت وبعدين قلها انتي مكتوبي واني مكتوبك وربي بعتك ليا لحكمة ونبي نعيشو مع بعض بالحلال !!!!تقبلي تكوني زوجتي ونعيشوا مع بعض لين يجينا الفرج؟!!! قتله طلعت من قصر بوي السلطان واني عارفة مكتوبي كلب ودورتك وجيت ولازم نكمل مابديت، قلها خلاص علي بركة الله غدوة بيجو الخدم وبياخدو حوايجي للقصر نكتب رسالة لبوي السلطان يجي غدوة المغرب هو وأمي ومعاه شيخ يقرالنا الفاتحة ويزوجونا بالحلال، وتى هديكة الرسالة وحطها مع الحوايج وطلع جاب للاميرة ماتاكل وتشرب وبعدين هيا ركبت للسدة ونزلت الستار ورقدت في سريره والامير قعد لوطة راقد. صبح الصبح وفاقت علي نباح الكلب اللي قالب الدنيا.
ومع المغرب تحول الكلب الى بنادم غسل ولبس احسن الثياب وقعد يستنى في بوه السلطان. شوية ووصل السلطان والسلطانة والشيخ والشهود ومعاهم كل خير من ماكلة وشراب ولبس.، تبان الفرحة بعيونهم ، فرحانين بوليدهم وتلاقو مع الاميرة وسمعوا قصتها شكروها وقالولها اللي تبيه يوصل لعندك واصبري معانا ربي مش حينسانا وجوها الجواري غسلولها ولبسوها لبس,الاميرات وجهزوها للعرس وطلعت ماشاءالله قمر في كماله، وجي ولد السلطان والشيخ وقري الفاتحة وجمع بيناتهم بالحلال، وقعدوا شوية كلو وتعشوا وروحوا كل واحد لمكانه ، وقعدو علي هالحال في النهار يتحول لكلب وفي الليل لما يولي بنادم يطلع هو والاميرة برة في الجنينة يسهرو وياكلو ويهدرزو لقريب اذان الفجر تهرب الاميرة للدار وهو يتحول لكلب وقعدو يستنو في الفرج. مشت ايام وجت ايام وهما علي هالحالة والاميرة ماشاءالله من اول شهر حملت من الامير وفاتت شهور الحمل علي خير، وخش شهرها وفي يوم من الايام مع صلاة الظهر بدت الاميرة تتوجع وسهل عليها ربي وحن وجابت أمير صغيرون زي الغزيل هداكة الملايكة، وزي كل عيل اول ماينزل يبدأ في العياط وهيا تسكت فيه خايفة عليه من الكلب يسمعه,ويزيد يهيج، وهداكة الكلب يسمع في الصوت وزاد في النبح وفجأة سكت ويبس,في مكانه ويوقف علي رجليه وينشق جلد الكلب ويطلع منه ولد السلطان ، قعد يتلفت يمين ويسار الدنيا مازال نهار والسحر تحول منه وجلد الكلب اختفي من بحداه، مشي يجري للدار بيفرح زوجته الاميرة ، لقاها مقعمزة وترضع في الامير الصغير باش يسكت , من المفاجأة نزل علي ركابيه يضحك ويبكي ويسجد عالارض يحمد الله علي نعمته ناضت الاميرة فرحانة ومش مصدقة اللي صاير وحضنت الامير وقعدو يبكوا مع بعض ويشكرو في ربي، ولد السلطان خدى وليده وضمه لصدره وباسه اعطاه للاميرة ومشى يجرى برة غسل ونضف وتوضا وسجد للمولى سبحانه وتعالى حمد وشكر تاريته الجنى يقصد بكلمة ملايكة مولود جديد .
فرحتهم لا يمكن وصفها وجو الخدم جايبين غدي للكلب بو سبعة سلاسل، ولما وصلو دورو الكلب مالقوشي وخرو وخافوا يحسابوا الكلب قطع سلاسله واشبح وين مشي. خافو وجو بيرجعوا بيقولو للسلطان انفتح باب الدار وطلعلهم الامير وبين يديه الامير الصغير .من الفرحة جوه يتجارو نسو انه الامير وقعدو يبوسو ويضبطو فيه ، قالهم ماتقولوش,لبوي السلطان برو جيبولي كروسة وتعالوا ، جابوله الكروسة ركب هو والاميرة والامير الصغير وتسقد للقصر وقالو للسلطان عندك ضيف برة قريب كروسته توصل والسلطانة قالولها زوجة ابنك الامير جايتكم في كروسة وطلعو هما الاثنين واول ماوصلت الكروسة نزلت الاميرة وفي ايدها الامير الصغير جوها يجروا فرحانين شدو الامير وبعدين قالولها كيف قدرتي تطلعي من الكلب وتجينا ، قتلهم جبته معاي حارو!!!! كيف جبتيه معاك وفتح باب الكروسة ونزل الامير ومانحكيلكمش شن صار وكيف كانت فرحتهم يبكوا ويضحكوا في نفس الوقت والناس اللي يسمع يجي والدنيا تلمت عليهم كلهم فرحانين ومش مصدقين اللي يشوفو فيه
وبعدين الملك قال للخدم جيبوا الكروسة الملكية بندير جولة في المملكة اني وابني وزوجته وحفيدي الصغير،والناس كل واحد ركب في كروسته واللي علي رجليه ودارو موكب وراء السلطان وتجولوا وراه في شوارع المملكة فرحانين بيطيرو .
وعاشت الاميرة في القصر احلى ايامها مع ولد السلطان والامير الصغير اللي كل يوم يكبر قدام عيونهم ، وبعد سنة طلبت الاميرة انها تزور بوها السلطان وتفرحه بحفيده واطمنه عليها وافق الامير وقلها حتى بوي السلطان وامي السلطانة بيزورو بوك السلطان وبيتعرفو عليه ، فرحت وبدت توتي في روحها وبعد ايام جهزوا السفينة محملة بالهدايا وكل خير وتسقدو ، وبعد أسابيع وصلو للمملكة واستقبلوهم وفرحوا بيهم وضيفوهم وتلاقوا مع الاميرة الصغيرة وولادها الاثنين وقالت لاختها الاميرة أن اختهم الكبيرة زارتهم هيا ويوسف المسحور واميرات القصر الثلاثة واتفقوا يتلاقوا مع بعض كل ثلاثة سنين وقتلها فاتت سنة وبعد سنتين حنتلاقوا تاني وانتي معانا ، السلطان والسلطانة قعدوا عشرة ايام وروحوا وهي قعدت ضيفة عند بوها السلطان شهر كامل وبعدين ودعتهم ورجعت مع زوجها وابنها ووعدتهم انها كل سنة تجي تزورهم .
ومشيت عليهم وخليتهم بوذني سمعتهم وبعيني ماريتهم وانشاء الله عجبتكم الحكاية