خرافات زمان ليبية💗

بنت الحوات وراس الحنش💕

بنت_الحوات_وراس_الحنش

خرافة تانية لعيشة بنت الحوات
ياحنااااا ... يامنااااا... ربي يعطركم بالزهر والحنة ويجعل مقامكم من مقام الجنة ...

حكايتنا اليوم علي قرية صغيرونة تعيش فيها بنوتة قنينونة اسمها عويشة ...هديكة عويشة بوها حوات يصطاد في الحوت ويبيع فيه في سوق الحوت واميمتها كانت زي نسوينات زمان وقت الحصادة تمشي تحصد في محصول مزرعة من مزارع الناس الاغنياء بالاجر وتساعد في راجلها في مصروف الحوش ..وهديكة عويشة كانت زي بنات توة تحب كان الحاجات المقومة اللبس الباهي والخنتش من حدايد وسلاسل وخريصات وكل الحاجات اللي تزيد البنت سماحة وزين ... لكن ياناري عويشة كانت من عيلة فقيرة والحاجات هادي تشبح فيها بس في الحلم قاعدة اماني واحلام في خاطرها بس تتمنى هالاحلام هاذي في يوم تتحقق وتبدأ حقيقة عايشتها ...

وكان ياحنا بحدا حوش عويشة جارة ارملة توفى راجلها وخلاها في عز شبابها بروحها قعدت سنين حازنة وبعدين ياكبدي قعدت ادور في راجل يونسها عقاب عمرها ... ووين جت عينها ... !! كان علي بو عويشة جارهم ياكبدي ... وكل يوم في الطلعة والخشة تشبح فيه قدامها .. وكيف ياكبدي بتجيبه ...؟!!!
قعدت تخمم وكيد النساء وعارفينه من هني من هني كل مرة حويجة شبحة ..كليمة غمزة ولقت افضل واسرع طريقة توصلها ليه هيا بنيته عويشة ماهو علي نياتها واللي بتقولهولها بديره بلا معرفة ...

في يوم ياحنا لقت عويشة تلعب في النقيزة مع بنيات جويرات ... كل يوم وهيا تشوف فيها ... بدت وين ماهذا تفتح في شق الباب وتتفرج عليها وتخمم .. يوم علي يوم هديكة عويشة حست ان في حد يراقب فيها ويشبحلها من شق الباب ..وجت العين في العين وهديكة المراء ابتسمتلها ابتسامة خبث لكن عويشة صغيرة وين تعرف ياكبدي كيد النساوين ... زادت كبرت شق الباب وقتلها شوفي شن في ايدي...
شبحت عويشة لايديها لقت وشاح احمر مطرز بخويطات ذهبيات .. عويناتها قعدو يلمعو فرحانة ومدت ايدها بتاخده ...الجارة قبل ماتوصل ايد عويشة للوشاح جبدت ايدها وقالت لعويشة هدية مني ليك واللي تبيه ويعجبك نعطيهولك لكن عندي شرط ... وقعدت تقوللها في شرطها وعويشة تسمع وساكتة ...
تاني يوم كانت ام عويشة في وحدة من سواني كبار التجار تحصد مع الحصادات ..وكان الجو سخون والشمس مفنصة والعرق يشر عليها وحست رويقها يابس بتشرب ...كانت في قفتها قربة امية فتحتها وجت بتشرب منها لقت فيها عقرب ياكبدي يفنص ...خدتها فيسع وحذفتها علي طول ايدها ..وقالت الحمدالله اللي مش بنيتي عويشة اللي فتحت القربة ... صغيرة وماتعرفش كان هذا راهو بنيتي تسممت وماتت..
اليوم التاني صار العياط بعيد عليكم الشر ..ام عويشة ماتت ...ياحنا لدغتها لفعى سامة كانت في قفتها اللي ترفع فيها في ماكلتها كل يوم ... وقبل ماتموت وصت راجلها قتله رد بالك تجيب لبنيتي عويشة مرت بو .. لين بنيتي تكبر وتقدر تتحمل المسؤلية وبعدين مانخافش عليها لكن توة قاعدة بنيتي صغيرة ومرت البو اللي بتجيبهالها بتسحنها وبديرها زي الشغالة...
عويشة كانت صغيرة وعلي نياتها وكيد النساوين ومكرهم ماتعرفاشي كانت بس فرحانة بهداكة الوشاح الاحمر اللي بتعطيهولها الجارة بعد ماتنفذلها عقاب شرطها وهو ان بوها يتزوج الجارة ...
فاتو حاشاكم ايامات العزي وبدت هديكة عويشة تكلم في بوها يتزوج باش تحصل الوشاح فيسع وتلبسه ...وهداكة البو يقولها لا ماهو مريته قبل ماتموت وصاته عاد ...
وبدي زي قبل زي تالي يرفع في شبكته ويمشي للبحر يصطاد ويبيع في الحوت ويصرف علي بنيته ... وكان لما يروح للحوش يلقى هديكة عويشة كل شيء مدايراته الحوش شمامة والغدي حرايمي ... حوت حاشا عيونكم يفحفح بالثومة والكمون والخبيزة سخينة والصغويرة مرتبين ونظيفين ..كأن مرته قاعدة حية واكثر ...وقعد علي هداكة الحال ايامات وشهور ...
وبري ياايام وتعالي ياايام وهديكة عويشة ووخيبنها باهي كبرو شوية ومع زنان الجارة علي عويشة وعويشة علي بوها اقتنع البو وقال باهي بناخد وبنجيب مراء تساعد بنيتي عويشة ماهي قاعدتلي ديمة سيورها بتتزوج وتمشي علي حالها واني ووليداتي بنقعد سايب منو بينا... عويشة فرحت وطول قالت لبوها علي الجارة الارملة ...