خرافات زمان ليبية💗

الكلب بو سبعة سلاسل💕

#خرافتنا_اليوم

#الكلب_بو_سبعة_سلاسل

الجزء الثاني:
وصلنا في حكايتنا لما الاميرات الثلاثة ركبوا الفرس وطاروا طيارة من هديكة المغارة وهديكة الفرس تجري بيهم زي الريح لين تباعدوا مسافة باهية وبعدين بدو بالشوية عليهم وكل مرة يرتاحو ياكلو ويباتو في وحدة من البلدان اللي وصلولها وينشدو في حتى خاطم الطريق ماسمعتش بالكلب بو سبعة سلاسل وهما اللطف شيء ماواحد قاللهم حويجة ، وقعدوا يمشوا كل مرة لبلاد ولما يتعبوا يرتاحو
وقعدو ايام وايام علي هالحال لين وصلو لغابة وتوة عاد عرفو علي شني يدورو قعدو يدورو عالرخامة متاعتهم ولقوها ونفس الشي كلموها وردت عليهم وحولوها,ولقوا تحتها دهليز ونزلو للقصر ولقوا الأخت الثالثة وفرحو بيها وهدرزو وكلوا وشبعو وسالوها علي الاميرة الكبيرة وقتلهم اعطيتها سبعة مداسات وسبعة,طواقي,وسبعة مراوح ومشت ادور في مكتوبها، قتلها وخيتها حتى اني نبيك زي وخيتي تسالي الغول علي مكتوبي. قتلها غير دسي حصانك وجيبيلي الريشات متاع الطير وكوني هانية دبارتك عندي
والدنيا ظلمت وهديكة السحاب والمطر والرعد والريح دست الاميرات في مكان وجي الغول ( صنة نصري في قصري شن جابهولي ياكسري ) ورتله رويشات الطير وحرقتله هدوكة الريشات وسفهم ودارتله عشاه وتعشى هديكة الليلة مابتش تساله قالت خلي يرتاح لغدوة و نجبد منه الدوة ، واول مارقد عارفاته للصبح ماينوضش وتت عشاها هيا ووخياتها والاميرة وتعشوا وارتاحو وهدرزو وبعدين كل وحدة رقدت .
رقد هداكة الغول لين طيب نومه وناض مع الضحى . جابتله فطوره وفطرت معاه وبعدين قعمزت بحداه ودارت روحها تهدرز وقالتله انت ديمة تجى وتمشى وما تهدرزش عليا .سملله قوللى شن ريت وشن سمعت من غرايب هالدنيا؟ قعد يحكيلها وهيا تسمع وساكتة وكل مرة تساله على حويجة في حكايته وبعدين قتله زمان دادتنا ديمة تخوف فينا وتقولى توة نحدفك للكلب بو سبعة سلاسل وانى نخاف ونترجى فيها باش ما تحدفنيش ليه .ضحك الغول لين هداكة القصر هز مع بعضه وقريب السقف طاح علي روسهم وقاللها ما تخافيش هو مربوط بسبعة سلاسل ما يقدرش يجيك ، قتله هو انشالله حق فيه كلب بو سبعة سلاسل؟!! قاللها ايه طبعا قالتله وهذا بسم الله كيف يوصلوله قاللها لازم اللى بيمشيله يبيد سبعة مداسات من مداساتى فى سبعة برور بيناتهم سبعة بحور لازم يعبرهم بطاقية من طواقيا وبعدين ياخد سبعة لقيمات من لقيماتى باش يلهي بيهم الكلب ويخش لدويرة مابين صورين و..............؟؟ وماباش يكملها باقي الكلام
.مابتش تزيد تسأله خافت يكشفها ودارت روحها خافت وقتله انشالله ربي يفكنا منه ،ضحك عليها وقاللها ما تخافيش مايقدرش يجي هني. هدرزت معاه شوية وقتله اليوم ماتطلعش لين تتغدى معاي تو بتغيب هلبة ايام باش نشوفك تاني ونهدرز عليك ، فرح من كلامها وقالها باهي ، ومشت ياحنا دارتله ماكلته اللي يحبها وقعمزت معاه وقتله هيا اني نطعمك وانت طعمني، وبدت أطعم فيه ومرة مرة تاخد منه في لقمة وادس فيها لين وصلو,سبعة لقمات حطتهم علي جنب وكملو غداهم وهيا تضحك وتهدرز عليه وبعدين قلها توة خلاص بنمشي قتله زينة ووصلاته لعند الباب وهديكة الدنيا ولت صفراء وبعدين حمراء ومشي علي حاله.
هو طلع من هنى وهيا مشت لوخياتها والاميرة تجري جهزو غداهم وحكتلهم اللي صار وجمعت سبعة مداسات قدم للغول باش يبيدو فيسع وسبعة طواقي واللقمات السبعة واعطتهم للاميرة وبدو. يجهزو في مالازمهم وقتلهم الاميرة توة خلاص احنا بنفترقو انتم الثلاثة خودوا الفرس واني بنلبس المداس الاول وبنمشي باش يبيد.
جابوا الفرس وحطوا عليها مالازمهم وركبوا الخوات الثلاثة وجت الاميرة ودعت فرسها والاميرات ووصتهم عليه وقتلهم اني بنمشي ندور علي مكتوبي وانتم انشاءالله توصلو لبلادكم سالمين وتسقدو وهيا توكلت علي ربي وقالت يارب ساعدني في مشواري ولبست المداس الاول وبدت رحلة المشي ومانحكيلكمش علي حالها المداس كبير وهدوكة الحاجات فوق ظهرها والشمس فوق راسها وعالم بيها ربي تمشي تمشي وتوقف تأكل وتشرب وترتاح وبعدين تسقد تاني وكل ماتلقى رشاد تبدأ تخرط في هداكة المداس تبيه يتقطع وقعدت ايام وايام لين تقطع هداكة المديس وبدت تسمع في طيور النورس وبانلها البحر وخدت الطاقية وركبت فيها، ومانطولش قصتي استمرت علي هالحال لين بيدت السبعة مداسات وركبت البحر بالطاقية السابعة
وهديكة الطاقية انتقبت وخشت فيها المية شافت قدامها لقت روحها وصلت الشط نزلت وتلوحت علي هداكة الشط ومن التعب خداها النوم ، ولما ناضت لقت روحها جيعانة لقت نخلات شجرات فواكه كلت وشبعت ولقت وادي امية حلوة شربت ، وبعدين خدت لقماتها السبعة وبدت تمشي لين بأن عليها بنيان توجهتله ومشتله ولما قربت منه قعدت تسمع في صوت نباح كلب من قوته لين الوطا تهز تحت رجليها، وبدت تتقرب بالشوية بالشوية لين وصلت لهداكة البني وبان عليها صورين واحد عاليمين وواحد عاليسار وبين الصورين ممر طويل يفتح فيه باب دار ، زادت قربت وياكبدي تشبح هداكة الكلب حاشاكم !!!!! ماهو كلب هو وحش كبره زي الثور الكبير وهايج زي الغول ومربوط بسبعة سلاسل كل سلسلة تبي عشرة رجالة باش يقيموها قوي وشراس و ينقز هني وهني يبي يفك روحه من السلاسل اللي مربوط فيهم ، وصوت نباحه يصمخ الودان ويخشش الرعب في قلوب اشجع الفرسان .وياكبدي اول ماقربت وشافها زاد هاج وزاد النبح لين الزبد بدي يطلع من فمه ، وعيونه ولو حمر يلمعو زي جمرة النار ويشح في هدوكة السلاسل يبي يقطعهم وينقز عليها وهيا مسكينة عيونها مفلوتات فيه من الرعب والخوف ، رجليها معاش حاملينها وخرت التالي واتكت عالصور وقعدت ترعش وخايفة وتفكر، ياربي كيف هذا يكون مكتوبي وهو كان غير نقرب منه يقطعني مية طرف .

زعمة شن بيصير فيها؟ وكيف تقدر تهديه وتخش للدار اللي وراه؟ وكيف بتفك عليه السحر؟ هذا كله حنعرفوه في الجزء الثالث بإذن الله