خرافات زمان ليبية💗

الكلب بو سبة سلاسل💕

#خرافتنا_اليوم

#الكلب_بو_سبعة_سلاسل

الجزء الثالث:
وصلنا في حكايتنا لما الاميرة رجليها من الخوف معاش حاملينها ووخرت اتكت عالسور وقعدت تدعي وخايفة وقالت كيف هذا الكلب المتوحش بيكون نصيبي؟ وكيف نقدر نهديه ونخش لهديكة الدار اللي وراء الكلب؟
كان فيه زوز جوابي كبار وبيناتهم ممر ونهاية الممر الدار والكلب قدامها كيف بتخشلها؟؟ وبعدين تفكرت.... آآآه !!!!: صح نسيت اللقيمات السبعة .. طلعت لقيمة وقربت وهداكة الكلب زاد في نباحه وهاج عليها بيقطع السلاسل وحذفت اللقمة قدام الكلب ، وجي الكلب يجري للقمة ولهي فيها وهيا جري لهداكة الممر وقلبها من الخوف قريب يطلع من ضلوعها خشت للدار وسكرتها وقعدت تشبح فيه من شق الباب، كلي هداكة الكلب اللقمة وبعدين هاج تاني وينبح,بيقطع السلاسل.
خشت وقعدت تتفرج علي هديكة الدار نظيفة مفرشة بأفضل واغلى الفرش ولقت في التركينة سدة,عليها ستار حرير جت وقامت هداكة الستار لقت سرير عليه فراش مريح وشراشيف مطرزة ومخاد ناعمات من الريش ، فكرتها في قصر بوها السلطان و جناحها هيا ووخياتها وعيونها تعبوا بالدموع ، ركبت للسدة اللي فوقها السرير واتكت فيه ومن تعبها,خداها النوم وتلوحت ماعاد تندري علي حاجة ، جي العصر ولحقه المغرب وهيا راقدة، وبعد المغرب تسمع في زي الحلم صوت راجل يجود في القرآن بصوت حنون كأنه يصلى فى المغرب استغربت وفاقت مش مصدقة ودانها!!! هذا حق ولا حلم منو زعمة يقرأ في القرآن ويصلي,في مكان زي هذا؟ ناضت وفتحت عيونها وقعدت تشبح من فتحة الستار لقت راجل ما شاءالله النور طالع من وجهه ويبان عليه من هيئته ولد سلاطين واقف بين يدين ربي يصلي ويقرأ في القرآن بصوت عذب وحنون ، خافت وما عرفتش شن صاير ؟ومنين جى هالراجل ؟وكيف خلاه الكلب يخش للدار؟ ردت الستارة بالشوية وقعدت فى تركينة من السرير وتستنى شن بيصير ؟
كمل هذاكة الراجل صلاته وماناضش من اتجاه القبلة شد السبحة وقعد يسبح مدة لا بأس بيها وبعدين شد المصحف وقعد يجود في هدوكة الايات من حلاوة صوته لين دموعها نزلو والسور اللي يقرأ فيهم كأنها اول مرة تسمعهم وهيا مرة مرة تقيم الستار شوية وتشبح فيه.
وقعد يقرا في القرآن لين إذن العشاء صلاه وسبح وبعدين اتكى عالصلاية وخداه النوم .، ولما شافاته رقد حتى هيا توسدت,مخدتها ورقدت لين صبح عليها الصبح ناضت علي صوت هداكة الغول ينبح وبيقطع هدوكة السلاسل.
ناضت بالشوية من الفراش وقامت حاشية الستار بتشوف الراجل متاع البارح شن صار فيه ؟ مالقتش صنته وقفت ونزلت من السدة وقعدت تشوف يمين ويسار مالقت حد ، شافت من شق الباب ويقابلها هذاكة الكلب الهايج ، زعمة الراجل وين مشي؟ ولا هالغول اول ماطلع كلاه !!! قعدت حايرة وبعدين تسمع في صوت برة شافت من الشق ألقت سبعة عبيد جايبين مايوكل بلاد ماكلة وصبوها في وحدة من الجابيات والجابية التانية عبوها امية لفوق وطاروا يجرو اشبح وين؟
الكلب حاشاكم غطس في هديكة الماكلة وشرب امية وبعد ما شبع رجع لهياجته تاني والنبح لين ودانها قريب ينطرشو، وقعدت في هديكة الدار يوم كامل لين قرب المغرب وحست أن الكلب هدي شوية ومعاش ينبح زي قبل ، نزلت تجري من السدة وقالت زعمة فاش لاهي وجت لشق الباب وقعدت تشوف ، المغرب قال الله واكبر وهداكة الكلب يبس في مطراحه وانشق جلده ويطلع منه هذاكة الشاب اللي شافاته في الدار يصلي ويقرا في قرآن . هذا شنو العجب اللي نشوف فيه ؟ حارت وقالت هذا الغول ماقاليش عليه ، قعدت تشوف من الشق لقت الشاب طلع برة من السور فتحت الدار ولحقاته تبي تعرف شن قصته ؟ لقاته ماشي لجابية وراء الحوش وغطس فيها غسل وبعدين جفف روحه ولبس لبس ولاد السلاطين . رجعت تجري للدار وركبت فوق السدة وقعدت ساكتة خش للدار وخدى الصلاية ووجهها للقبلة وصلى المغرب وهو يرتل فى القران بصوته العذب ، وبعد كمل خدي السبحة وبدي يسبح ، وبعدين شد القرآن يقرأ لين اذن العشي صلاه وسبح وحط المصحف في مكانه واتكى خداه النوم ،
اميرتنا قعدت خايفة ويابسة في مكانها قالت بالك لما يشوفني يتحول لكلب تاني وياكلني مانبيش نوريله روحي لين نعرف شن قصته؟
..رقدت للصبح وفاقت نفس الشي علي نباح الكلب اللي بيقلب الدنيا
اميرتنا ليا قداش يوم جيعانة خلاص معاش قدرت تتحمل ، خدت لقمتين من لقماتها وحذفت وحدة للكلب وطلعت تجري ، مشت للغابة اللي بحداها وغسلت في هديكة الجابية وكلت اللي لقاته وشربت، ولقت نخلة لقطت منها تميرات وصرتهم وامية باش ترفعهم معاها للدار، دارت حوالين السور تشبح من بعيد في مدينة كبيرة ، قالت خلي نشوف قصة الامير اللي يطلع من جلد الكلب وبعدين نشوفها.
رجعت للكلب حدفتله اللقمة وجري خشت للدار وسكرت الباب
وقعدت تفكر المغرب بيجي وزعمة شن ندير مع الامير ؟
اذن المغرب وطلع الامير من جلد الكلب غسل ومشي للدار صلى وسبح وقري القرآن، وكل يوم علي هالحال واميرتنا في الدار وكل ماتطلع تحذف لقمات للكلب لين تمو ومعاش قدرت تطلع وجي المغرب وهيا جيعانة وعطشانة ولابدة في السدة وهداكة الأمير يقرأ في القرآن بحداها ، ولما كمل اتكى بيرقد وهيا من الجوع هديكة البطن تزوي,مابتش تسكت وفجأة تلفت الامير لأول مرة للسدة كان ديمة لاهي في الصلاة والتسبيح وسمع الصوت !! قال السلام عليكم اطلع يااللي وراء الستار عليك الامان وخاتم سيدنا سليمان، ردت عليه السلام وقتله خايفة تاكلني ، قلها ماتخافيش اني بنادم لين يذن أذان الفجر اطلعي يابنت الناس وشكلك جيعانة تعالي بسم الله،
فتحت الستار وهيا خايفة وترعش ونزلت وقتله اني امانة عندك لين يأذن الله ، قالها مرحبا بيك تعالى وما تخافيش منى وهذا المصحف في يدي شاهد عليا.قربت بحداه وقعمزت قبالته .قاللها احكيلى يا بنت الناس شن جابك هنى؟ وكيف وصلتى؟ وكيف قدرتي تخشي للدار والكلب قدامها؟ قتله انت اللي حكايتك عجيبة غريبة ومايصدقهاش عاقل احكيلي شن سرك وقصتك انت وهالكلب.
قالها هيا اسمعي : اني أمير هالبلاد وولد السلطان ووريثه في العرش ........!!!!!!

زعمة شن حكايته هالامير؟ ومنو سحره لكلب ؟ وهل تقدر اميرتنا تفك عنه السحر؟ هذا كله حنعرفوه في الجزء الرابع والاخير بإذن الله

تصبحو علي خير