خرافات زمان ليبية💗

"قوة السعد"💕

خرافتنا  الليلة..

خرافة  تحكي على  قوة السعد. تطلبيه. لراجل. مرات اكثر حتي من لمراء.     ياحزاركم يامزاركم ونور النبي ينور دياركم
كان يا ماكان في قديم الزمان يحكوا  علي   راجل ومرته. متبني وليد وبنيه. من دار الرعايه.    اهو البنت تزوجت وتهنت وعاشت في خيار خيرها لكن الولد زي مايقولوا خوتنا في الشرق حظه عطيب.    واحنا نقولوا سعده طايح  وبخته رايح.  طاح في مراء مشومه حرفه صرفه غبره. جاب معاه ولد. وقعد متحملها لكن شي مابت تهفت لا تلين . يخي ولت تمكر حتي في ولده عليه. انفصل عليها. وقال خلي اندور نصيبي مع مراء تانيه.   لكن حد. مابي يخطبله. حتي امه لمربيته قالت عيب عليك عندك وليد. لحد نهار مرض  كلها برده  كبيره.  ملوح في حوش بروحه ومرته ولده مش سألين عليه لاشن كلي لاشن شرب. اهو كلم ولده تليفون ويبيه يرفعه لدكتور ️شي مابي يجي.  ويسمع في  امه تمكر فيه وكان. كله قدام صديق مقرب ليه كان ينصح فيه. ويقوله لازم ترد مرتك.   وجعه حال صاحبه.  وطلب من امه وأخته. يخطبوله. الام رفضت. ولكن اخته وافقت وجعها الراجل.  ومش هكي. بس. لان كانت معاها مدرسه مطلقه. فكرت. ان بهذا العمل ادير خير في المدرسه اللي معاها. تستر عليها. وكذلك الراجل هذا حتي هو ينستر و يرتاح خصوصا خوتها لولاد يشكروا فيه هلبه كلمت صاحبتها المدرسه. فرحت. فرحه لابعدها  لاقبلها وندار عرس ولت عروسه. لكن من شهر العسل قلبتله حياته. وكانت اصعب. واحرف من مرته الاولي و كانت   انتهازيه وتبتز فيه وتتشرط عليه  وكانت ماديه لاقصي درجه حاول يساير وضعه ويرضيها ويديرلها اللي تبيه. لكن هي تمادت لاقصي حد.  و قعدت  تبتز في صاحبتها اللي خذتهاله. وتحاول تحط اللوم عليها. وقَعَدت صاحبتها تحس بشعور بالذنب بالك ارتكبت غلط. لكن خوتها مازال يشكروا فيه ومش هكي وبس كلامه كله إللي يقول فيه كان مقنع وهي ما نكرتش وماقالتش ماصارش. اهو ليوم من الايام. فاض بيه الكيل وطلقها وهي ماتحسبش يطلقها.تحس لان مطلق ويتم ومن غير اهل وناس وعزوه تقدر ادير فيه إللي تبي. لكن لما طلقها جتها صدمه. وقَعَدت مده وتحسابه يردها. رفض رفض نهائي ان  ترجعله.    جيت لصاحبتها تبكي نادمه واعترفتلها ان غلطت في حقه هلبه لكن. هو رفض يرجعها وقالها. انا رضيت بالمر.  لكن الذل مانرضاشي علي نفسي ومش هكي قعد يدور ويخطب ياناري مالقي حد يعطيه. لان   يتيم ومن دار رعايه. وكذلك مطلق مرتين.  إللي هذا يخاف قعد بلا مراء. ومرته التانيه تبعت تبي ترجع  لين نهار من نهارات. تعرف علي دكتوره. ‍️ وعجباته.   وقعد يتردد عليها نين يوم من الايام حكي لها قصته. وطلب منها. الزواج. فرحت بكلامه وأقنعت ناسها وماليها بيه. رغم جميع العراقيل وتزوجته.   ومش هكي بس. تمت فرحته   ومرته حملت بتؤام . وكان يعيش اجمل ايام حياته. لكن  إللي مكتوب عليه الشقا يقعد ديمه شاقي.  في ليله من غير ضو قمر.  يمرض ويذبل بعد الفحوصات. لقوه مريض كانسر.  وان أيامه معدودات مرته من الرعشه رميت.  وهو انتقل الي رحمة ربي.
واللي مكتوب علي جبين لازم تشوفه العين.   والمكتوب عليه الشقي يقعد شاقي. ويقولوا فيها حتي الراجل. يبي قوة السعد. .وان شاء الله إللي ماشيلها خير من اللي قاعد فيها.
وأن شاءالله خرافتنا الليلة عجبتكم💕