خرافات زمان ليبية💗

الكلب بو سبعة سلاسل💕

ملاحظه💕:-
الخرافة هاذي علي اربعة اجزاء.
       
  "قراءة ممتعه"💕

خرافتنا_اليوم

#الكلب_بو_سبعة_سلاسل
الجزء الأول
ياحنااااا يامنا ربي يعطركم بالزهر والحنة ويجعل مقامكم من مقام الجنة
ياحزاركم يامزاركم ونور النبي العدنان ينور دياركم
اليوم بنحكيلكم قصة مكتوب الاميرة التانية في قصة يوسف المسحور المدفون بين سبع قبور
الأحداث شوية متشابهة بينها وبين قصة اختها فلهذا بنحاول نختصرها في الاول مش حنحكي كل شيء لأنكم عارفينه في القصة الأولى.
   زي ماقلنا الاميرة الأولى وصت اختها قتلها اني بنطلع بندور علي مكتوبي وكأني قعدت سنتين أو ثلاثة مارجعتش معناها راني لقيت مكتوبي وحتى انتي ياوخيتي اسألي ودوري علي مكتوبك.
هديكة الاميرة الوسطية استنت اختها لمدة عامين ولا روحت ولا جي من عندها خبر،  انشغلت عليها وحكت لدادتها وهديكة الدادة قالتلها  خلى نزيدوا نصبروا شوية لين يفوت العام الثالث وبعدين ربي يأتي اللي فيه الخير،  ولما جت  السنة الثالثه وتمت وماسمعوش خبر عالاميرة الكبيرة قالت الاميرة الوسطية لدادتها اني خلاص معاش بنستنى وبنمشي نشوف ونتبع شن صار لاختي وحتى اني بنمشي ندور علي مكتوبي ، قتلها الدادة  حتى انتي بري لاختك الاميرة الصغيرة وقوليلها تنشد راجلها الامير علاش هديكة الليلة لما جاك في الجناح طلع مضايق وقال معاش نقدر نكمل. مشت هديكة الاميرة لبوها السلطان وقتله نبي نزور وخيتي و صغويرتها  ليا مدة ماعاد شفتها، بوها وافق وامر يوتولها هدايا ترفعها معاها وحضرلها الكروسة الملكية والحرس وقلها بري في امان الله
تسقدت هديكة الاميرة ولما قريب توصل واحد من الحرس سبقها باش يقول لاختها الاميرة انهم قريب يوصلو، لما وصلوا لقت اختها الاميرة وزوز صغارها  فى استقبالهم ومانحكيلكمش عالفرحة والاستقبال كيف كان ضحك وبكي ودموع . وبعدين قعمزوا يهدرزوا مع بعض طبعا كل وحدة عندها كدس حكايات بتحكيهم لوخيتها وتغدوا وتعشوا وفي الليل لما الدنيا سكتت والصغويرة رقدوا . سألت الاميرة الوسطية وخيتها قتلها ماسمعتيش أخبار علي اختنا ولقت مكتوبها ولا شن صار معاها، قتلها والله من يوم ودعتها وطلعت ادور علي يوسف المسحور ماعاد سمعت اخبارها، قتلها خلاص امالة ياوخيتي اني بنمشي ونسأل لكن نبيك تنشديلي زوجك الامير عن اللي صار في هديكة الليلة بالك حتى اني عندي مكتوب و بنمشي ندوره، قتلها خلاص اني الليلة نساله وغدوة انقولك. ولما جاهم النوم خلتها ومشت لجناحها .
وفي الصبح ناضو وفطروا وقتلها وخيتي شن صار سالتيه قتلها سألته وقالي الجني لما طلعلي من الحيط قالي هادية مكتوبة كلب بو سبعة سلاسل ، لكن ياوخيتي خليك معانا توة وخيتنا غابت علينا وقعدنا احنا بس وماتغيبيش علينا حتى انتي ماتخلينيش بروحي لا مع من نشكي لا مع من نبكي، قتلها خليني ياوخيتي ندور مكتوبي ووخيتي ونجو الزوز مع بعض ونلتموا من جديد في قصر واحد، لكن نوصيك راهو بونا السلطان قعد بروحه ماتنسيشي مرة مرة زوريه,وونسيه
روحت هديكة الاميرة لقصر بوها السلطان وحكت لدادتها شن صار وقتلها اني من غدوة بنمشي ندور علي مكتوبي، وتاني يوم الصبح وتت مايلزمها وتوكلت على ربي وتسقدت مشت.
.بره بره بره  تخلى بلاد وتعمر بلاد وما يخلى ويعمر غير الكريم الجواد وكل ماتوصل في بلاد تسأل مافيش حد يعرف كلب بو سبعة سلاسل اللي هذا يقلها منك نسمعوا،  فاتت عليها مدة طويلة وهيا من بر لبر ومرة من المرات لقت روحها في غابة اشجارها عالية وكثيفة ربطت حصانها وقالت خلي نرتاح شوية في هالظل
كان اليوم نو وشمس ارتاحت شوية وناضت ادور شن تأكل وتوكل حصانها وهيا تحوس هني وهني لقيت الرخامة اللي لقتها اختها  مسحتها وشافت صورتها في الرخامة وتنهدت وقالت ( يا مزينى يا مبهانى والسعد ما واتانى)  ردت عليها الرخامة( يا مجربة بختها قيمى الحجيرة واشبحى شن تحتها) ومانبيش نعاود نفس القصة  زي ماصار لاختها نزلت ولقت اميرة القصر، شبحتلها وقتلها قبل ثلاثة سنين جتني اميرة زيك وبعدها ماعاد شفت بنادم ، قتلها هديكة اختي وحكتلها قصتها كلها وطبعا نفس الشي جي الغول وسالاته علي كلب بو سبعة سلاسل وضربها وماباش يجاوبها خلاته لين رقد ومشت للاميرة قتلها اختك قلتلها امشي دوري علي اختي تو بالك الغول قاللها حاجة علي يوسف المسحور حتى هيا حابسها غول تاني وحتى اني راهو بعد يمشي الغول بنهرب معاك معاش بنقعد، قتلها كيف والغول كان استاقض بيك ، قتلها هو لما يمشي يقعد ثلاثة ولا أربع أيام يصطاد احنا نكونوا بعدنا هلبة علي المغارة، قتلها يازينك كلام امالة اول مايطلع الغول وتي روحك، صبح الصبح والغول ناض وفطر  وهديكة الدنيا ولت صفراء وبعدين حمراء وهداكة الغول تسقد علي حاله
وهدوكة الاميرات وتو مايلزمهم وطلعو من المغارة ويركبوا فوق الفرس وطاروا طيارة باش يبعدوا والغول معاش يلقاهم، وبعد ما عرفوا روحهم باعدوا خدوا راحتهم وبدوا كل مرة يرتاحو في بلاد ويسالوا علي كلب بو سبعة سلاسل واللي هذا يقول ماعمرنا سمعنا بيه ، يمشوا لبلاد ويطلعوا من بلاد لين لقو غابة كثيفة شجر طويل متشابك، ربطوا الفرس وارتاحوا وشوية ودوروا ماياكلوا كلو ووكلو فرسهم
  وقعدوا يحوسو هني وهني وهديكة الشمس فوقهم وبعدين شبحو حاجة تلمع من بعيد زي المرايا مشولها,و مسحتها الاميرة وشافت وجهها و تنهدت وقالت( يا مزينى يا مبهانى والسعد ما واتانى )ردت عليها الرخامة زي ما توقعت( يا مجربة بختها قيمى الحجيرة واشبحى شن تحتها) طول قامت الرخامة ولقت الدروج  نادت رفيقتها وقتلها هي خلي ننزلوا ونفس الشي لقوا اميرة القصر وهني اللقاء كان اكثر حلاوة تلاقو لوخيات اللي ليهم اكثر من عشرة سنين مخطوفات ومدفونات في مغارة ، وقعدوا كل وحدة تحكي وتبكي عاللي صايرلها وقتلهم جتني الاميرة وسالتني علي يوسف المسحور والغول ضربني وماباش يقولي واني قلتلها بري دوري وخيتي اللي اكبر مني أكبر منك بيوم ازيد منك بحيلة وبعدها معاش سمعت أخبار عليها .
قتلها الاميرة الوسطية حتى اني جاياتك نبيك تنشديلي الغول علي مكتوبي كلب بو سبعة سلاسل، قتلها اول مايجي نساله ونقولك
وجي بعد ايام هداكة الغول واول ماخش للمغارة قلها ( صنة نصري في قصري شن جابهولى ياكسري) طبعا هيا وصت الاميرة ادس حصانها بعيد وتجيبلها ريش طيور، قتله ما هناك شيء غير في طوير خطم وطاحوا منه رويشات قلها احرقيهم وجيبيهم نسفهم   
وتعشو وخلاته لين ارتاح وسألاته علي كلب بو سبعة سلاسل ونفس الشي غضب وضربها وقلها منين سمعتي بيه
قعدت تبكى وقتله خلاص من اليوم ماعاد سألاتك علي حويجة وخلاته لين رقد ومشت للاميرات وحكتلهم شن صار ، قالولها خلاص احنا غدوة نمشوا ندوروا علي الاميرة الثالثة بالك الغول قاللها حاجة
ردت عليهم اميرة القصر قتلهم وين بتخلوني حتى اني بنمشي معاكم ، قالولها كيف والغول قتلهم حتى اني بنتشجع زيكم وبنواجه مصيري لامتى بنقعد تحت رحمة الغول ،
وجي الصبح والدنيا ولت صفراء وبعدين حمراء والغول طلع من المغارة وهدوكة الاميرات لمو مالازمهم ووتو روحهم وركبو الفرس وطيارة يبوا يبعدو عالمغارة أكبر مسافة ممكنة باش الغول معاش يعرفلهم طريق

زعمة شن بيصير فيهم الاميرات ؟ وبيلقوا الأخت الثالثة ولا بيلحقهم الغول؟!!!
هذا كله حنعرفوه في الجزء التاني بإذن الله
تصبحو على  خير