خرافات زمان ليبية💗

نجمة_وخابية_الزيت

#خرافة_اليوم

”زعما انقول 🤔...زعما لا ..؟! ياهمي وخلاص !!! تو كان بنقول بتطربق فوق راسي !!! وكان بنسكت بيحارفلي ايامي لما مايلقهاش ... يااارب الهمني اللي فيها الخيرة ليا وليه” ...

هادي نجمة خايفة من راجلها الواعر اللي ماعنده الريح وين ادور مايعرف كان الضرب والتكشيخ .... توا القصة هادي راهي من ايام الحلبة والكمون !!! ايام قديمة كان فيها الراجل سيد والمرا سمع وطاعة !!! بلكي تقدر اتقول اه لا لا لا تسمع وتنفذ بس .... نجمة اتكصرت منها الخابية متع الدهان .... ايييه اتكصرت منها خابية الدهان وهيا كيف غرفت منها غراف ناشتها جت متفرشخة اتفرشيخ !!! قالت الدهان نقدر نعوضه ناخذ من امي ومن خواتي لكن ياهمي الخابية متع حياة امه من وين بنجيب زيها .... امسيكينة قعدت ساعة حايرة كيف ادير ... طيبت غداها فيسع وهيا تحوس وماتندري شن حطت وشن ماحطتش .... طيبتله رشتة برمة ماهي عارفته لما يلقى الغدي رشته حتى من عيونه يضحكوا !!! روح الطاهر من خدمته ... فتح الباب وقربعه اتقربيع وخش ... لوح العلاقة على طول ايده في وسط الحوش العربي وجي على كرسي وقعمز ..... طلعت نجمة تجرررررري من الكوجينة  وتقول على سلامتك على سلامتك .... قاللها تي وين لميه السخونه ؟؟؟ قالتله اهيا اهيا واتية وجابتله كروانه فيها اميه سخونه وحطتها بحدا رجليه .... الطاهر يخدم في سانيته ... فيها النخل والزيتون والكرم والرمان و جديولات الخضرة ( معدنوس وشبت وسلك ونعناع .... )  توا عاد قلنا روح الطاهر من خدمة السانية تعبان وكل يوم ايروح امداير قانون لنجمة اتجيبله لميه السخونة ودلكله رجليه وتدهنهم بزيت الزيتون  وتغلفهم بطرفات قماش قطنيات وتنوض اتجيبله غداه يتغدا ويقيل شوية ويولي تاني للسانية .... قعمزت نجمة ادلك للطاهر في رجليه وهيا تدعي لربي لما يخش للكوجينة مايفقدش الخابية لين اتشوف دبارة باهية !!!! جابتله غداه حطاته قدامه وقمت الطبق اللي مغطية بيه القصعة ضحك وقال رشتة باهي باهي .... بعد ماتغدا قالتله نمشي لأمي العشية ليا وقت عليها !!!!؟؟؟؟ قاللها لا تو واني ماشي للسانية انقول لواحد من الصغار يقولها اتجيك !!! قالتله حاضر حاضر .... حمدت نجمة ربي اللي الطاهر ما تفقدش الخابية !!!! والعشية جتها امها ومن لما فتحتلها الباب وهيا اتقولها ياااااااميييييمتي طحت و جيت في شلامتك ياميمتي اعطيني الدبارة !!! قالتلها امها خيرك خيرك شن جاك !!!؟؟ قالتلها طاحت مني خابية الدهان وتفرشخت كلها كلها !!! قالتلها امها ووووك عليا ياغبارتك غبارة الضرب والخسارة !!! والطاهر عرف والا مازال ... قالتلها نجمة ياميمتي لميتها شكف شكف بدهانها في شكارة كتان كبيرة ودرقتها تحت السدة ورا الرحى متع حياة امه ... وهو الحمدولله خش الكوجينة ومتفقدش التراكين زي عوايده ... اليوم اخدم هلبة في السانية وروح تعبان تغدا ورقد طول وطلع مستعجل !!!! توا انتوا تقروا اكيدة وتقولوا هالخوف هذا كله على خاطر خابييييية !!! اايه على خاطر خابية وعلى خاطر الدهان .... الطاهر راجل واعر واحرف اتصدقوا كل يوم بعد مايتغدا ايدير دورة في الحوش كله يتفقد كل شي حتى التراكين يتفقدهم وياويلها نجمة من الضرب كان القي حاجة مش نظيفة وكان القي حاجة متكصرة وكان القي حاجة مش في مكانها وحتى من اوليداته يقعد ايقلب فيهم تقليب الحصيلة حالة وخلاص .... يعني حافظ حوشه حفظ وفيسع ما يلاحظ ...... نجمة عندها زوز اوليدات على روس بعض واحد عمره عام والتاني عامين .... قالتلها امها اتعاليلي جاي ماعندنا غير هالدبارة زمان قالتهالي اللاي فطومة درتها وخلصت بيها روحي ..... قالتلها قولي يام وعليك الامان من فمي ماتطلع وكان يحرقني بالنار .... قالتلها قوليله جتني الغولة !!!! قصت عليها وقالتلها ووووك عليا غووولة اتحصنا بالله !!!! قوليلي شي تاني يام الغولة انخاف منها وكان تطلعنا توا هي ....يابنتي اما خير امالا يضربك ويردك لحوش بوك ... قالتلها باهي قولي الدبارة قبل ونشوف ....  روحت امها تجرررري وولت فيسع وفي ايدها شكيرة كتان مدتها لبنتها وروحت  ... نجمة وامها جيران يفصل بينهم طابية هندي بس ... تاني يوم وزي العادة روح الطاهر من السانية وفي ايده علاقته قربع الباب اتقربيع وحدف العلاقة في السقيفة وخش يجري جرررري بعد ما سمع نجمة وصغارها في عيطة وحدة.... خش القي نجمة امقعمزة وشادة صغارها وتستمالها طايح منها وشعرها مقجقج وهديكا الخابية متفرشخة في نص وسط الحوش بدهانها !!! جاها يجري خيرك خيرك شن جاك وتلفت للخابية وصيح ووووك عليا خابية حياة امي منو كصرها قووولي .... قالتلها الغولة كصرتها وضربتني اني وصغاري .... سكت وقاللها الغوووولة !!! اتحصنا بالله اتحصنا بالله ... والغولة شن طلعها الصبح ... قالتله اني كيف فتحت الخابية بنغرف منها وقفت عليا الغولة وقالتلي نبي قديدة !!!؟ قالها وانتي شن قولتيلها ؟؟ قالتله اني من الخلعة والخوف قلتلها نعطيك حديدة على راسك !!! شوي قامت الخابية وطلعت بيها لوسط الحوش وفرشختها وخدت المغرف وضربتني بيه وقالتلي قولي للطاهر اطلق ايدك و اعقل !!!!  ..... ودورة اتلفتت اهني واهني معاش لاقيتها .... قعد الطاهر حاير !!! ايصدق ان الغولةطلعت في الصبح والا ايكذب ؟؟؟  قال لمرته باهي شن قالت تاني  ... قالتله هذا بس مانزيد عليك كلمة .... واني راني توا خايفة الحوش ومعاش قاعدة فيه !!! قص عليها بواعارته متع قبل شنوووو  الحوش معاش قاعدة فيه !!!؟؟ ان شاءالله تأكلك فيه الغولة ماتطلعي منه كانش مانت امطلقة والا ميتة !!! سكتت نجمة وناضت اتقيم في شكف الخابية هيا والطاهر ... والطاهر ايولول على هديكا الخابية والدهان ....  وقبل ما يرقدوا خشت نجمة للكوجينة وكفت القدر اللي اتطيب فيه على البابور ..... في الليل ناضت نجمة بالشوية جيهة الروشن وين ما راقدين اوليداتها وحذفت من الروشن تلاتة بالامات على طول ايدها  وجت تجري لراجلها ياطاهر ياطاهر وهداكا طاهر راااااقد طايب من خدمة السانية ... ابدت اتحرك فيه ياطاهر يااااطااااهر ناض الطاهر مخلوع خيرك خيرك ... قالتلها نوض نوض شكلها الغولة جت يااااهمي نوض صكر علينا الباب ... قالها كيف عرفتي ... قالتله شفت خيالها طووويل طالع من الكوجينة و فات من تحت الروشن وسمعت تلاتة رنات اشبح شن حذفت ... زمط الطاهر ريقه وناض يجري صكر الباب وللصبح وعيونه ايفنصوا ... ناض الصبح يتفقد في الحوش القي تلاتة بالامات محذوفات والقي القدر مكفي على البابور  قال بينه وببن نفسه هالبالامات هادوا عمري ما شريت منهم والكوجينة شفتها قبل مانرقد زمط ريقه وقال ياوالله حالة ... نوض نجمة وقاللها انتي كافية القدر على البابور !!؟قالتله لا ياودي وانت تعرفني مش من عادتي !!!! اسكت وطلع لخدمته حاير .... ووقت الغدي روح والقي الاحوال باهية ودلكتله نجمة رجليه وحطتله لغدي اتغدا وقيل وطلع لخدمته تاني !!! وفي المغرب وهو امروح من السانية القي زوز من جيرانه امروحين من خدمتهم ... قالوله وينك ياطاهر امالا معاش تسهر عند الحاج بلقاسم ؟؟ قاللهم والله نروح طايب وتعبان نرقد زي الميت ... شوي قالوله الليلة بنسهروا عنده اتعالى معانا ؟ قاللهم باهي ... روح اتعشى وقال لمرته راني بنسهر عند الحاج بلقاسم ومرات نعطل .... قالتله لا ما تعطلش واني منو بيا كان جتني الغولة !!! قاللها ما غولة خوفت غولة !!! وطلع لسهريته ..... وفي السهرية الهدرزة امخلطة كل مجموعة في موال ... هذا الحاج بلقاسم هكي مربوعته امخليها مفتوحة للهدرزة واللمة ديمة اتقول قهوة !!! وشوية وجابوا الدوة عالغولة وشن دارت لفلان وعلان وكيف خشت لحوش فلان وكيف حطت كنز لعيلة فلان وخلتهم وخلتهم اغنياء و اعنيدهم !!! قال الطاهر حتى اني خشت للمرا في الحوش وهكي صار !!!! قالوله ماعندهاش حق لمرا كان عطتها من الدهان راهو اعطتكم صرة كنز !!! روح من السهرية والغولة امسيطرة على تفكيره لدرجة حتى طوابي الهندي الدي يتخيل فيهم يتحركوا  وقال في فكره حق كان نحصلوا منها صرة ذهب !!! ... وصل لحوشه والخوف خلاص ركبه ... وهو افتح الباب من اهني وشاف القي السقيفة كلها معبية بالقدور مكفيات ... خش يجري القي مرته امكتفة بحبل غليظ ملفوف لف عليها وفمها متكمم بكتانة ومن الخوف والصدمة ما لحظش ان عقدة الحبل من قدام مش من تالي !!! فك لمرته فمها  قالتله بخوف جتني الغولة تاني جتني اني والله معاد قاعدة فيه الحوش لين اديرلها شن تبي  ... قاللها شن قالتلك !!؟؟  قالتله !! قالتلك اطلق ايدك واعقل وكان هذا بنطقطقلك رقبتك !! الصبح ناض يتفقد في الحوش ويقيم في القدور ويرد فيهم للكوجينة ... ونجمة من روشن الدار اتشوف فيه بالدرقة وفي خاطرها اتقول الطاهر ايضم في الحوش من كان يقول !!! جي قعمز بحدا نجمة وينشد فيها على شكل الغولة وصوتها وهيا عاد تاخذ وتوصف على قد غيظها منه !!! قالها باهي كان جاتك تاني قوليلها الطاهر قال حاضر نطلق ايدي ونعقل بلكي تعطينا حتى صرة ذهب زي ما اعطت لعيلة فلان !!! ... فوتت نجمة يومين ودارت خطة تالتة وقالتله جتني الغولة جتني غير المرة هادي لما قلتلها الطاهر قالك حاضر نطلق ايدي ونعقل ضحكت وقالت كان حق طلق ايده واعقل انجيبله صرة اذهب!!!!!  اتقولي عليها سمعاتك لما قلت تبي صرة ذهب !!!!!  ... فرح الطاهر وقاللها امتا قالتلك اتجيبها !!! قالتله لا ما قالتش امتا ومانزيد عليك كلمة !!! !!!! ومن يومها والطاهر اتغير وطلق ايده واعقل وارتاحت نجمة من اعصابه وتحرنيفه ... وكل يوم ينشد في نجمة جاتك الغولة يانجمة !!!؟؟؟ اتقوله لا ماجتش هيا قالت لما انشوفه اطلق ايده واعقل انجيبله صرة ذهب ومانزيد عليك كلمة  .... اكتر مايزيد هداكا الطاهر في كرمه وعقله .... كمل عمره وهو يستنى في صرة الذهب ونجمة ارتاحت من همه ......